Կատալոնական «Բարսելոնայի» 19-ամյա աստղ Լամին Յամալը շարունակում է տպավորել ոչ միայն խաղադաշտում ցուցադրած բացառիկ տաղանդով, այլև մարզումային գործընթացում իր անմնացորդ նվիրվածությամբ։ Իսպանացի վինգերը սովորություն է դարձրել թիմային պարապմունքներից հետո վերջինը հեռանալ մարզաբազայից՝ լրացուցիչ ժամանակ հատկացնելով անհատական վարպետության կատարելագործմանը։
Ինչպես հայտնում է իսպանական El País պարբերականի լրագրող Խուան Իգնասիո Իրիգոենը, երիտասարդ ֆուտբոլիստը հիմնական մարզումների ավարտից հետո պարբերաբար մնում է խաղադաշտում՝ հղկելու դարպասին ուղղված հարվածները, ինչպես նաև տուգանայինների և 11-մետրանոցների իրացումը։
Յամալի աշխատասիրությունը զարմացրել է նույնիսկ «Բարսելոնայի» նորեկ Էնթոնի Գորդոնին, որը նշել է, թե որքան հաճախ է երիտասարդ խաղընկերոջը տեսնում նաև մարզասրահում։ Հատկանշական է, որ հոկտեմբերի 22-ին՝ թիմի համար նախատեսված պաշտոնական հանգստյան օրը, Յամալը մի քանի խաղընկերների հետ կամավոր ներկայացել էր մարզաբազա՝ լրացուցիչ պարապմունք անցկացնելու համար։
Իր սանի պրոֆեսիոնալ մոտեցումը բարձր է գնահատել նաև «կապտանռնագույնների» գլխավոր մարզիչ Հանսի Ֆլիկը․
«Երբ ամեն օր տեսնում ես նրա կատարած աշխատանքը, պարզ է դառնում, թե ինչու է նա նման բարձր մակարդակ ցուցադրում խաղերի ընթացքում։ Ինձ շատ է գոհացնում այն, ինչ տեսնում եմ մարզումների ժամանակ»։
France Football-ին տված հարցազրույցում Յամալն անձամբ է խոսել իր խաղային թերությունները շտկելու ցանկության մասին․
«Փորձում եմ աշխատել բոլոր բաղադրիչների վրա։ Երիտասարդ տարիքի առավելությունն այն է, որ սովորելու և աճելու դեռ շատ ժամանակ ունեմ։ Այժմ հատուկ ուշադրություն եմ դարձնում տուգանային հարվածներին, քանի որ գիտեմ՝ այդ առումով բարելավվելու տեղ ունեմ։ Աշխատում եմ նաև գրոհների եզրափակման և մարզչի մատնանշած մյուս մանրուքների վրա»։
Իսպանացի տաղանդի այս մոտեցումն ակամայից զուգահեռներ է ստեղծում «Բարսելոնայի» լեգենդ Լիոնել Մեսսիի հետ։ Արգենտինացին ևս կարիերայի վաղ փուլում տևական ժամանակ էր հատկացնում ստանդարտ դիրքերի մշակմանը՝ հետագայում դառնալով ֆուտբոլի պատմության լավագույն մասնագետներից մեկը։ Մեսսին կատալոնական ակումբի մարզաշապիկով տուգանային հարվածներից 50 գոլ է հեղինակել, որոնցից առաջինը գրանցվել է 2008 թվականի նոյեմբերի 4-ին՝ Մադրիդի «Ատլետիկոյի» դեմ խաղում։
Յամալն արդեն իսկ քաղում է այդ քրտնաջան աշխատանքի պտուղները․ 2026 թվականի սեպտեմբերի 10-ին՝ «Ֆեյենորդի» դեմ հանդիպմանը, նա խփեց իր կարիերայի առաջին պաշտոնական գոլն ուղիղ տուգանային հարվածից։
Ամենօրյա տքնաջան աշխատանքն ուղղակիորեն արտացոլվում է նաև 19-ամյա ֆուտբոլիստի ընթացիկ վիճակագրության մեջ։ 2026/27 մրցաշրջանում Յամալը բոլոր մրցաշարերում մասնակցել է 15 հանդիպման՝ դառնալով 13 գոլի և 11 գոլային փոխանցման հեղինակ։
