Ֆան-խանութի բացը Հայաստանում վաղուց կար․ Արթուր Մինասյան

Աշխարհի շատ երկրներում սպորտային մշակույթի մաս են կազմում ֆան-խանութները։ Հայաստանի մարզասերներին միայն վերջերս է ընձեռնվել հնարավորություն՝ ձեռք բերելու սիրելի ակումբների մարզաշապիկներ և այլ սպորտային ատրիբուտներ։

Այս ամսվա սկզբին Rio Mall-ում բացված Arena Sport ֆան-խանութի նախագծի հեղինակն է գործարար Արթուր Մինասյանը։ Ինչպես ինքն է նշում, առաջին հերթին ֆուտբոլի մեծ սիրահար է, ապա նոր գործարար։

Արթուրի հետ զրուցել ենք Arena Sport-ի ստեղծման գաղափարի, ինչպես նաև ֆան-խանութին վերաբերվող հետագա ծրագրերի մասին։

-Արթուր, ինչպե՞ս առաջացավ այս նախագիծը կյանքի կոչելու գաղափարը։

-Ամեն ինչի հիմքը կարելի է համարել 2011 թվականին կայացած Հայաստան-Ռուսաստան հանդիպումը։ Սկսած այդ խաղից՝ ազգային հավաքականի տնային հանդիպումների ժամանակ ՀՖՖ-ի հետ համագործակցելով փոքրիկ ֆան-տաղավարներ ենք տեղադրել։ Ի դեպ, առաջիկա ընկերական հանդիպմանը ևս կներկայացնենք նոր տաղավար՝ արդեն Arena Sport-ի մոտիվներով։

Կոնկրետ խանութ բացելու գաղափարը վաղուց եմ ունեցել։ Մի քանի անգամ FAF-ի (Հայաստանի հավաքականի ֆան-ակումբ) հետ մեկնել եմ արտագնա հանդիպումների։ Այդ այցերի ընթացքում ինձ միշտ գրավել են տարբեր երկրներում գտնվող ֆան-խանութները։ Զգում էի, որ Հայաստանում կա այդպիսի խանութ ունենալու «բացը», պարզապես պետք է հասունանար պահը։ Այս նախաձեռնությունը միայնակ եմ կյանքի կոչել՝ իհարկե համագործակցելով ՀՖՖ-ի և բոլոր ակումբների հետ։ Նախագիծը, որպես բիզնես պատկանում է միայն ինձ, բայց ցանկանում եմ նշել, որ առաջնային նպատակ չեմ հետապնդում շահույթ ստանալը։ Այս ամենը մեծ սիրով եմ կազմակերպել։

-Խանութը միայն ֆուտբոլային ակումբների՞ն է նվիրված, թե՞ այլ մարզաձևեր ևս ներառվում են։

-Մեր համագործակցությունը նաև բասկետբոլի և վոլեյբոլի ֆեդերացիաների հետ է։ Այնպես որ ներառել ենք ինչպես ֆուտբոլի, այնպես էլ բասկետբոլի և վոլեյբոլի հավաքականներին։

-Բացի ակումբներից ստացած թույլտվությունը, որի համաձայն կարող եք վաճառել վերջիններիս մարզահագուստները և այլն, հետագայում ի՞նչ նորամուծություններ են սպասվում։ Կխնդրեմ՝ մի փոքր բացեք փակագծերը։

-Երբ ակումբներին առաջարկեցի համագործակցություն սկսել, ի ուրախություն ինձ, բոլորը ողջունեցին գաղափարը։ Կարևոր է, որ ակումբները այս ամենին նայում են ոչ կոմերցիոն հայացքներով, այսինքն, իրենց համար ևս կարևոր է, որ մարզահագուստները և ատրիբուտները հնարավորինս լայն տարածում գտնեն։ Եվս մեկ անգամ ցանկանում եմ ընդգծել, որ ինձ համար սա տարերք է, և մեծ ցանկություն ունեի սկսել նախագիծը, շփվել ֆուտբոլային ոլորտի ներկայացուցիչների հետ։ Ավելի շատ շեշտադրում եմ ֆուտբոլային մշակույթը, ոչ թե բիզնեսը։

Հետագա պլանների և նորամուծությունների հետ կապված՝ մեր խանութում ակումբները կարող են անցկացնել նոր ֆուտբոլիստների շնորհանդես և նմանատիպ միջոցառումներ։ Խանութի ինտերիերը շատ յուրահատուկ է և իրապես համապատասխանում է նմանատիպ միջոցառումներ անցկացնելու չափորոշիչներին։

-Տեսեք, օրինակ, «Ուրարտուն» հաճախ տնային հանդիպումների ժամանակ խաղարկություններ է կազմակերպում։ Արդյոք նախատեսվու՞մ են ձեր կողմից նմանատիպ խաղարկություններ խանութում, կամ միգուցե մարզադաշտերում։

-Մինչև բուն հարցին անդրադառնալը ցանկանում եմ նշել, որ «Ուրարտուն» ամենատարբերվող ակումբներից է, որը մշտապես ուշադրություն է դարձնում երկրպագուներին, ինչպես նաև ֆան-մշակույթին։ Ինչ խոսք, դա շատ գովելի է և աչքի է զարնում։

Խաղարկությունների հետ կապված՝ եթե անկեղծ լինեմ, այնքան էլ չեմ նախընտրում այդ ուղղությամբ ակտիվ լինել։ Միգուցե դա նրանից է, որ շատ տարածված են նմանատիպ խաղարկությունները։ Ես ավելի շատ նախընտրում եմ «դաշտ» բերել նորամուծություններ։ Չեմ բացառում, որ ապագայում մենք էլ երբեմն կկազմակերպենք խաղարկություններ, բայց ավելի շատ հակված եմ նոր և հետաքրքիր միջոցառումներ կազմակերպելուն։

-Բացի մարզաշապիկներից և ատրիբուտներից, ուրիշ ի՞նչ առաջարկություններ ունեք հաճախորդների համար։

-Խանութը շուտով կհամալրվի սպորտային մի քանի բրենդներով, որոնք Հայաստանում այնքան էլ տարածված չեն։ Ընթացքում հաճախորդներն անձամբ կթելադրեն իրենց ցանկությունը, ըստ որի էլ կհասկանանք՝ ավելի շատ ինչպիսի ապրանքներ են նախընտրում։ Փորձելու ենք ամեն ինչ անել, որպեսզի կարողանանք բավարարել մարզասերների պահանջները։

-Մի քանի օր է, ինչ բացվել է խանութը։ Այնուամենայնիվ, ինչպիսի՞ արձագանք կա հաճախորդների շրջանակում։ Սկզբնական հատվածում գոհացնու՞մ է այցելուների ակտիվությունը։

-Վստահաբար կարող եմ ասել, որ միայն դրական արձագանքներ ենք ստանում։ Անգամ սպասելիքներիցս ավելի ակտիվ են հաճախորդները։ Ճիշտն ասած, եղանակային պայմաններից ելնելով, կարծում եմ հիմա մի փոքր հանգիստ փուլ է ամեն դեպքում։ Քանի որ մեծամասամբ մարզաշապիկներ ենք վաճառում, կարծում եմ՝ եղանակները տաքանալուն պես եղած ակտիվությունը էլ ավելի կմեծանա։ Այցելուների պակաս այժմ էլ չունենք, պարզապես տաք եղանակային պայմաններում, համոզված եմ՝ ավելի կշատանան նաև գնումները։

Սուրեն Մելիքսեթյան