Երեկ ուշ երեկոյան ավարտվեց Գերմանիայի Բունդեսլիգայի 29-րդ տուրը։ Տուրը ստացվեց բավականին գոլառատ, իսկ առաջնության բոլոր առաջատարներն իրենց հանդիպումները ավարտեցին առանց անակնկալների՝ հաղթելով մրցակիցներին։ Այդ տուրում գրանցվեցին նաև Բունդեսլիգայի մի շարք նոր ռեկորդներ, որոնց մասին կխոսենք ստորև։
Բունդեսլիգայի 29-րդ տուրի մեկնարկային խաղում «Ֆրայբուրգը» ընդունել էր «Բայերին» (0-1): Հանդիպման միակ գնդակը գրանցվեց 54-րդ րոպեին, երբ Լեոն Բեյլիի փոխանցումը գոլի վերածեց Կայ Հավերցը:
«Մայնցը» սեփական հարկի տակ ընդունել է «Հոֆենհայմին»։ Հյուրերը նվազագույն հաշվով հաղթանակի հասան: Հյուրերը խաղի 25-րդ րոպեին չկարողացան հստակ իրացնել 11 մետրանոց հարվածը. վրիպեց Ցուբերը: Այնուամենայնիվ, խաղի 43-րդ րոպեին Իհլաս Բեբուն առաջ մղեց «Հոֆենհայմին»: Մայնցը 18 հարված կատարեց մրցակցի դարպասի ուղղությամբ, բայց միայն երկուսն էին դարպասին: Երկրորդ խաղակեսում թիմերը աչքի չընկան արդյունավետ գործողություններով և խաղն ավարտվեց 0-1 հաշվով: «Հոֆենհայմի» հայտացուցակից դարձյալ բացակայում էր Հայաստանի հավաքականի հարձակվող Սարգիս Ադամյանը, ով շարունակում է ապաքինվել կոճի վնասվածքից։
Վերոնշյալ խաղին զուգահեռ կայացան ևս մի քանի հանդիպում: Բեռինի «Հերտան» 2 անպատասխան գնդակ ուղարկեց «Աուգսբուրգի» դարպասը: Աչքի ընկան Դիրլոսունն ու Պյոնտեկը։
Բրեմենի «Վերդերը» չափազանց կարևոր արտագնա հաղթանակ տոնեց. բրեմենյան թիմը 1-0 հաշվով հաղթեց «Շալկե 04»-ին:
Ֆրանկֆուրտի «Այնթրախտը» արտագնա խաղում 2-1 հաշվով հաղթեց «Վոլֆսբուրգին»:
Մյունխենի «Բավարիայի» ու Դյուսելդորֆի «Ֆորտունայի» միջև հանդիպումը ավարտվեց առանց անակնկալների։ Մյունխենյան թիմը 5 անպատասխան գնդակ ուղարկեց հյուրերի դարպասը: Առաջին խաղակեսի 15-րդ րոպեին Յորգենսենը գրավեց սեփական դարպասը՝ փորձելով հեռացնել Լևանդովսկու կիսահարվածը: 29-րդ րոպեին Պավարը գլխով կատարած հարվածով երկրորդ գնդակն ուղարկեց մրցակցի դարպասը՝ 2-0: 43-րդ րոպեին Լևանդովսկին երրորդ գնդակն ուղարկեց հյուրերի դարպասը՝ առաջնությունում իր խփած գոլերի թիվը հասցնելով 28-ի: 50-րդ րոպեին Գնաբրիի փոխանցումից հետո Լևանդովսկին խաղում դուբլ ձևակերպեց՝ 4-0: 52-րդ րոպեին աչքի ընկավ նաև բավարացիների ձախ պաշտպանը՝ Դևիսը: Ինչպես հետագայում պարզվեց, դա խաղի վերջին գնդակն էր՝ 5-0:
