«Մենք առաջին տարբերակի՝ ձևաչափը չփոխելու կողմնակից ենք»,- ArmSport-ի հետ զրույցում ասաց «Նոայի» մամուլի քարտուղար Ռուբեն Մելոյանը։
Նա նաև հավելեց, որ իրենց ակումբը առաջարկով է հանդես եկել՝ ՀՖՖ-ին․ «Առաջարկել ենք քննարկել Vbet Գավաթի խաղերը առաջնության մեկնարկից առաջ և հետո անցկացնելու հարցը, այսինքն՝ կիսաեզրափակիչ պատասխան խաղերից հետո անցկացնել առաջնությունը, իսկ եզրափակիչը խաղալ առաջնության ավարտից հետո»։
Հիշեցնենք, որ Հայաստանի Բարձրագույն խմբի առաջնությունն այս անգամ անցկացվում է նոր ձևաչափով․ մեդալների համար պայքարին մասնակցում են միայն վեցնյակում գտնվող թիմերը։
Այս տարբերակով առաջնության անցկացումը պարզվեց շատերի սրտով չէ․ հարմար չէ քիչ թիմեր ունեցող մրցաշարին։ Ավելի ուշ հայտնի դարձավ, որ ՀՖՖ-ն հարցում է ուղարկել ԲԽ ակումբներին առաջնության վերսկսման և անցկացման կարգի վերաբերյալ։ Ֆուտբոլի ֆեդերացիան երկու տարբերակ է առաջարկել․ առաջին տարբերակով առաջարկվել է պահպանել գործող կարգը, իսկ երկրորդ տարբերակով՝ առաջնությունը շարունակել ևս մեկ համարժեք երրորդ փուլով՝ բոլոր ինը թիմերի մասնակցությամբ:
Ավելի վաղ հին ձևաչափին վերադառնալուն դեմ էին արտահայտվել նաև «Շիրակը», «Լոռին» ու «Արարատը», իսկ «Փյունիկի» սեփականատեր Արթուր Սողոմոնյանը ArmSport-ի հետ զրույցում նշել էր, որ իր դիրքորոշումը չեզոք է, թեև սխալ է որակել գործող ձևաչափը։
Ստելլա Բաբլոյան