Նոյեմբերի 12-ին Հայաստանի ազգային հավաքականը ՈՒԵՖԱ-ի Ազգերի լիգայի խաղարկության C2 խմբի նախավերջին տուրի շրջանակում Երևանի Վազգեն Սարգսյանի անվան «Հանրապետական» մարզադաշտում ընդունել էր Կիպրոսի ընտրանուն։ Հանդիպումն ավարտվեց ոչ–ոքի՝ 1–1 հաշվով։ Հանդիպման մանրամասները՝ ԱՅՍՏԵՂ։
Կիպրոսի ազգային հավաքականի գլխավոր մարզիչ Ապոստոլոս Մանցիոսը մեկնաբանել է Հայաստանի ընտրանու դեմ հանդիպումը։
«Տղաները հոգի ու սիրտ դրեցին՝ խաղալով հիանալի թիմի դեմ։ Առաջին խաղակեսում կարող էինք վճռել հանդիպման ելքը։ Բացի գոլից՝ մենք հարվածեցինք դարպասաձողին և ևս մի քանի գոլային հնարավորություն ունեցանք։ Հիասթափություն կա, քանի որ կարող էինք ավելին ակնկալել»,- նշել է Մանցիոսը։
Մարզիչը նաև ընդգծել է, որ Կիպրոսի հավաքականն արդեն ապահովել է երկրորդ տեղը։
«Չպետք է հիասթափված լինենք, պետք է ուրախ լինենք այս ազգային հավաքականի համար։ Քայլ առ քայլ ամեն ինչ ավելի լավ կլինի»,- ասել է նա։
Անդրադառնալով հանդիպման ընթացքին՝ Մանցիոսը նշել է, որ խաղն ընթացել է իր սպասումներին համապատասխան։ Նրա խոսքով՝ թիմը տակտիկապես պատրաստվել էր մրցակցությանը և ցուցադրել անհրաժեշտ արագությունն ու ճնշումը։ Նա նաև շնորհավորել է Յասոնաս Պիկիսին հաջող նորամուտի կապակցությամբ։ Մարզիչը շնորհակալություն է հայտնել նաև թիմին աջակցելու համար Երևան ժամանած երկրպագուներին՝ նշելով, որ նրանցից շուրջ 100-ը ներկա է եղել հանդիպմանը և ուժ տվել հավաքականին։ Մանցիոսը վերջում հավելել է, որ ֆուտբոլում շատ բաներ են պատահում, որոնք հնարավոր չէ կանխատեսել, և իրենք կսպասեն՝ տեսնելու հետագա զարգացումները։
Հայաստանի, Լատվիայի, Չեռնոգորիայի և Կիպրոսի հավաքականներն ընդգրկված են 2-րդ խմբում։ Վերջին տուրի հանդիպումից առաջ Հայաստանի հավաքականն ունի 5 միավոր և կավարտի Ազգերի լիգայի այս փուլը երրորդ տեղում։ Կիպրոսի հավաքականը 8 միավորով ապահովեց երկրորդ տեղը խմբում։
Հիշեցնենք` Հայաստանի ազգային հավաքականը նոյեմբերի 15-ին, վերջին տուրի շրջանակում, ժամը 18։00-ին, մրցակցի հարկի տակ կհանդիպի Լատվիայի թիմի հետ։
Մրցաշարային աղյուսակն այս պահին՝ ստորև․