«Բորուսիա» Մյունխենգլադբախը ընդունել էր «Ունիոն Բեռլինին»։ Տանտերերը 17-րդ րոպեին առաջ անցան հաշվի մեջ։ Գոլի հեղինակ դարձավ Ֆլորիան Նոյհաուսը։ Մինչև ընդմիջում Մարկուս Թյուրամը կրկնապատկեց «Բորուսիայի» առավելությունը։ Երկրորդ կեսի մեկնարկում Սեբաստիան Անդերսոնը կրճատեց հաշվի տարբերությունը։ 59-րդ րոպեին Մարկուս Թյուրամը դուբլ գրանցեց՝ մեծացնելով իր թիմի առավելությունը։ 81-րդ րոպեին Ալասան Պլեան ձևակերպեց վերջնական հաշիվը՝ 4-1։
«Պադերբորնը» մրցում էր «Բորուսիա» Դորտմունդի հետ։ Գոլազուրկ առաջին կեսից հետո թիմերը 7 գնդակ խփեցին։ 54-րդ րոպեին «Բորուսիային» առաջ մղեց Տորգան Ազարը։ Երեք րոպե անց Ջեյդոն Սանչոն կրկնապատկեց թիմի առավելությունը։ 72-րդ րոպեին տանտերերը մեկ գնդակ հետ բերեցին։ 11-մետրանոց նշակետից չվրիպեց Ուվե Հունեմայերը։ 74-րդ րոպեին Ջեյդոն Սանչոն դուբլ գրանցեց՝ հաշիվը դարձնելով 1-3 հօգուտ հյուրերի։ 85-րդ րոպեին հաշիվը խոշոր դարձրեց Աշրաֆ Հակինին։ 89-րդ րոպեին աչքի ընկավ Մարսել Շմելցերը՝ 5-1։ Մեկ րոպե անց Ջեյդոն Սանչոն գրանցեց հեթ-տրիկ՝ ձևակերպելով վերջնական հաշիվը՝ 1-6։ Հավելենք, որ սա Ջեյդոն Սանչոյի կարիերայում առաջին հեթ-տրիկն էր։
«Քյոլնը» սեփական հարկի տակ ընդունեց «Լայպցիգին»։ Տանտերերը բավական ակտիվ սկսեցին հանդիպումը և 7-րդ րոպեին գրավեցին «Լայպցիգի» դարպասը: Ջոն Կորդոբան բոլորից շուտ կողմնորոշվեց և մի քանի մետրից կատարած հարվածով բացեց հաշիվը: Այդուհանդերձ, հյուրերն առանց հապաղելու հավասարեցրին խաղի հաշիվը: 20-րդ րոպեին Պատրիկ Շիկը գլխի շքեղ հարվածով գրավեց «Քյոլնի» դարպասը: 38-րդ րոպեին Քրիստոֆեր Նկունկուն հաշվի մեջ առաջ մղեց «Լայպցիգին»:
Երկրորդ խաղակեսի 50-րդ րոպեին Տիմո Վերները միայնակ ճեղքեց մրցակցի պաշտպանությունը և գրավեց Տիմո Հորնի պաշտպանած դարպասը: «Քյոլնի» հարձակվող Անտոնի Մոդեստը կրճատեց հաշվի տարբերությունը, սակայն, «Այծերին» ավելիին հասնել չհաջողվեց: 57-րդ րոպեին Դանի Օլմոն վերջակետ դրեց այս դիմակայությանը ՝ 4:2:
Սանչոյի և Մյուլերի ռեկորդները
Անգլիայի հավաքականի կիսապաշտպանը հեթ-տրիկ է ձևակերպել «Պադերբորնի» դեմ խաղում (1-6) ՝ խփելով իր 15-րդ, 16-րդ և 17-րդ գոլերը Գերմանիայի առաջնության այս խաղարկությունում: Սանչոն Բունդեսլիգայի պատմության մեջ առաջին խաղացողը դարձավ, ով խփել է 15+ գոլ և կատարել 15+ գոլային փոխանցում մեկ մրցաշրջանի ընթացքում: 20-ամյա ֆուտբոլիստը Գերմանիայի առաջնությունան 3 մրցաշրջաններում խփել է 30 գոլ․ այս մրցաշրջանում 17 գոլ, նախորդում 12, իսկ 2017/18 մրցաշրջանում՝ 1: 20 տարեկան 60 օրական հասակում Սանչոն Բունդեսլիգայի պատմության մեջ ամենաերիտասարդ խաղացողն է, ով հասել է այդ ցուցանիշին: Անգլիացին գերազանցել է «Բայերի» կիսապաշտպան Կայ Հավերցի ռեկորդը, ով 20 տարեկան և 270 օրական հասակում խփել է 30-րդ գոլ:
