Ֆուտբոլի միջազգային ֆեդերացիայի նախագահ Ջանի Ինֆանտինոն որոշել է հրաժարվել Աշխարհի առաջնության մասնակիցների թիվը 48-ից 64-ի հասցնելու գաղափարից։ Այս մասին հայտնում է հեղինակավոր The Times պարբերականը։
Աղբյուրի տեղեկություններով՝ ՖԻՖԱ-ի ղեկավարը վեց մայրցամաքային կոնֆեդերացիաների նախագահներին և նախագահության անդամներին արդեն տեղեկացրել է, որ վերընտրվելու դեպքում չի պնդելու ինչպես հավաքականների, այնպես էլ աշխարհի ակումբային առաջնությունների հետագա ընդլայնման հարցը։ Բրիտանական պարբերականն այս քայլը պայմանավորում է Ինֆանտինոյի հասցեին հնչող սուր քննադատություններով և կառույցի առաջիկա նախագահական ընտրություններով։
ԱԱ-2030-ի մասնակիցների թիվը 64-ի հասցնելու նախաձեռնությունը պատկանում էր Հարավամերիկյան ֆուտբոլի կոնֆեդերացիային։ Գաղափարն առաջին անգամ 2025 թվականի մարտին կայացած ՖԻՖԱ-ի խորհրդի նիստում հնչեցրել էր Ուրուգվայի ֆուտբոլի ֆեդերացիայի նախագահ Իգնասիո Ալոնսոն, իսկ ավելի ուշ այն պաշտոնապես ներկայացրել էր ԿՈՆՄԵԲՈԼ-ի ղեկավար Ալեխանդրո Դոմինգեսը։ Ամռանը Ինֆանտինոն նշել էր, որ 48 թիմով ձևաչափը լիովին արդարացրել է իրեն՝ նոր հնարավորություններ տալով տարբեր մայրցամաքների հավաքականներին, և չէր բացառել նաև 64 թիմով տարբերակի քննարկումը։
Ինֆանտինոյի դիրքորոշման փոփոխության վրա ազդել է նաև վերջերս ծագած մեկ այլ սկանդալ։ ՖԻՖԱ-ն ծրագրում էր ստեղծել FIFA Forward Enterprise ընկերությունը, որը պետք է միավորեր կառույցի կոմերցիոն գործունեությունն ու մրցաշարերի կազմակերպումը՝ ներգրավելով մասնավոր ներդրողների։ Այս նախագիծը հարուցեց ՈՒԵՖԱ-ի կոշտ դիմադրությունը, որը նույնիսկ սպառնաց բոյկոտել ՖԻՖԱ-ի մրցաշարերը։ Արդյունքում Ինֆանտինոն ստիպված եղավ ընդունել տարաձայնությունների առկայությունը և չեղարկել նախագիծը։
Ջանի Ինֆանտինոն ՖԻՖԱ-ն գլխավորում է 2016 թվականից և արդեն հաստատել է, որ պատրաստվում է կրկին առաջադրել իր թեկնածությունը։ Կազմակերպության նախագահի ընտրությունները կկայանան 2027 թվականի մարտի 18-ին՝ Մարոկկոյի մայրաքաղաք Ռաբաթում կայանալիք ՖԻՖԱ-ի 77-րդ կոնգրեսի ժամանակ։
Հիշեցնենք, որ 2026 թվականի Աշխարհի առաջնությունն ԱՄՆ-ում, Կանադայում և Մեքսիկայում պատմության մեջ առաջին անգամ անցկացվեց 48 հավաքականների մասնակցությամբ։ Հուլիսի 19-ին կայացած եզրափակիչում Իսպանիայի հավաքականը լրացուցիչ ժամանակում 1:0 հաշվով հաղթեց Արգենտինային և պատմության մեջ երկրորդ անգամ նվաճեց աշխարհի չեմպիոնի տիտղոսը։
