Անգլիական Պրեմիեր լիգայի հերթական առաջնությունն ավարտվեց: Առաջնությունը բացառիկ էր, քանի որ ԱՊԼ-ի պատմության մեջ ձևավորվեց նոր լավագույն քառյակ: Պատմության մեջ առաջին անգամ քառյակում միաժամանակ հայտնվեցին «Լիվերպուլը», «Մանչեսթեր Սիթին», «Մանչեսթեր Յունայթեդն» ու «Չելսին»:
Նախորդ առաջնության նման, այս տարի էլ չեմպիոնական պայքարը ծավալվեց 2 թիմի միջև: Սակայն, ի տարբերություն նախորդ առաջնության, այս տարի պայքարը հեռակա էր ու ինչ-որ տեղ ձևական, քանի որ «Լիվերպուլը» նախանձելի անհաղթ էր: Վերջին անգամ ԱՊԼ-ում 3 թիմի միջև հետաքրքիր պայքար ծավալվել է 2013/14 մրցաշրջանում:
Նախորդ տարի «Լիվերպուլը» պարտվեց 1 խաղում, բայց դարձավ փոխչեմպիոն, քանի որ նախանձելի էր Պեպի «Սիթիի» խաղը, իսկ այս մրցաշրջանում Կլոպի թիմը կրեց 3 պարտություն, որից 2-ը՝ չեմպիոնի կարգավիճակում. մեկը՝ ջախջախիչ՝ 0-4 հաշվով՝ «Սիթիից»:
«Լիվերպուլը» «ծարավ» էր նախորդ մրցաշրջանից: Կլոպի թիմը չեմպիոնության արժանի էր նաև նախորդ տարի, սակայն մի փոքր չհերիքեց: Այս մրցաշրջանում խանգարող ոչ մի հանգամանք չկար: Ճիշտ է, թիմը չկարողացավ ԱՊԼ-ի նոր ռեկորդ սահմանել՝ վաստակած միավորների քանակով, սակայն առավելությունն ահռելի էր:
«Լիվերպուլը» տնային 19 խաղում տարավ 18 հաղթանակ, մեկ խաղ ավարտեց ոչ-ոքի, իսկ արտագնա 19 խաղում տարավ 14 հաղթանակ, խաղաց 2 ոչ-ոքի, կրեց 3 պարտություն:
Հետաքրքիր է, որ վերջնաարդյունքում 11-րդ տեղը զբաղեցրած «Սաութհեմփթոնը» արտագնա խաղերում երրորդ լավագույն արդյունքն ունի, իսկ տնային խաղերում նախավերջինն է:
Առաջնությունը լքեցին «Նորվիչը», «Ուոտֆորդն» ու «Բոուրնմուտը»: «Ուոտֆորդը» վատ չէր մեկնարկել, սակայն ԱՊԼ-ի վերջին 16 խաղում տարավ ընդամենը 3 հաղթանակ: Ավելին, վերջին 8 խաղում կրեց 6 պարտություն, հաղթեց 2 խաղում:
Հերթական անգամ հիասթափեցրին «Էվերթոնն» ու «Վեսթ Հեմը»: Այս թիմերը վերջին տարիներին իրենց ներուժով ունակ են բարձր տեղերի համար պայքարելու, սակայն ելույթները հիասթափեցնող են:
Հերթական անգամ հաճելիորեն զարմացրեցին Վուլվզն ու «Լեսթերը»: «Գայլերը» երկրորդ տարին անընդմեջ 7-րդն են ու կխաղան ԵԼ-ում, եթե ԱԳ-ի եզրափակչում «Արսենալը» պարտվի «Չելսիին, իսկ «Լեսթերը», չնայած նրան, որ երկար ժամանակ քառյակում էր, առաջնության ավարտից 2 տուր առաջ կորցրեց այդ տեղը և մյուս մրցաշրջանում Անգլիան կներկայացնի ԵԼ-ում:
