Իր մեծ եղբորից՝ Չեմպիոնների Լիգայից, ետ չի մնում նաև Եվրոպա Լիգան։ Այսօր այս մրցաշարում ևս կմեկնարկի քառորդ եզրափակիչ փուլը։ Բոլոր հանդիպումները կսկսվեն Երևանի ժամանակով 23։00-ին։
✅ Գրանադա-Մանչեսթեր Յունայթեդ
«Գրանադան» իսպանական ակումբային ֆուտբոլի վերջին տարիների գլխավոր բացահայտումներից մեկն է։ Վերջին տարիներին համեստ ակումբը լավ է հանդես գալիս ներքին առաջնությունում, համառ պայքար է մղում եվրագավաթային տեղերի համար, իսկ այս տարի կարողացավ հասնել ԵԼ-ի քառորդ եզրափակիչ։ Բայց, ամենայն հավանականությամբ, նրա ոդիսականն այս փուլում էլ կավարտվի։ Մրցակիցն իսկապես ահեղ է։ ՄՅՈՒ-ն պարզապես ֆանտաստիկ մարզավիճակում է։ Սուլշերի թիմն ԱՊԼ-ում կարծես թե խնդիրներ այլև չունի լուծելու․ մանչեսթերյան մյուս ակումբից՝ «Սիթիից» շատ հեռու են, և չեմպիոնության համար պայքարելու մասին խոսք չի գնում, ամրապնդվել են երկրորդ տեղում։ Եթե անհավանական ինչ-որ բան չպատահի՝ դուրս չեն մնա լավագույն քառյակից, մառախլապատ Ալբիոնում ստիմուլ չկա, ինչո՞ւ չպայքարել Եվրոպա Լիգան հաղթելու համար։
✅ Արսենալ-Սլավիա
Առաջնության հաջող հատվածից հետո «Արսենալը» կրկին սկսեց միավորներ կորցնել: Թիմը 10-րդ տեղում է, և Չեմպիոնների Լիգայում կարող է հայտնվել միայն Եվրոպա լիգայում հաղթելու դեպքում: Թիմը լրջորեն պատրաստվում է այս մրցաշարին և բոլոր ջանքերը կգործադրի կիսաեզրափակիչ դուրս գալու համար: «Սլավիան» վստահ է իրեն զգում Չեխիայի առաջնությունում և գործնականում երաշխավորել է չեմպիոնությունը: Պրահան ներկայացնող ակումբը չի պարտվել բոլոր մրցաշարերի վերջին 21 հանդիպումներում։ Թիմը բավականին հեռուն է գնացել ԵԼ-ում, ուստի կորցնելու ոչինչ չունի, այս երկու հանդիպումներում խաղացողները ցույց կտան իրենց բոլոր հմտություններն ու ունակությունները: Պարտության դեպքում, նրանց ոչ ոք չի մեղադրի, իսկ անգլիական պատնեշը հաղթահարելու դեպքում, նրանք կդառնան հերոսներ։
✅ Դինամո Զագրեբ-Վիլյառեալ
«Դինամոն» Խորվաթիայի առաջնության մրցաշարային աղյուսակում առաջին տեղում է: Վերջին խաղերում «Դինամոն» լավ է հանդես գալիս, ակումբը պարբերաբար միավորներ է հավաքում և ցանկանում է հնարավորինս շուտ նվաճել չեմպիոնական տիտղոսը: Ինչ որ տեղ այս դուետը հիշեցնում է նախորդ զույգին․ լոկալ դոմինանտներն ընդդեմ թոփ-լիգայի միջին հորիզոնական զբաղեցնող թիմերի։ «Վիլյառեալը» ամեն տարի ավելի լավ ֆուտբոլ է ցուցադրում, բայց Ունաի Էմերիի՝ գլխավոր մարզչի պաշտոնում հայտնվելով, թիմն է՛լ ավելի պայծառ է դարձել: Ցավոք, շքեղ ֆուտբոլը ձգվեց ընդամենը մի քանի մեկնարկային տուր: Թիմը ներքին առաջնությունում ներկայումս, կարելի է ասել, կորցրել է լավագույն քառյակում հայտնվելու հնարավորությունը և պայքարում է եվրագավաթային գոտում իր տեղը պահպանելու համար։ Սակայն «Վիլյառեալը» վերջին հանդիպումներում սկսում է վերադառնալ իր նախկին մարզավիճակին և կարող է լուրջ պայքար պարտադրել խորվաթ մրցակցին:
✅ Այաքս-Ռոմա
Իտալիայի առաջնության շրջանակում «Ռոման» չի կարողացել վերջին մի քանի հանդիպումներում հաղթել: Այս պահին ակումբը Չեմպիոնների Լիգայի ուղեգիր տվող գոտում չէ, և առաջիկայում էլ շատ դժվար կլինի պայքարել այդ ուղեգրի համար: Վերջին տուրում հռոմեացիները ոչ-ոքի խաղացին «Սասուոլոյի» հետ (2:2), իսկ մինչ այդ նրանք կարևոր խաղում պարտվել էին «Նապոլիին» (0:2): Բացի այդ, վնասվածքի պատճառով բացակայում է Հենրիխ Մխիթարյանը, ով այս մրցաշրջանում դարձել է հռոմեական թիմի ամենակարևոր խաղացողներից մեկը։ Վերջին խաղերում նրա բացակայությունն իսկապես շատ զգալի էր։ Իտալական թիմը կարող է հաջորդ ՉԼ-ին մասնակցել՝ հաղթելով Եվրոպա լիգան: Սակայն մինչ այդ պետք է հաղթահարել քառորդ եզրափակչի արգելքը՝ ի դեմս «Այաքսի»։ Իսկ այս մրցակցի հետ դիմակայությանը «գայլերը» մոտենում են առանց առաջատարի․․․
Ամբողջովին հակառակ պատկերն է «Այաքսի» դեպքում, որը գերազանց է հանդես գալիս վերջին խաղերում, նամանավանդ, երբ խաղում է տանը (վերջին տաս խաղերում թիմը խփել է 31 գնդակ): Ամենայն հավանականությամբ, թիմը մրցաշրջանն ավարտելու է չեմպիոնությամբ, ներքին առաջնությունում կարելի է ասել խնդիրներ չկան լուծելու, մնում է աչքի ընկնել եվրագավաթներում, ինչն էլ կփորձեն անել ամստերդամցիները։ Թե ի՞նչ ակնկալել այս զույգի դիմակայությունից, և ո՞վ է իսկապես ֆավորիտն այս դուելում, շատ բան կհասկանանք արդեն այս երեկո։
