Այսօր կկայանան Չեմպիոնների Լիգայի 3-րդ տուրի առաջին 4 խմբերի հանդիպումները: Ձեզ ենք ներկայացնում այսօր կայանալիք հանդիպումների համառոտ անոնսը, խմբերի մրցաշարային աղյուսակները:
A Խումբ
| Ակումբ | Միավոր | |
|---|---|---|
| 1 | ՊՍԺ | 6 |
| 2 | «Բրյուգե» | 2 |
| 3 | «Գալաթասարայ» | 1 |
| 4 | «Ռեալ Մադրիդ» | 1 |
Ինչպես փոխանցում է El Chiringuito-ն Մադրիդի «Ռեալի» նախագահ Ֆլորենտինո Պերեսը «Մալյորկայի» դեմ կայացած մրցավեճից հետո ցանկանում է թիմից հեռացնել գլխավոր մարզիչ Զինեդին Զիդանին: Աղբյուրը նշում է, որ Պերեսը դժգոհ է խաղի որակից, նաև Զիդանի ընտրած մեկնարկային կազմից և քննարկում է Ժոզե Մոուրինյոյին թիմ վերադարձնելու տարբերակը:
Ստացվում է, որ Չեմպիոնների լիգայում թուրքական ակումբի հետ կայանալիք հանդիպումը Ստամբուլում կարող է վերջինը լինել Զիդանի համար՝ «Ռեալի» ղեկին: Շատ բան պարզ կլինի այսօր երեկոյան:
Համենայն դեպս, ՊՍԺ-ին շրջանցել գրեթե անհնար է և ներկա դրությամբ, ամենայն հավանականությամբ, հենց թուրքական ակումբն է համարվում մադրիդյան ակումբի հիմնական մրցակիցը խմբում 2-րդ տեղի համար պայքարում: Սակայն, պետք չէ մոռանալ նաև բելգիական «Բրյուգեին», որը ցույց տվեց Մադրիդում, որ բավականին «ամուր ընկույզ» է:
«Գալաթասարայ»-«Ռեալ Մադրիդ»/ Հոկտեմբերի 22, ժամը 23:00
«Բրյուգե»- ՊՍԺ / Հոկտեմբերի 22, ժամը 23:00
B Խումբ
| Ակումբ | Միավոր | |
|---|---|---|
| 1 | «Բավարիա» | 6 |
| 2 | «Ցրվենա Զվեզդա» | 3 |
| 3 | «Տոտենհեմ» | 1 |
| 4 | «Օլիմպիակոս» | 1 |
Առաջին հայացքից թվում է, որ «Տոտենհեմին» բավականին հեշտ խաղ է սպասվում: Սակայն սերբական ակումբի ֆուտբոլիստներն անցած տուրում ապացուցեցին, որ ունեն բարձր կամային հատկանիշներ: Հաշվի առնելով անգլիացիների մոտ առկա խառնաշփոթը ներքին խոհանոցում՝ մեզ սպասվում է բավականին դինամիկ և, չի բացառվում, անակնկալներով լի հանդիպում:
«Բավարիան» հունական ակումբի հետ արտագնա խաղում պետք է որ խնդիրներ չունենա: Այս խաղում շատերի սպասելիքները սևեռված են այլ ուղղությամբ. կփայլի՞ կրկին Գնաբրին խաղադաշտում:
«Օլիմպիակոս»-«Բավարիա» / Հոկտեմբերի 22, ժամը 23:00
«Տոտենհեմ» – «Ցրվենա Զվեզդա» / Հոկտեմբերի 22, ժամը 23:00
C Խումբ
| Ակումբ | Միավոր | |
|---|---|---|
| 1 | «Մանչեսթեր Սիթի» | 6 |
| 2 | «Դինամո Զագրեբ» | 3 |
| 3 | «Շախտյոր» | 3 |
| 4 | «Ատալանտա» | 0 |
Այս խմբում սպասվում է շատ հետաքրքիր հակամարտություն՝ արևելաեվրոպական դերբի: Դոնեցկյան և բալկանյան թիմերի դիմակայությունը խոստանում է լինել քիչ թե շատ ամենաանկախատեսելին այսօրվա 8 խաղերից: Երկու թիմերը կպայքարեն այս խմբում երկրորդ տեղի համար, քանի որ, դժվար է արդեն հավատալ, որ իտալական ակումբը կարող է փոխել իրավիճակը ապագայում:
Մյուս զույգի դիմակայությունում կարծես թե ֆավորիտն ակնհայտ է: Չնայած «քաղաքայինները» վերջին հանդիպումներում չեն փայլում գերարդյունավետությամբ, պետք չէ մոռանալ նաև «Ատալանտայի» անփույթ խաղի մասին վեջին տուրում, երբ 3-0 հաշվի ժամանակ բերգամոացիները «քթի տակից» բաց թողեցին հաղթանակը: Այնպես որ, այս խաղում կարծես թե սպասվում են շատ գոլեր:
«Շախտյոր»-«Դինամո Զագրեբ» / Հոկտեմբերի 22, ժամը 21:00
«Մանչեսթեր Սիթի» – «Ատալանտա» / Հոկտեմբերի 22, ժամը 23:00
D Խումբ
| Ակումբ | Միավոր | |
|---|---|---|
| 1 | «Յուվենտուս» | 4 |
| 2 | «Աթլետիկո» | 4 |
| 3 | «Լոկոմոտիվ» | 3 |
| 4 | «Բայեր» | 0 |
Անցած տուրում Յուրի Սյոմինի թիմը սենսացիոն հաղթանակ տարավ Լևերկուզենում «դեղագործների» նկատմամբ: Դա, անշուշտ, ցույց է տալիս, որ թերագնահատել «երկաթուղայիններին» պետք չէ: «Լոկոմոտիվը» ՌՊԼ-ում առաջատարն է, ինչպես և «Յուվենտուսը»՝ Ա Սերիայում: Համենայն դեպս, չնայած խաղը կկայանա Թուրինում, «Ծեր սենյորային» հեշտ հանդիպում չի սպասվում:
Մյուս խաղում, «Աթլետիկոն» Մադրիդում կընդունի «Բայերին»: «Դեղագործները» ոչինչ չունեն կորցնելու, սակայն կհաջողվի՞ արդյոք նրանց միավոր բերել Իսպանիայից, դա կիմանանք այսօր երեկոյան…
«Աթլետիկո» – «Բայեր» / Հոկտեմբերի 22, ժամը 21:00
«Յուվենտուս» – «Լոկոմոտիվ» / Հոկտեմբերի 22, ժամը 23:00