Շարունակում է իր արդյունավետությամբ տպավորել Ջեյմի Վարդին: Վերջապես, 33-ամյա անգլիացուն հաջողվեց դառնալ ԱՊԼ-ի լավագույն ռմբարկու: Նպատակին հասնելու համար այս անգամ 23 գոլը բավարար եղավ: 1-ական գոլով նրան զիջեցին Դենի Ինգսն ու Պիեր-Էմերիկ Օբամեյանգը:
Առաջնության բացահայտումներից մեկը 17-րդ տեղը գրաված «Ասթոն Վիլլայի» կիսապաշտպան Ջեք Գրիլիշի տաղանդն էր: 24-ամյա կիսապաշտպանը դարձավ 8 գոլի ու 6 արդյունավետ փոխանցման հեղինակ: Այժմ անգլիական գրանդները ցանկանում են իրենց կազմում տեսնել կրեատիվ «ստեղծագործողին»:
Առաջնության առաջին հատվածը տապալած «Տոտենհեմը» գլխավոր մարզչի փոփոխություն կատարեց. բազմավաստակ Պոչետինոյին փոխարինեց բազմափորձ Ժոզեն:
Բոլոր մրցաշարերում անցկացրած 35 խաղում Ժոզեի «Տոտենհեմը» տարավ 15 հաղթանակ, խաղաց 9 ոչ-ոքի ու կրեց 11 պարտություն: Թիմը դուրս մնաց ՉԼ-ի խաղարկությունից, իսկ առաջնությունում՝ միայն ամենավերջում կարողացավ տեղն ապահովել ԵԼ-ի գավաթի խաղարկության հաջորդ մրցաշրջանում:
«Տոտենհեմի» համար մրցաշրջանը լավագույններից չէր: Շատ էին նաև վնասվածք ստացող ֆուտբոլիստները, ինչի պատճառով տուժեցին արդյունքները: Միգուցե, թիմը ուշքի չէր եկել ՉԼ-ի նախորդ մրցաշրջանի եզրափակչում կրած պարտությունից հետո: Այս պահին «Տոտենհեմի» արդյունքներն ու խաղը այնքան էլ վատը չէ, իսկ երկրպագուները ցանկանում են պաշտոնում տեսնել Ժոզեին:
«Արսենալի» մասին խոսելն ավելորդ է: Թիմը 1994/95 մրցաշրջանից ի վեր վատագույն արդյունքը գրանցեց՝ զբաղեցնելով 8-րդ հորիզոնականը: Թիմի վատ արդյունքները, թերևս, թույլ պաշտպանության և ոչ կայուն հանդես եկող կիսապաշտպանության մեջ է: Հարձակման գիծը, որպես այդպիսին, առանձնացավ մյուս օղակներից: Չնայած, թիմը դեռ պայքարում է Անգլիայի գավաթի խաղարկությունում, որտեղ դուրս է եկել եզրափակիչ ու հաղթանակի դեպքում կնվաճի ԵԼ-ի ուղեգիր:
ՉԼ-ի հաջորդ խաղարկությունում «Լիվերպուլից» ու «Սիթիից» զատ, «Մառախլապատ Ալբիոնը» կներկայացնեն «Չելսին» ու «Մանչեսթեր Յունայթեդը»:
Ֆերգյուսոնի հեռանալուց հետո վերջապես «Յունայթեդը» սկսել է ակնահաճո ֆուտբոլ ցուցադրել: Դրա մեկնարկը դրվեց մրցաշրջանի սկզբում: Թիմը մի քանի տրանսֆերով ուժեղացրեց տարբեր օղակներ և ամեն դիրքում ստացավ առաջատար: Ձմռանը թիմ եկավ Բրունու Ֆերնանդեշը, ով ակնհայտ բարձրացրեց «կարմիր սատանաների» խաղամակարդակը: Վերջնարդյունքը հենց դրա մասին է խոսում: Ի դեպ, ի հեճուկս շատերի, Սուլշերը ստացավ Պոգբա-Ֆերնանդեշ զույգը՝ խաղադաշտում:
