«Օռլանդո Սիթիի» և Ֆրանսիայի ազգային հավաքականի նախկին հարձակվող Անտուան Գրիզմանը շարունակում է փայլել Հյուսիսային Ամերիկայի գլխավոր ֆուտբոլային լիգայում։ 35-ամյա ֆուտբոլիստը պաշտոնապես ճանաչվել է 2026 թվականի մրցաշրջանի լավագույն նորեկ՝ արժանանալով հեղինակավոր անհատական մրցանակին։
Աշխարհի 2018 թվականի չեմպիոնը բացահայտ առավելություն է ունեցել քվեարկության բոլոր երեք խմբերում՝ առաջ անցնելով մրցակիցներից թե՛ լրագրողների, թե՛ MLS-ի ֆուտբոլիստների և թե՛ ակումբների մարզչական շտաբների հարցումներում։ Ընդհանուր հաշվարկով Գրիզմանը հավաքել է ձայների 51,02 տոկոսը՝ զգալիորեն գերազանցելով երկրորդ տեղը զբաղեցրած «Հյուսթոն Դինամոյի» կիսապաշտպան Գիլերմեին (25,12%) և երրորդ հորիզոնականում հայտնված «Սպորտինգ Կանզաս Սիթիի» հարձակվող Անդրե Լուիշին (6,19%)։
Գրիզմանն ամերիկյան ակումբին միացել էր այս տարվա մարտի 24-ին, իսկ MLS-ում իր նորամուտը նշել հուլիսի 22-ին։ Չնայած մրցաշրջանի կեսից պայքարի մեջ մտնելուն՝ ֆրանսիացին հասցրել է ֆանտաստիկ արդյունավետություն ցուցադրել։ Կանոնավոր առաջնության 18 հանդիպումներում նա դարձել է 14 գոլի և 8 գոլային փոխանցման հեղինակ՝ անմիջական մասնակցություն ունենալով իր թիմի 22 գոլային գրոհներին (ակումբի խփած 63 գոլերի շուրջ 33 տոկոսին) և օգնելով «Օռլանդո Սիթիին» նվաճել փլեյ-օֆֆի ուղեգիր։
Հատկանշական է, որ 20 արդյունավետ գործողության սահմանագծին հասնելու համար ֆրանսիացուն պահանջվել է ընդամենը 15 հանդիպում։ Այս ցուցանիշով նա դարձել է MLS-ի պատմության երկրորդ ամենաարագ ֆուտբոլիստը՝ զիջելով միայն «Ինտեր Մայամիի» արգենտինացի հարձակվող Լիոնել Մեսսիին, որին նույն արդյունքին հասնելու համար անհրաժեշտ էր եղել 14 խաղ։
Այս հաջողությամբ Անտուան Գրիզմանը միանգամից մի քանի պատմական նվաճում է գրանցել.
- Նա դարձել է պատմության մեջ առաջին ֆրանսիացի ֆուտբոլիստը և «Օռլանդո Սիթիի» առաջին ներկայացուցիչը, որն արժանանում է MLS-ի լավագույն նորեկի կոչմանը։
- Գրիզմանն աշխարհի չեմպիոնի տիտղոս ունեցող երկրորդ խաղացողն է, որը նվաճում է այս պարգևը՝ արգենտինացի Տիագո Ալմադայից հետո (2022 թ.)։
- Բացի այդ, հարձակվողը ճանաչվել է նաև MLS-ի հոկտեմբեր-նոյեմբեր ամիսների լավագույն ֆուտբոլիստ՝ դառնալով ամսվա լավագույնի մրցանակին արժանացած առաջին ֆրանսիացին 2012 թվականի մարտից ի վեր, երբ պատվավոր կոչումը ստացել էր լեգենդար Թիերի Անրին։
Հիշեցնենք, որ մինչև օվկիանոսից այն կողմ տեղափոխվելը Անտուան Գրիզմանը փառահեղ կարիերա է անցկացրել Իսպանիայում՝ պաշտպանելով «Ռեալ Սոսյեդադի», «Բարսելոնայի» և Մադրիդի «Ատլետիկոյի» գույները, իսկ Ֆրանսիայի հավաքականի կազմում դարձել է աշխարհի չեմպիոն (2018 թ.) և Եվրոպայի առաջնության փոխչեմպիոն (2016 թ.)։



























































