Մենք շեշտը դնում ենք տեղացի ֆուտբոլիստների վրա. Արմեն Պետրոսյան

Մայիսի 23-ին կվերսկսվի ֆուտբոլի Հայաստանի Բարձրագույն խմբի առաջնությունը: Առաջնությունում տեղի կունենա ևս մեկ տուր, որից հետո լավագույն վեցնյակում ընդգրկված թիմերը կպայքարեն մրցանակային տեղերի համար: Առաջիկա տուրը բաց կթողնի մրցաշարային աղյուսակը եզրափակող «Գանձասար-Կապանը»: Ըստ խաղացանկի՝ կապանյան թիմի մրցակիցը պետք է լիներ Երևանի համանուն թիմը, սակայն աշնանային հատվածից հետո «Երևանը» հրաժարվեց շարունակել ելույթները ԲԽ-ում:

ArmSport-ի հետ զրույցում «Գանձասար-Կապանի» գլխավոր մարզիչ Արմեն Պետրոսյանը խոսել է կորոնավիրուսի համավարակով պայմանավորված դադարի, ֆուտբոլիստների մարզավիճակի, ընթացիկ մրցաշրջանում թիմի անհաջող ելույթների և այլ թեմաների մասին:

-Ինչպե՞ս են ընթանում մարզումները։

-Մարզումներն ընթանում են բնականոն հունով: Ապրիլի 25-ից սկսել ենք մարզումները: Թիմը 60-70 տոկոսով պատրաստ է: Անցկացրել ենք 3 ընկերական խաղ: Եվս մեկը կունենանք մոտ ժամանակներս: Ինտենսիվությունը շատ բարձր է: Հիմա ֆուտբոլիստներին թեթևություն է պետք, որպեսզի ավելի լավ մոտենան առաջիկա խաղերին:

Քանի որ չենք հայտնվել լավագույն վեցնյակում, հաճախակի ենք անցկացնելու ստուգողական խաղեր: Աշխատելու ենք այնպես անել, որ հաճախակի անցկացնենք ընկերական խաղեր, քանի որ հնարավոր է առաջնության մնացած ժամանակահատվածի հանդիպումներն անցկացվեն 10 օրը մեկ:

—Ի՞նչ կարծիք եք կազմել արդեն կայացած ընկերական խաղերից հետո։

-Ընկերական խաղերը զուտ ընկերական չեն, այլ ստուգողական: Մարտավարական սխեմաներ ենք ստուգում և փորձարկումներ ենք անում տարբեր դիրքերում: Մենք թիմին, իհարկե, ծանոթ ենք և վարանումների մեջ շատ չենք ընկնում: Ավելի հստակեցնում ենք մեր մարտավարությունը: Անպես չէ, որ մենք մարզումները սկսել ենք զրոյից: Ֆուտբոլիստներին անհատական հանձնարարություններ են տրված եղել: Ի շնորհիվ նրանց պրոֆեսիոնալիզմի՝ այսօր մեր թիմը գտնվում է լավ վիճակում:

-Պատրա՞ստ եք առաջնության վերսկսմանը:

-Բնականաբար այն տոնուսը չկա, որը պետք է լիներ առաջնության այս հատվածում: Աս դադարն ազդում է բոլորի վրա, այնպես չէ, որ միայն մենք ենք: Իմ ֆուտբոլիստի կարիերայի ընթացքում էլ չի եղել այսպիսի բան: Այստեղ ամենակարևորը մարզիչների ճիշտ աշխատանքն ու ֆուտբոլիստների պրոֆեսիոնալիզմն է: Ամեն ինչ հնարավոր է փոխել ի օգուտ մեզ:

-Ի՞նչն է թիմի անհաջող ելույթների պատճառն ընթացիկ մրցաշրջանում:

-Մենք հենց առաջնության մեկնարկից կորցրեցինք մեր կարևոր ֆուտբոլիստներից մեկին՝ Գեղամ Հարությունյանին, բայց չեմ ուզում ամեն ինչ կապել նրա հետ: Սկսել ենք ավելի շատ տեղ տալ հայ ֆուտբոլիստներին: Մենք ոչ մի պատճառաբանություն չենք փնտրում: Թիմը կառուցելու համար պետք է շուրջ 3 տարի: Մեկ տարվա ընթացքում հասել ենք մեր ուզածին՝ ֆուտբոլիստները հասկանում են մեզ: Մի քանի օղակում համալրումներ ունենալու դեպքում մենք կարող ենք պայքարել ավելի բարձր տեղերի համար: Չմոռանանք, որ Գավաթի պատասխան խաղ ունենք «Արարատ-Արմենիայի» հետ: Ես ուզում եմ հայ ֆուտբոլիստների հետ հասնել առավելագույնի: «Գանձասար-Կապանում» միշտ էլ եղել են մեծ թվով լեգիոներներ, բայց մենք այս տարի մտածեցինք, որ ավելի շատ հայ ֆուտբոլիստների հետ աշխատենք: Ես որախ եմ, որ ունենք նման հայ ֆուտբոլիստներ: Նրանք տալիս են մաքսիմումը: Բականաբար, մեր տեղը մրցաշարային աղյուսակի վերջին հորիզոնականը չէ, մենք դա լավ հասկանում ենք: Մեր թիմը շատ մեծ պոտենցիալ ունի:

