Պետք է համաձայնել, որ Եվրոպա լիգայի քառորդ եզրափակչի առաջին խաղերը հետաքրքրությամբ այնքան էլ հետ չմնացին Չեմպիոնների լիգայից։ Մանավանդ, որ, այսպես կոչված, գլխավոր ֆավորիտներին հաղթանակը կամ չպարտվելը այնքան էլ հեշտ չտրվեց։
Այսօր՝ ապրիլի 15-ին, արդեն կկայանան պատասխան խաղերը, որոնք էլ կորոշեն կիսաեզրափակչի զույգերին։
✅ Ռոմա-Այաքս (առաջին խաղը՝ 2-1)
Երբ «Այաքսի» դեմ առաջին խաղը Մխիթարյանը պիտի բաց թողներ վնասվածքի պատճառով, իտալական մամուլն անհանգստացած էր՝ շեշտելով, որ Ֆոնսեկայի թիմն արդեն կախվածություն ունի հայ ֆուտբոլիստից: Բայց «գայլերն», այնուամենայնիվ, պատվով դուրս եկան ու կարողացան խաղավարտին խփած գոլի շնորհիվ հաղթանակ տոնել։
Ա Սերիայի նախորդ տուրում արդեն Հենրիխ Մխիթարյանը մոտ մեկ ամիս բացակայելուց հետո խաղադաշտ վերադարձավ՝ այնտեղ անցկացնելով 28 րոպե։ Ուստի, մեր ֆուտբոլիստին այսօր կարելի է սպասել նաև հոլանդական թիմի դեմ խաղում, որին հռոմեացիները մոտենում են առավելությամբ ու կիսաեզրափակիչ հասնելու մարտահրավերով։
✅ Մանչեսթեր Յունայթեդ-Գրանադա (առաջին խաղը՝ 2-0)
Ինչպես նշել էինք առաջին խաղերից առաջ՝ «Գրանադան» իսպանական ակումբային ֆուտբոլի վերջին տարիների գլխավոր բացահայտումներից մեկն է, որը համառ պայքար է մղում մրցաշարում, բայց, ամենայն հավանականությամբ, նրա ոդիսականն այս փուլում էլ կավարտվի։
«Գրանադայի» հարկի տակ Սուլշերի սաներն արեցին իրենց գործը․ խփած երկու գնդակ, չոր դարպաս ու առավելություն տնային խաղից առաջ։ «Գրանադան», իհարկե, կորցնելու ոչինչ չունի ու փորձելու է փրկել դիմակայությունը, բայց «կարմիր սատանաները», որոնց համար իրերն ավելի շահեկան են դասավորվել, ԱՊԼ-ում կորցրել են չեմպիոնության շանսերն ու տիտղոսի հետևից գնալու շանսը չեն ցանկանա բաց թողնել։
✅ Սլավիա-Արսենալ (առաջին խաղը՝ 1-1)
«Արսենալի» գործերն արտագնա խաղից առաջ այնքան էլ լավ չեն։ Պրահայում լոնդոնցիները ոչ-ոքի խաղացին՝ հաղթանակը ձեռքից բաց թողնելով ավելացված ժամանակում։ Հիմա էլ անգլիական մամուլը գրում է, որ «զինագործների» ղեկավարությունը ուլտիմատում է ներկայացրել գլխավոր մարզիչ Միկել Արտետային․ հաղթել Եվրոպա լիգան կամ հեռանալ։
Ամեն դեպքում, թիմը ԱՊԼ մրցաշարային աղյուսակում միջնամասում է և Չեմպիոնների Լիգայում կարող է հայտնվել արդեն, ամենայն հավանականությամբ, միայն Եվրոպա լիգան հաղթելու դեպքում։
✅Վիլյառեալ-Դինամո Զագրեբ (առաջին խաղը՝ 1-0)
Իսպանական թիմն առաջին խաղում մի կերպ հաղթանակ կորզեց խորվաթներից՝ միակ գոլը խփելով 11-մետրանոցից։ Սակայն սրան ի պատասխան՝ «Դինամոն» ոչինչ անել չկարողացավ և հիմա «Վիլյառեալը» տանը կարող է մի փոքր առավելությամբ հանդես գալ։
Հարկ է նշել, որ ՀՖՖ տեսուչ Կարեն Նալբանդյանը նշանակվել է այս հանդիպման մրցավարների տեսուչ։
Եվրոպա լիգայի քառորդ եզրափակչի բոլոր պատասխան խաղերը կմեկնարկեն Երևանի ժամանակով 23:00-ին։
Ստելլա Բաբլոյան