Մյունխենի «Բավարիայի» հարձակվող Թոմաս Մյուլերը ընթացիկ առաջնությունում կատարել է իր 18-րդ գոլային փոխանցում: OptaFranz-ը հայտնում է, որ գերմանացին Բունդեսլիգայի ռեկորդ է սահմանել՝ առաջին 29 տուրում կատարած գոլային փոխանցումների քանակով (արդյունքները հաշվի են առնվում 2004/05 մրցաշրջանից սկսած, երբ լիգան սկսել է մանրամասն վիճակագրություն իրականացնել):
Հարգանքի տուրք Ջորջ Ֆլոյդին
Գերմանիայի առաջնության 29-րդ տուրի «Պադերբորն» – «Բորուսիա» Դորտմունդ խաղում Ջեյդոն Սանչոն, խփելով իր թիմի երկրորդ գնդակը, ֆուտբոլիստը գոլը տոնելու ընթացքում հանել է մարզաշապիկը։ Սանչոն հարգել է Միացյալ Նահանգների Մինեապոլիս նահանգում ոստիկանի կողմից դաժանաբար սպանված Ջորջ Ֆլոյդի հիշատակը։ Մյուս շապիկի վրա գրված է եղել․ «Արդարություն Ջորջ Ֆլոյդի համար»։ Մինչ այդ, «Բորուսիա» Մյունխենգլադբախ — «Ունիոն Բեռլին» խաղում, Մարկուս Թյուրամը խփած գոլից հետո ծնկի իջավ՝ հարգելով Ջորջ Ֆլոյդի հիշատակը։
Մրցաշարային աղյուսակ
Բունդեսլիգայի մրցաշարային աղյուսակը վստահորեն գլխավորում է «Բավարիան», որը առաջիկա 5 տուրերի ընթացքում դժվար թէ ձեռքից բաց թողնի 7 միավորի առավելությունը։ Լավագույն քառյակում հայտնվելու համար թեժ պայքար է ակնկալվում 2-5-րդ տեղերը զբաղեցնող թիմերի միջև։ Սարգիս Ադամյանի «Հոֆենհայմը» շարունակում է պահպանել հնարավորությունը հայտնվել Եվրոպա Լիգայի ուղեգիր տվող 6-րդ հորիզոնականում։ «Պադերբորնը», ամենայն հավանականությամբ, կլքի Բունդեսլիգան, իսկ ահա «Վերդերը», վերջերս գրանցած հաջողությունների շնորհիվ, մոտ է մրցաշարային աղյուսակի վտանգավոր գոտուց դուրս գալուն։
Լավագույնները
Լավագույն ռմբարկուների ցուցակը գլխավորում է Ռոբերտ Լևանդովսկին․ «Բավարիայի» հարձակվողը իր ակտիվում ունի 29 խփած գոլ։ Լեհ հարձակվողը այդ ցուցանիշով լավագույնն է նաև Եվրոպայում և վստահորեն գլխավորում է «ոսկե խաղակոշիկի» հավակնորդների վարկանիշային աղյուսակը։ Երրորդ տեղում է «ՌԲ Լայպցիգի» ռմբարկու Տիմո Վերները՝ իր ակտիվում ունենալով 25 գոլ: Երրորդ տեղում «Բորուսիայի» կիսապաշտպան Ջեյդոն Սանչոն է՝ 17 գոլ։