 -Ի՞նչ կասեք առաջնության այս ձևաչափի մասին:

-Մենք առաջնության մեկնարկից էլ դեմ էինք այս ձևաչափին: Հիմա, բնականաբար, շարունակում ենք մնալ մեր կարծիքին: Մնացած ակումբներն էլ իրենց կարծիքն ունեն, ամեն դեպքում վերջնական որոշումը ֆեդերացիայինն է: Լավ կլիներ, որ առաջնության մյուս հատվածում նույնպես խաղայինք բարձր տեղերի թիմերի հետ: Իմ ֆուտբոլիստի կարիերայի ընթացքում եղել են դեպքեր, երբ առաջնության սկզբնական հատվածում եղել ենք մրցաշարային աղյուսակի ստորին մասում, բայց արձակուրդից հետո այլ ֆուտբոլ ենք խաղացել և մրցանակային տեղ գրավել: Լավ կլիներ, որ լիներ մեր ուզած ձևով, բայց ամեն դեպքում, մենք ոչ մի խնդիր չենք տեսնում և շարժվում ենք առաջ՝ հաղթահարելով դժվարությունները:

-Ընթացիկ առաջնությունն ինչո՞վ է տարբերվում նախորդներից:

-Իմ կարծիքով այս առաջնությունը որակապես ավելի լավն է: Հիմա ավելի բարձրակարգ լեգիոներներ են գալիս Հայաստան: Բնականաբար, դա ուժեղացնում է առաջնությունը: Հիմա ոչինչ պարզ չէ մրցաշարային աղյուսակում, և ամեն խաղը դառնում է վճռորոշ մրցանակային տեղերի ու չեմպիոնության համար: Դա իր լավ կողմն ունի: Ես ավելի շատ ցանկանում եմ տեղ տալ հայ ֆուտբոլիստներին: Իհարկե, ամեն ակումբ ունի իր քաղաքականությունը, բայց ես կողմ եմ ավելի շատ հայ ֆուտբոլիստներին տեղ տալուն:

-Կարելի՞ է ասել, որ կողմ եք լեգիոներիների սահմանափակմանը:

-Բնական է, պետք է լինեն լեգիոներներ, բայց ես ավելի շատ կուզեի հայ տղաներին էլ շանս տրվեր: Թող դա որոշի ֆեդերացիան: Ես որպես հայ, շատ մեծ ցանկություն ունեմ, որ մեր ֆուտբոլիստներն աճեն: Մենք հիմա աշխատում ենք առաջին խմբի ֆուտբոլիստի հետ և արդեն զգում ենք նրա մոտ մեծ առաջընթաց: Այսպիսի օրինակները կարող են շատ լինել: Շատ որակյալ ֆուտբոլիստներ ունենալու դեպքում, հավաքականը նույնպես կունենա ընտրության մեծ հնարավորություն:  

— Ի՞նչ ծրագրեր ունեք գալիք մրցաշրջանի հետ կապված:

-Հիմա ֆինանսական խնդիրներ կան, դեռ հստակություն չկա հետագա անելիքների մասով: Մարզիչներով որոշել ենք, որ այս կազմից շատ բան չի փոխվելու, ուղղակի ցանկություն կա մի քանի օղակներում համալրումներ անել: Այս թիմը ամբողջովին հասկանում է մեր մարտավարությունը և բոլորը հասկանում են մեր մտահաղացումները: Մեզ բոլորիս համար էլ կարևոր է, որ ֆուտբոլիստները խելացի լինեն ու բարձր ինտելեկտով: Անում ենք ամեն ինչ, որ մեր ֆուտբոլիստների անհատական վարպետությունը լինի բարձր մակարդակի: Մեր խաղը կառուցված է թիմային խաղի վրա, բայց իհարկե անհատները տարբերվում են իրենց վարպետությամբ, քանի որ գրոհները հենց նրանք են վճռում:  

Երվանդ ՀԱԿՈԲՅԱՆ