Մադրիդի «Ռեալում» լրջորեն անհանգստացած են թիմի բրազիլացի հարձակվող Վինիսիուս Ժունիորի խաղային անկմամբ։ «Արքայական» ակումբի ղեկավարությունն ու մարզչական շտաբը մանրամասն վերլուծել են ստեղծված իրավիճակը և 26-ամյա վինգերին շուրջ մեկ ամիս ժամանակ տվել՝ նախկին մարզավիճակին վերադառնալու համար։ Հակառակ դեպքում ֆուտբոլիստը կարող է կորցնել տեղը մադրիդցիների մեկնարկային կազմում։
Ինչպես հայտնում է իսպանական El Debate պարբերականի լրագրող Թոմաս Գոնսալես-Մարտինը, ակումբում խնդիրն ուսումնասիրել են բոլոր հնարավոր տեսանկյուններից՝ հաշվի առնելով ինչպես մարզական ցուցանիշները, այնպես էլ անձնական, ընտանեկան ու հոգեբանական գործոնները։ Արդյունքում մադրիդյան գրանդում եկել են այն եզրակացության, որ անկումը բացառապես ֆուտբոլային բնույթ ունի։ Մասնավորապես՝ նկատվել է, որ բրազիլացին կորցրել է նախկին պայթյունավտանգ արագությունը և մենապայքարներում գործում է առանց երբեմնի վստահության։ Քննարկվում է նաև նրա կազմվածքի հնարավոր փոփոխության վարկածը, որը, սակայն, պաշտոնապես հաստատված չէ։ Ինքը՝ Վինիսիուսը, ևս գիտակցում է խնդրի լրջությունը և տրամադրված է հնարավորինս արագ շտկել իրավիճակը։
Աղբյուրի փոխանցմամբ՝ «Ռեալի» գլխավոր մարզիչ Ժոզե Մոուրինյուն անձամբ է զբաղվում ֆուտբոլիստի վերականգնմամբ՝ փորձելով աջակցել նրան թե՛ մարզական, թե՛ հոգեբանական առումով։ Այդուհանդերձ, պորտուգալացի մասնագետը հստակ հասկացրել է, որ անձեռնմխելի խաղացողներ չկան՝ անկախ անունից ու կարգավիճակից։
«Մոուրինյուն կանի այն, ինչն անհրաժեշտ է թե՛ ֆուտբոլիստին վերականգնելու, թե՛ թիմի շահերը պաշտպանելու համար»,- ակումբի դիրքորոշումն է ներկայացնում իսպանական պարբերականը։
Եթե բրազիլացուն չհաջողվի բարելավել իր խաղը, մարզչական շտաբը պատրաստ է նրա փոխարեն խաղաժամանակ տրամադրել Էնդրիկին, Բրահիմ Դիասին կամ Էսպիին։ Հատկանշական է, որ վերջին երկու հանդիպումներում՝ «Ռոմայի» և ԱԵԿ-ի դեմ, «Ռեալին» հաջողվել է բեկել խաղի ընթացքը հենց Վինիսիուսի փոխարինումից հետո։
Վինիսիուսին տրված մեկամսյա ժամկետի ընթացքում նա հնարավորություն կունենա դրսևորելու իրեն «Սելտայի», ՊՍՎ-ի և «Ալավեսի» դեմ խաղերում։ Առաջընթացի բացակայության դեպքում բրազիլացին ռիսկի է դիմում դուրս մնալ մեկնարկային կազմից դեկտեմբերին կայանալիք առավել բարդ՝ «Արսենալի» և Բիլբաոյի «Ատլետիկի» դեմ դիմակայություններում։ Բացի այդ, Մոուրինյուն չի ցանկանում, որ Վինիսիուսի ներկայությունը խոչընդոտի հարձակման գծի մյուս խաղացողների, մասնավորապես՝ Դիոմանդեի առաջընթացին, որն առավել արդյունավետ է գործում հենց ձախ եզրում։
«Վալենսիայի» դեմ խաղից առաջ կայացած մամուլի ասուլիսում Մոուրինյուն հրապարակայնորեն պաշտպանել է իր սանին, սակայն միևնույն ժամանակ հստակ ուղերձ հղել․
«Բարձրակարգ ֆուտբոլիստը նույնիսկ բարդ ժամանակահատվածում հիմք է տալիս հավատալու, որ կվերադառնա իր բնականոն մակարդակին։ Մարզիչը պարտավոր է ամեն ինչ անել խաղացողներին լավագույն մարզավիճակի բերելու համար՝ կիրառելով տարբեր մարտավարական և անհատական մոտեցումներ։ Սակայն ինձ համար առաջնայինը թիմն է․ ես երբեք իմ կամքով չեմ վնասել թիմին՝ հանուն որևէ առանձին ֆուտբոլիստի շահի»։
Այսպիսով, առաջիկա շաբաթները վճռորոշ են լինելու Վինիսիուսի մադրիդյան կարիերայի այս բարդ փուլում․ մարզչական շտաբի աջակցությունը պահպանվում է, սակայն մեկնարկային կազմում տեղը երաշխավորված չէ առանց կոնկրետ արդյունքների։