Տպավորիչ էր երիտասարդ անգլիացի հարձակվող Գրինվուդը: Ռեշֆորդն ու Մարսիալը լավագույն մրցաշրջաններից մեկն անցկացրեցին, եթե ոչ լավագույնը: Եզրում անկասելի էր վան Բիսական, իսկ կենտրոնում անանցանելի էր Մագուայերը: Որոշակի խնդիրներ դարպասում եղան, սակայն բաց թողած գոլերով Դե Խեան լավագույն երրորդ արդյունքը գրանցեց:
«Չելսին» ևս լավ մրցաշրջան անցկացրեց: Լեմպարդի գլխավորությամբ «ազնվականների» խաղը կտրուկ փոխվեց: Լեմպարդը սկսեց հնարավորություն տալ ու վստահել երիտասարդներին: Արդեն հիմա կարող ենք փաստել, որ թիմը ձախողվեց ՉԼ-ի գավաթի խաղարկությունում, քանի որ 1/8 եզրափակչի առաջին խաղում 0-3 հաշվով պարտվել է, սակայն դուրս է եկել Անգլիայի գավաթի եզրափակիչ, իսկ առաջնությունում գրավել է 4-րդ տեղը՝ նվաճելով ՉԼ-ի ուղեգիր: Երիտասարդ Լեմպարդի այս ցուցանիշը կգոհացնի Ռոման Աբրամովիչին՝ հաշվի առնելով, որ թիմի կորիզը փոխվել է:
Գվարդիոլայի «Սիթին», իրոք, արժանի էր երկրորդ չեմպիոնության: Առաջնության ընթացքում ոչ պարտադիր սայթաքումներ եղան, որը զրկեց քաղաքաբնակներին՝ չեմպիոնության համար պայքարելու հնարավորությունից: «Սիթին» երկրորդ մրցաշրջանն անընդմեջ 100-ից ավելի գոլ խփեց: Դե Բրույնեն խելահեղ էր. բելգիացին 20 գոլային փոխանցում կատարեց ու կրկնեց Անրիի՝ մեկ մրցաշրջանում կատարած գոլային փոխանցումների ռեկորդը: Ֆրանսիացին ռեկորդը սահմանել էր 17 տարի առաջ: «Սիթին», ամեն դեպքում շարունակում է պայքարը ՉԼ-ի ընթացիկ խաղարկությունում, որտեղ քառորդ եզրափակիչ դուրդ գալու լավ հնարավորություն ունի: Դարպասապահ Էդերսոնը ստացավ «Ոսկե ձեռնոց» մրցանակը:
Դժվար է բառեր գտնել ու նկարագրել «Լիվերպուլի» խաղը: Կլոպի տղաները շարունակեցին նախորդ տարվա էյֆորիան ու 30 տարի անց նվաճեցին Անգլիայի չեմպիոնի կոչումը: Տիղոս, որը չի նվաճել, օրինակ, թիմի լեգենդ Սթիվեն Ջերարդը: Մանե-Ֆիրմինո-Սալահ եռյակը կրկին մեգաարդյունավետ էր: Միասին նրանք խփել են 46 գոլ ու կատարել 25 գոլային փոխանցում: «Լիվերպուլն» ամբողջ առաջնությունում բաց թողեց 33 գոլ. բոլոր թիմերի մեջ՝ լավագույն արդյունքը: «Լիվերպուլի» մեծագույն ձախողումը ՉԼ-ի գավաթի խաղարկությունում «Ատլետիկոյից» կրած պարտությունն էր:
ԱՊԼ-ն հերթական չքնաղ մրցաշրջանն ապահովեց իր երկրպագուների համար: Արդեն ակնառու է, որ Եվրոպական ամենահեղինակավոր մրցաշարի առաջիկա մրցաշրջանում ևս Անգլիայի ներկայացուցիչները «եղանակ» կստեղծեն՝ ի դեմս «Լիվերպուլի» ու «Սիթիի»:
Անգլիայի էլիտայի շարքերը մյուս մրցաշրջանում կհամալրեն «Լիդսն» ու «Վեսթ Բրոմվիչը»: Երորրդ մասնակցի անունը դեռ հայտնի չէ:
Արմեն Գարամյան
