«Բարսելոնայի» նոր նախագահ Ժոան Լապորտան իր երդմնակալության ժամանակ թիմի ավագ Լիոնել Մեսսիին խնդրել է մնալ «Կամպ Նոուում»։
«Իմ առաջին նախագահության ժամանակ մենք «Բարսելոնայի» պատմության լավագույն խաղացողներն ենք ունեցել, բայց եթե հասել ենք հաջողության, ապա միայն որովհետև կայունթյուն ենք ունեցել։ «Բարսելոնայի» միասնությունը քաղաքին կայունություն է տալիս, ու ես Բարսելոնայում բոլորին հրավիրում եմ մտածել այն մասին, թե ինչ կարող են անել նրանք «Բարսայի» համար։
Ես այստեղ եմ, որ կարևոր որոշումներ կայացնեմ։ Օրինակ, համոզեմ Լիոնել Մեսսիին մնալ մեզ մոտ։ Ես հիմա օգտվում եմ այն փաստից, որ նա այստեղ է։ Ու նա գիտի, թե ինձ համար որքան կարևոր է, որ նա մնա։ Լեո, դու գիտես, թե ես քեզ որքան եմ սիրում։ Մենք հնարավոր ամեն բան կանենք, որ քեզ պահենք այստեղ։ Գիտես, որ չես կարող հեռանալ։ Մենք դա մենակ չենք կարող անել։ Ինչպես ասվում է մեր օրհներգում՝ մենք բոլորս միասին ուժեղ ենք։ Հատկապես այս դժվարին ժամանակներում։ Մենք գիտենք՝ ինչպես անել դա։
Երբ համավարակն ավարտվի, մեր եկամուտները կվերադառնան։ Սա կշտկվի։ Մենք ուժեղ ղեկավարություն կունենանք, որովհետև ինձ շրջապատում են իսկական պրոֆեսիոնալներ։ Մենք կշռադատված որոշումներ կկայացնենք։ Ակումբը պաշտպանելու համար պետք է ապրել ու շնչել դրանով, ու մենք դա անում ենք հնարավորինս հաճախ»,- Լապորտայի խոսքերն է փոխանցում Goal-ը։