Աշխարհի 2026 թվականի առաջնության խմբային փուլի երկրորդ տուրը նշանավորվեց մրցաշարի համակազմակերպիչներ Մեքսիկայի և Կանադայի հավաքականների պատմական և տպավորիչ ելույթներով։ Եթե մեքսիկացիներն արդեն ապահովել են իրենց տեղը փլեյ-օֆֆում, ապա կանադացիները դրամատիկ խաղում տարան իրենց պատմության առաջին հաղթանակը Մունդիալներում։
Մեքսիկայի ազգային հավաքականը դարձավ ԱԱ-2026-ի առաջին թիմը, որը պաշտոնապես ապահովեց իր տեղը մրցաշարի փլեյ-օֆֆում: A խմբի երկրորդ տուրում մեքսիկացիները նվազագույն՝ 1:0 հաշվով պարտության մատնեցին Հարավային Կորեային։
Հանդիպման միակ գոլը 50-րդ րոպեին հեղինակեց պաշտպան Լուիս Ռոմոն, ով առաջինը հասավ գնդակին կորեացիների դարպասապահ Կիմ Սին Գյուի և սեփական պաշտպանի բախումից հետո թույլ տված կոպիտ սխալի արդյունքում:
Այս հաղթանակով Մեքսիկայի ընտրանին գրանցեց միանգամից մի քանի ռեկորդ.
Ֆրանսիայի ռեկորդի կրկնություն. ՖԻՖԱ-ի փոխանցմամբ՝ 21-րդ դարում Մեքսիկան դարձավ աշխարհի առաջնության առաջին կազմակերպիչ երկիրը, որը մեկնարկային երկու խաղերում հաղթում է և սեփական դարպասը պահում անառիկ (առաջին տուրում գրանցվել էր 2:0 հաշվով հաղթանակ ՀԱՀ-ի նկատմամբ): Վերջին անգամ նման ցուցանիշ գրանցել էր Ֆրանսիան 1998 թվականին։
Աննախադեպ շարք. ԿՈՆԿԱԿԱՖ-ը ներկայացնող հավաքականն իր պատմության մեջ առաջին անգամ Աշխարհի առաջնություններում անընդմեջ երեք հաղթանակ տարավ (ներառյալ ԱԱ-2022-ում Սաուդյան Արաբիայի նկատմամբ տարած 2:1 հաշվով հաղթանակը):
Տեսանյութը՝ ԱՅՍՏԵՂ
A խմբի աղյուսակն այս պահին
B խմբում իսկական հրավառություն ապահովեց Կանադայի հավաքականը՝ 6:0 հաշվով ջախջախելով Կատարին: Սա կանադացիների պատմական առաջին հաղթանակն էր Մունդիալների եզրափակիչ փուլերում:
«Մենք ցանկանում էինք խաղալ այնպիսի ֆուտբոլ, որը էներգիա կհաղորդեր տրիբունաներին և ցույց կտար մեր տաղանդն ու մենթալիտետը: Մարզադաշտում գտնվող 55 հազար երկրպագուների բախտը բերեց՝ նրանք տեսան ակնառու ելույթ»,- հանդիպումից հետո նշել է Կանադայի գլխավոր մարզիչ Ջեսի Մարշը:
Opta-ի տվյալներով՝ Կանադան դարձավ Եվրոպայից և Հարավային Ամերիկայից դուրս առաջին հավաքականը, որը մեկ խաղում 5 և ավելի գոլ է խփում Աշխարհի առաջնություններում: Հեթ-տրիկ ձևակերպեց Ջոնաթան Դևիդը, մեկական անգամ աչքի ընկան Քայլ Լարինը, Նեյթան-Դիլան Սալիբան, իսկ Մոհամեդ ալ-Մաննաին գնդակն ուղարկեց սեփական դարպասը։
Հանդիպումն անցավ չափազանց կոպիտ պայքարում: Կատարի հավաքականը խաղն ավարտեց 9 հոգով: Եթե 33-րդ րոպեին Հոմամ Ահմեդի հեռացումը դեռ միայն սկիզբն էր, ապա 53-րդ րոպեին տեղի ունեցավ սարսափելին. Ասսիմ Մադիբոյի կոպտագույն խախտման հետևանքով կանադացի կիսապաշտպան Իսմայել Կոնեն ստացավ ոլոքի և նրբոլոքի կոտրվածք: Ֆուտբոլիստին պատգարակով դուրս բերեցին դաշտից, և նա շարքից դուրս մնաց մինչև 5 ամսով:
«Բոլորը լսեցին՝ ինչպես ճրթացին Կոնեի ոսկորները: Ես չեմ դատապարտում ֆուտբոլիստին, բայց ապշած եմ Կատարի պահեստայինների նստարանի պահվածքից, որոնք փորձում էին վիճարկել ակնհայտ կարմիր քարտը»,- ասել է Ջեսի Մարշը: Հատկանշական է, որ ավելի ուշ Մադիբոն մտել է կանադացիների հանդերձարան և ներողություն խնդրել:
Կոնեին փոխարինած Նեյթան-Դիլան Սալիբայի համար սա առաջին խաղն էր ԱԱ-2026-ում: 64-րդ րոպեին նա տուգանայինից ուղիղ հարվածով գրավեց դարպասը, վազեց դեպի պահեստայինների նստարան և տոնեց գոլը՝ գլխավերևում բարձրացնելով վնասվածք ստացած Կոնեի 8 համարի մարզաշապիկը:
Տեսանյութը՝ ԱՅՍՏԵՂ
