Հայաստանի առաջատար հեծանվորդ Էդգար Ստեփանյանը հոկտեմբերի 16-ից 21-ը Հոլանդիայում կմասնակցի մեծահասակների Եվրոպայի առաջնությանը։ Ամիսներ առաջ ստացած ձեռքի կոտրվածքից հետո Էդգարն այժմ ոչ լիարժեք մարզավիճակում է գտնվում, բայց մարզումներ են անցկացնում այն բարելավելու և լավացնելու համար։
Այս մասին ArmSport-ի հետ զրույցում հայտնել է հեծավորդի անձնական մարզիչ Արմեն Գյոզալյանը։
«Հիմա մարզումներ ենք իրականացնում, որպեսզի Էդգարը լավ մարզավիճակ հավաքի։ Նախքան Եվրոպայի առաջնությունը՝ հոկտեմբերի 1-ից, ուսումնամարզական հավաք կանցկացնենք Օլիմպավանում։ Չեմ սիրում ժամանակից շուտ կանխատեսումներ անել, խոսել սպասելիքների մասին։ Համենայն դեպս, երբ մասնակցել ենք, փորձել ենք ամեն ինչ անել լավ արդյունքներ գրանցելու ու լավ հանդես գալու համար»,- մեզ հետ զրույցում նշել է Արմեն Գյոզալյանը։
Այս տարին այնքան էլ հաջող չդասավորվեց մեր առաջատար հեծանվորդի համար․ Էդգարը, ձեռքի կրկնակի կոտրվածքով մասնակցելով Եվրոպական խաղերին, վերջին՝ 16-րդ տեղը զբաղեցրեց սկրետչում, բժիշկների թույլտվությամբ չմասնակցեց խմբակային մրցավազքին ու չկարողացավ հատել եզրագիծը Point race մրցաձևում։
Արմեն Գյոզալյանն ասում է՝ հիմա իրենք աշխատում են կորցրածը հետ բերելու ու ԵԱ-ին լավ մասնակցելու համար։
«Վնասվածքի պատճառով այդքան աշխատանքը, կարելի է ասել, ջուրը լցվեց, բայց Էդգարն այն մարզիկներից չէ, որ կոտրվի։ Իհարկե, լավ չստացվեց, որ այդպես եղավ, բայց շարժվում ենք առաջ, որ հետագա անելիքներն ավելի լավ կատարենք»,- նշում է մարզիչը։
Դեռևս պարզ է միայն, որ Էդգարի միավորների պաշարը բավարար է Եվրոպայի առաջնության սկրետչ մրցաձևին մասնակցելու համար, իսկ թե խմբակային մրցավազքին ու օմնիումին մասնակցելու հնարավորություն կստանա՞ մեր հեծանվորդը, թե՞՝ ոչ, հայտնի չէ։ Ի դեպ, Եվրոպայի այս առաջնությունում վարկանիշային է միայն օմնիում մրցաձևը։
«Այժմ կենտրոնացած ենք միայն Եվրոպայի առաջնության վրա։ Քայլ առ քայլ առաջ ենք շարժվում ու հետագա անելիքների մասին կմտածենք միայն ԵԱ-ից հետո։ Ամեն ինչ արվեց Էդգարի բուժման համար։ Փառք Աստծո, այդ վիճակն ավարտվեց, չնայած երբեմն վնասվածքն իրեն զգացնել տալիս է՝ կապված եղանակի հետ։ Բավականին բարդ կոտրվածք էր, որը հեշտ անցնողներից չէ։ Ամեն դեպքում, տրամադրվածությունը մարտական է։ Կաշխատենք ամեն ինչ անել՝ երկրպագուներին ուրախացնելու համար»,- ասում է Արմեն Գյոզալյանը։
Հիշեցնենք՝ Էդգար Ստեփանյանը նախորդ տարի դարձել էր Մ23 տարեկանների Եվրոպայի չեմպիոն։
