ՉԼ-ում արդեն կայացել են կիսաեզրափակչի առաջին հանդիպումները, իսկ այսօր խաղադաշտ դուրս կգան արդեն Եվրոպա Լիգայի ներկայացուցիչները։ Մեզ սպասվում է ոչ պակաս հետաքրքիր երկու դիմակայություն։
⚽ Մաչեսթեր Յունայթեդ-Ռոմա
«Կարմիր սատանաները» «Ռոմայի» համար շատ անհարմար մրցակից են: Հետաքրքիր է, որ թիմերը նախորդ երեք դիմակայությունները անցկացրել են 1 տարվա ընթացքում՝ 2007-ի ապրիլից մինչև 2008-ի ապրիլ: Նախ Յունայթեդը պարզապես ջախջախեց «գայլերին» Չեմպիոնների լիգայի քառորդ եզրափակչում՝ 1:2, 7:1 : Աշնանը նրանք հանդիպեցին խմբային փուլում և կրկին հաջողությունը անգլիական ակումբի կողմն էր՝ 1:0, 1:1: Իսկ 2008-ի գարնանը՝ կրկին քառորդ եզրափակիչ և կրկին մանչեսթերցիները հաղթանակ տարան երկու խաղերում(2:0, 1:0):
Այսօրվա հանդիպումը կարևոր է հատկապես Հենրիխ Մխիթարյանի և Քրիս Սմոլինիգի համար, ովքեր ժամանակին հանդես են եկել ՄՅՈՒ-ի կազմում։ Հենց անգլիական թիմի կազմում է հայ կիսապաշտպանը նվաճել իր առաջին եվրոպական գավաթը․ 2017թ «Մանչեսթեր Յունայթեդը» հաղթեց «Այաքսին» (2-0), իսկ հանդիպման երկրորդ գնդակը խփեց Մխիթարյանը՝ նույն Սմոլինգի փոխանցումից հետո։
Ի դեպ, սա Մխիթարյանի արդեն 4-րդ կիսաեզրափակիչն է ԵԼ-ում՝ 3 տարբեր ակումբների կազմում («Ռոմա», «Արսենալ», ՄՅՈՒ)։
ՄՅՈՒ-ն ներքին առաջնությունում, կարելի է ասել, արդեն լուծել է իր խնդիրները․ թիմը ամրապնդվել է լավագույն քառյակում, հաջորդ մրցաշրջանում 99%-ով հանդես կգա ՉԼ-ում, և Սուլշերի թիմն այժմ կարող է ամբողջ ուշադրությունը հառել դեպի ԵԼ-ն։ Իսկ ահա Ֆոնսեկայի թիմի գործերը ներքին առաջնությունում այդքան էլ լավ չեն ընթանում, թիմը կարող է նույնիսկ եվրագավաթային տեղեր չզբաղեցնի և Եվրոպա Լիգայում հաղթանակը թերևս լավագույն հնարավորությունն է հաջորդ տարի եվրաասպարեզում կրկին հանդես գալու համար։
⚽ Վիլյառեալ-Արսենալ
Այս հանդիպումը նվազագույնս հետաքրքիր է այն փաստով, որ «Վիլյառեալի» գլխավոր մարզիչ Էմերին կհանդիպի իր նախորդ թիմի հետ։ Էմերին վեցերորդ անգամ է հասել Եվրոպա լիգայի կիսաեզրափակիչ, ինչը ռեկորդ է մրցաշարի պատմության մեջ, ներառյալ այն ժամանակաշրջանը, երբ այն կոչվում էր ՈՒԵՖԱ-ի գավաթ: Նախկինում Էմերին դուրս է եկել Եվրոպա լիգայի կիսաեզրափակիչ «Վալենսիայի» (2012), «Սևիլիայի» (2014, 2015, 2016) և «Արսենալի» (2019) հետ:
«Միստր Եվրոպա Լիգան» (Էմերի) ամենահաջողակ մարզիչներից մեկն է այս մրցաշարում և հետաքրքիր է՝ այս անգամ արդյո՞ք այդ միստիկիական հաջողությունը կուղեկցի նրա թիմին։
«Վիլյառեալը» մինչ այժմ ոչ մի հաղթանակ չի տարել լոնդոնյան ակումբի հետ դիմակայություններում․ թիմերը հանդիպել են 4 անգամ և դրանցից երկուսում հաղթել է «Արսենալը», իսկ երկու խաղերում էլ գրանցվել է ոչ-ոքի։
Երկու թիմերն էլ ներքին առաջնություններում գրեթե հնարավորություն չունեն հայտնվել լավագույն քառյակում, այնպես որ, ինչպես «Ռոմայի» դեպքում, այս դուետից յուրաքանչյուրի համար ԵԼ-ում հաղթանակը միակ տարբերակն է հաջորդ մրցաշրջանում ՉԼ-ում հանդես գալու համար։
⚽ Մրցավարները
«Մանչեսթեր Յունայթեդ» — «Ռոմա» հանդիպումը սպասարկելու է իսպանական մրցավարական բրիգադը՝ Կառլոս դել Սերոյի գլխավորությամբ: Մրցավարի օգնականներն են Խուան Յուստեն և Ռոբերտո Ալոնսոն: Չորրորդ մրցավարը Խեսուս Գիլ Մանսանոն է:
Պորտուգալացի մրցավարները կաշխատեն Իսպանիայում՝ սպասարկելով «Վիլյառեալ» — «Արսենալ» հանդիպումը: Գլխավոր մրցավարը Արթուր Դիասն է: Մրցավարի օգնականներն են Ռուի Տավարեսը, Պաուլո Սոարեշը, իսկ չորրորդ մրցավարը Տիագո Մարտինսն է:
Երկու հանդիպումներն էլ կկայանան այսօր և կմեկնարկեն Երևանի ժամանակով 23։00-ին։
Վար Բաբայան
