Մարմնամարզության Հայաստանի հավաքականի գլխավոր մարզիչ Հակոբ Սերոբյանը լրագրողների հետ հանդիպման ժամանակ ամփոփել է Գերմանիայի Կոտբուս և Քաթարի Դոհա քաղաքներում անցկացված աշխարհի Գավաթի խաղարկությունների երկու փուլերը՝ նշելով, որ բավականին գոհ է մեր մարմնամարզիկների ցուցադրած արդյունքներից:
Հայ մարմնամարզիկներն ընդհանուր առմամբ 5 մեդալ են նվաճել Աշխարհի Գավաթի երկու փուլերում.
«Միջազգային կանոնադրության մեջ որոշակի փոփոխություններ են կատարվել՝ կապված թե՛ վարժությունների, թե՛ տարրերի հետ: Նաև առաջին անգամ է, որ Աշխարհի Գավաթի մրցումներին մենք պետք է միավորներ վաստակենք, որպեսզի կարողանանք մասնակցել Փարիզում կայանալիք աշխարհի առաջնությանը: Մեր նպատակը հենց սա էր: Աշխարհի Գավաթի 4 փուլ է անցկացվելու՝ իրար հետևից: Երկուսին մասնացկեցինք, մարտի 15-ին էլ կմեկնենք Կահիրե՝ երրորդ փուլին մասնակցելու համար: Վերջին փուլը տեղի կունենա Բաքվում, որին չենք մասնակցելու:
Բացի այդ, ամռանն անցկացվելու է Եվրոպայի թիմային առաջնությունը, ու մենք սկսեցինք հենց տարեսկզբից միավորներ հավաքել՝ ԵԱ-ին մասնակցելու համար: Մենք առանձին գործիքներից ենք ուժեղ ու թերևս հենց առանձին գործիքների վրա էլ կմասնակցենք:
Շատ հաջող հանդես եկանք աշխարհի Գավաթի երկու փուլերում: Արթուր Դավթյանն ու Վահագն Դավթյանն արդեն հավաքել են միավորները ու կմասնակցեն Եվրոպայի թիմային առաջնությանը: Հարություն Մերդինյանն ու Արթուր Ավետիսյանը բավականին բարձր միավորներ ունեն ու կարծում եմ՝ նրանք էլ կլինեն:
Մերդինյանի պարագայում Կահիրեի մրցաշարը կարևոր է, քանի որ Կոտբուսի մրցաշարը բաց թողեց, միավորների պակաս կա: Առհասարակ շատ ուրախ եմ Մերդինյանի համար: Հարությունն արդեն ուզում էր ավարտել կարիերան: Ուրախ եմ նրա համար: Շատ լավ արդյունք գրանցեց:
Կոտբուսում բավականին մեծ մրցակցություն կար առանձին գործիքների վրա: Դոհայում էլ հիանալի ելույթ ունեցանք»,- ասել է Հակոբ Սերոբյանը
Հակոբ Սերոբյանն ընդգծում է՝ Փարիզ-2024-ին ընդառաջ օլիմպիական այս ցիկլն Արթուր Դավթյանինն է լինելու. «Օլիմպիական այս ցիկլը Դավթյան Արթուրինն է լինելու: Վստահ եմ՝ հիանալի ելույթներ կունենա: Պետք է անի այն, ինչ կարողանում է՝ յուրաքանչյուր մրցմանը: Մրցակիցներն իմացան, որ Արթուրը մասնակցելու է աշխարհի գավաթի եզրափակչին , հրաժարվեցին մասնակցել»:
Սերոբյանն ասում է՝ այն, որ Բաքվի աշխարհի Գավաթի փուլին չենք մասնակցելու, որևէ կերպ չի ազդի մեր արդյունքների վրա. «Բաքվի մրցմանը չենք մասնակցի, բայց դա մեզ ոչնչով չի խանգարի: Հենց սկզբում մենք մեր անելիքն արեցինք, Կահիրեի մրցմանն էլ տղաները լավ հանդես կգան, վստահ եմ, ու կհավաքեն անհրաժեշտ միավորները:
Կահիրեի մրցաշարին մասնակցելու են Արթուր Դավթյանը, Արթուր Ավետիսյանը, Վահագն Դավթյանը և Հարություն Մերդինյանը: Գագիկ Խաչիկյանը չի մասնակցի»:
Խոսելով Փարիզ-2024-ի նախապատրաստության մասին՝ Հակոբ Սերոբյանն ասում է՝ դեռ վաղ է ասել, թե քանի մարզիկով կմասնակցեն.
«Չեմ կարող ասել, թե քանի հոգով կմասնակցենք Փարիզի խաղերին: Պատրաստվում ենք, թե ինչ կլինի, եկեք չշտապենք: Մենք ամեն ինչ կանենք: Ուզում ենք մեդալի գույնը փոխել: Դավթյան Արթուրի շանսերը շատ մեծ են, դա բոլորն են տեսնում»:
Հավաքականի գլխավոր մարզչի խոսքով, ունենք լավ երիտասարդներ, ովքեր կարող են փոխարինել ավագ սերնդին.
«Ունենք երիտասարդներ, Եվրոպայի առաջնությանը պետք է մեկնենք թիմով: Ունենք 14 տարեկան տղա, ով եթե մասնակցեր աշխարհի Գավաթին, վստահաբար եզրափակիչ դուրս կգար նժույգաթափերի վարժությունում: Ամեն ինչ անում ենք՝ ես ու մեր տղաները, ովքեր երիտասարդներին տանում են իրենց հետևից, որպեսզի փոխարինող լավ սերունդ ունենանք: Մերդինյանը թիմի ավագն է, Դավթյանն առաջատարի այլ որակներ ունի: Անգամ Քաթարի աշխարհի Գավաթում Դավթյանն էր մարզչի դեր տանում, քանի որ մարզիչ Հայկ Նազարյանը չգիտես՝ ինչ պատճառով վիզա չստացավ ու Գերմանիայից չկարողացավ մեկնել Դոհա: Իրար օգնեցին ու հաջողության հասանք»,- ասում է Հակոբ Սերոբյանը:
Հավաքականի գլխավոր մարզիչն ասում է՝ լավ ապագա ունենալու համար շատ կարևոր է ունենալ նոր դահլիճ ու նոր գործիքներ, բայց մարզչի խոսքով, նոր մարզադպրոցի կառուցման աշխատանքների վերաբերյալ դեռ որևէ նորություն չունեն: Կարծես՝ ոչինչ տեղի չի շարժվում:
Նշենք՝ մարմնամարզության Հայաստանի հավաքականը մարտի 15-ին է մեկնելու Կահիրե՝ Աշխարհի Գավաթի խաղարկության երրորդ փուլին մասնակցելու համար:
