Կորոնավիրուսով պայմանավորված դադարից հետո մարզական աշխարհը հետզհետե փորձում է ուշքի գալ: Հետաձգված կամ չեղարկված մրցումներ կան առանց բացառության բոլոր մարզաձևերում: Հեծանվավազք մարզաձևում այս տարի սպասվող Եվրոպայի առաջնությունը, ինչպես նաև մի շարք միջազգային մրցաշարեր նույնպես հետաձգվեցին անորոշ ժամանակով: Հայաստանի ուժեղագույն հեծանվորդ Էդգար Ստեփանյանը արտակարգ դրության սկզբնական հատվածում մարզվում էր տանը՝ հեծանվադազգի վրա, այնուհետև սկսեց մարզվել նաև խճուղում.
«Միջազգային մրցաշարեր կային, որոնց պետք է մասնակցեի: Ես միշտ մարզվում եմ և փորձում եմ պահպանել մարզավիճակս: Երբ հայտնի դառնան մրցաշարերի անցկացման ժամկետները, կսկսեմ դրանց նախապատրաստվել»,-ArmSport-ի հետ զրույցում ասաց Ստեփանյանը:
Մարզիկի խոսքով այս դադարը բացասական հետք կթողնի, սակայն ամեն ինչ ժամանակի ընթացքում կկարգավորվի. «Այս տարի ոչ մի մրցաշարի չեմ մասնակցել, որն անկասկած, որոշակի բացասական ազդեցություն կունենա, բայց ինչ արած, խնդիրն ամբողջ աշխարհում է, և մեզ մնում է սպասել, մինչև ամեն ինչ կարգավորվի: Մարզավիճակս բնականաբար մրցակցային չէ, քանի որ դեռ կոնկրետ մրցաշարեր չկան, որ նախապատրաստվեմ»:
Հրապարակային հեծանվավազքի Եվրոպայի երիատասարդական առաջնության հաղթող, 2014 թվականի աշխարհի երիտասարդների առաջնության բրոնզե մեդալակիր Էդգար Ստեփանյանը նախորդ տարի ձեռքի կոտրվածք ստացավ Մոսկվայի մրցաշարում, որի պատճառով բաց թողեց երկու ամիս.
«Մրցաշարերից մեկի ժամանակ ձեռքս կոտրեցի երկու տեղից: Վերականգնվելու համար պահանջվեց 2 ամիս: Հիմա ամեն ինչ նորմալ է՝ նույնիսկ չեմ հիշում, թե որ ձեռքս էր»(ծիծաղում է):
23-ամյա մարզիկը բաց թողեց Տոկիո-2020-ի վարկանիշային մրցաշարերը, պատճառը, Ստեփանյանի խոսքով, միայն վնասվածքը չէր.
«Ֆեդերացիայի բյուջեն չի բավականացնում, որ մասնակցեմ բոլոր վարկանիշային մրցաշարերին: Մասնակցում եմ այնքան, որքան որ բյուջեն թույլ է տալիս: Օլիմպիական խաղերին մասնակցելու իրավունք են ստանում 24 լավագույն վարկանիշ ունեցող երկրները: Ես մեր երկիրը ներկայացնում եմ միայնակ, իսկ երկրներ կան, որտեղից միանգամից 3 մարզիկ է մասնակցում: Այսինքն, ես կարող եմ տվյալ մրցաշարում գրավել առաջին տեղը, բայց կոնկրետ մի երկիր ներկայացնող մարզիկները ինձնից վատ հանդես գան, սակայն հանրագումարով ավելի շատ միավոր վաստակեն:
Այո ես ձեռքիս վնասվածքի պատճառով բաց եմ թողել երկու ամիս, բայց ամեն ինչ պետք չէ կապել վնասվածքի հետ: Մինչև վնասվածք ստանալն էլ կային մի շարք վարկանիշային մրցաշարեր, որոնց չեմ մասնակցել: Իսկ այդ երկու ամսվա ընթացքում եղել է ընդամենը 3 մրցաշար: Պետք չէ ամեն ինչ կապել վնասվածքի հետ: Ֆինանսը նույնպես մեծ դեր ունի: Ես չպետք է գումար հայթայթեմ, որ մասնակցեմ վարկանիշային մրցաշարերի: Ես ոչ մեկին չեմ մեղադրում, ես մարզիկ եմ և զբաղվում եմ իմ աշխատանքով, բայց իրականությունը դա է»,-ասաց Ստեփանյանը:
ՀԳ. Հավելենք, որ Օլիմպիական վարկանիշային մրցաշարերը մեկնարկել են 2019 թվականի փետրվարից: Մարզաձևում Օլիմպիական վարկանիշ ձեռք բերելու համար հաշվի է առնվում շուրջ 50 մրցաշարերում մարզիկի ձեռք բերած վարկանիշների հանրագումարը: Այս տարի Եվրոպայի առաջնությունը նախատեսված էր անցկացնել օգոստոսին: