Մադրիդի «Ռեալը» հետաքրքրված է «Աստոն Վիլայի» դարպասապահ Զիոն Սուզուկիի ծառայություններով։ Ճապոնացի ֆուտբոլիստը հայտնվել է եվրոպական մի շարք գրանդ ակումբների ուշադրության կենտրոնում։
Ինչպես հայտնում է TEAMtalk-ը, 24-ամյա դարպասապահի խաղով հետաքրքրված են նաև ՊՍԺ-ն, «Արսենալը», «Մանչեսթեր Սիթին», «Լիվերպուլը» և «Տոտենհեմը»։
Սուզուկին «Աստոն Վիլա» է տեղափոխվել ամռանը՝ «Պարմայից»։ Անգլիական ակումբը նրա տրանսֆերի համար վճարել է 30 միլիոն ֆունտ, իսկ ֆուտբոլիստի հետ կնքել հինգ տարվա պայմանագիր։
«Ռեալը» ճապոնացուն դիտարկում է որպես դարպասապահի դիրքի երկարաժամկետ տարբերակ։ ՊՍԺ-ն նույնպես ամռանը դիտարկել էր Սուզուկիին ձեռք բերելու հնարավորությունը, սակայն որոշել էր շարունակել համագործակցությունը Մատվեյ Սաֆոնովի և Լուկաս Շևալյեի հետ։
TEAMtalk-ի տեղեկություններով՝ Սուզուկիի խաղային որակները, մասնավորապես՝ տուգանային հրապարակից դուրս գործելու և ճշգրիտ փոխանցումներով գրոհներ սկսելու կարողությունը, գրավել են եվրոպական ակումբների ուշադրությունը։ «Աստոն Վիլան» իր հերթին ևս մտադիր չէ բաժանվել դարպասապահից, որին դիտարկում է որպես իր երկարաժամկետ ծրագրերի կարևոր մաս։
Նշվում է, որ եթե Սուզուկիի նկատմամբ հետաքրքրությունը կվերածվի իրական տրանսֆերային պայքարի, նա կարող է գերազանցել դարպասապահների համար սահմանված տրանսֆերային ռեկորդը։ Ներկայիս ռեկորդը պատկանում է Կեպա Արիսաբալագային․ 2018 թվականին «Չելսին» նրա համար «Ատլետիկին» վճարել էր 70 միլիոն ֆունտ։
