Մադրիդի «Ռեալը» պաշտոնապես հայտարարել է թուրք կիսապաշտպան Արդա Գյուլերի հետ պայմանագրի ժամկետը երկարաձգելու մասին։ Կողմերի միջև կնքված նոր երկարաժամկետ համաձայնագիրը նախատեսված է մինչև 2032 թվականի հունիսի 30-ը։
21-ամյա ֆուտբոլիստը «արքայական» ակումբ է տեղափոխվել 2023 թվականի հուլիսին Ստամբուլի «Ֆեներբահչեից»՝ 18 տարեկան հասակում։ Այս ընթացքում նա մադրիդյան գրանդի մարզաշապիկով անցկացրել է 126 հանդիպում՝ դառնալով 22 գոլի և 32 գոլային փոխանցման հեղինակ։ «Ռեալի» կազմում Գյուլերն արդեն հասցրել է նվաճել 5 տիտղոս՝ Չեմպիոնների լիգան, Աշխարհի ակումբային առաջնությունը, ՈւԵՖԱ-ի Սուպերգավաթը, ինչպես նաև Իսպանիայի առաջնությունն ու Սուպերգավաթը։
2026/27 մրցաշրջանում Գյուլերը վերջնականապես ամրապնդել է իր դիրքերը «սերուցքայինների» մեկնարկային կազմում՝ ստանձնելով թիմի հարձակողական խաղի կազմակերպման առանցքային դերը։ Ընթացիկ մրցաշրջանում նա բոլոր մրցաշարերում մասնակցել է 14 հանդիպման՝ իր ակտիվում գրանցելով 4 գոլ և 6 գոլային փոխանցում (որից 3 գոլը և 4 ասիստը՝ Լա լիգայի 12 խաղում)։
Կիսապաշտպանը նաև Թուրքիայի ազգային հավաքականի առաջատարներից է, որի կազմում արդեն 38 հանդիպում է անցկացրել։ Հատկանշական է, որ 2026 թվականի սեպտեմբերին նա ճանաչվել էր Չեմպիոնների լիգայի 2025/26 մրցաշրջանի լավագույն երիտասարդ ֆուտբոլիստ։
Իսպանական Cadena SER-ի և AS-ի հաղորդմամբ՝ թեև ֆուտբոլիստի նախորդ պայմանագիրն ուժի մեջ էր մինչև 2029 թվականը, ակումբի ղեկավարությունը որոշել է վաղօրոք գնահատել նրա տպավորիչ առաջընթացը։
Նոր համաձայնագիրը ոչ միայն երեք տարով երկարաձգում է համագործակցությունը, այլև ենթադրում է աշխատավարձի զգալի բարձրացում։ Այս քայլով մադրիդցիները նաև կանխում են եվրոպական այլ թոփ-ակումբների հնարավոր ոտնձգությունները իրենց երիտասարդ առաջատարի նկատմամբ։




























































