Թվում է, թե շատ ժամանակ չի անցել այն օրվանից, երբ համաշխարհային ֆուտբոլը կանգնեց: Այդպես ենք կարծում, քանի որ նման դադարների սովոր ենք: Ամեն ամառ առաջնությունները կանգնում էին մոտավորապես 2 ամսով. հանգիստ՝ ֆուտբոլիստներին, այնուհետև՝ հավաքներ ու նախապատրաստական շրջան, բայց… Բայց այստեղ կա մի մեծ բայց: Այդ շրջանում հստակ է ամեն ինչ: Մի փոքր հանգստանում ենք ֆուտբոլից ու վերադառնում պապակ ծարավը հագեցնելու:
2 ամիս է քնում ու զարթնում ենք՝ երազելով մարդկության գործերը գլխիվայր շրջած կորոնավիրուսի նահանջի մասին: Բնականաբար, բոլորիս համար առաջնայինը բոլորի առողջությունն է, հետո նոր միայն յուրաքանչյուրիս համար մեր սիրած զբաղմունքը: Ֆուտբոլ… 2 ամսվա ընթացքում բոլոր ժամանակների լավագույն խաղերը դիտեցինք, ընկղմվեցինք որևիցե հետաքրքրություն չունեցող Բելառուսի առաջնության մեջ ( բացառությամբ Կադիմյանի փաստը), բայց կարոտեցինք հեռուստաէկրաններին գրված «Ուղիղ» բառը. այն միշտ բացակայում էր:
Առաջին «դուխով» քայլը կատարեց Գերմանիան: Գործին խառնվեց Անգելա Մերկելը: Գալով ընդհանուր հայտարարի առողջապահական համակարգի հետ՝ որոշում կայացվեց վերսկսել Բունդեսլիգան: Նաև որոշում կայացվեց այն մասով, թե ինչ կլինի, եթե խաղացողներից մեկի մոտ հայտնաբերվի կորոնավիրուս: Այդ դեպքում ամբողջ թիմը կանցնի երկշաբաթյա կարանտինային շրջանի: Իհարկե, սա լավ տարբերակ է, բայց հնարավոր է, որ այդ վարակված ֆուտբոլիստը արդեն խաղացած լինի այլ թիմի դեմ և վարակը փոխանցած լինի. կրկին կկանգնենք կոտրած տաշտակի առաջ: Հուսանք, որ սա պարզապաես մեր երևակայության արդյունք է, և թիմերն առավելագույնս մեկուսացված կլինեն:
Բունդեսլիգան վերսկսվում է…
Երբ առաջնությունը դադարեցվեց, կարծում եմ՝ ամենաշատը տխրեցին «Դորտմունդն» ու «Բավարիան»: Երկուսն էլ խելահեղ տեմպ էին հաղորդել ու զբաղեցնում էին մրցաշարային աղյուսակի առաջին երկու տեղերը: Երկուսն էլ վերջին 4 տուրում տարել էին նույնքան հաղթանակ: Փոխարենը հիանալի մեկնարկած «Շալկե 04»-ը Բունդեսլիգայի վերջին 7 տուրում չի ճաշակել հաղթանակի քաղցրությունն ու այս պահին 6-րդ տեղում է՝ լավագույն քառյակից հետ մնալով 12 միավորով: 3-րդ հորիզոնականում գտնվող «ՌԲ Լայպցիգը» վերջին 7 խաղում ունի միայն 2 հաղթանակ, և առաջատարի դերը զիջեց հենց այդ անհաջող շարքի պատճառով: Վերջին 7 խաղում փոխնիփոխ հաջողություններով է հանդես գալիս նաև 4-րդ տեղում գտնվող Մյունխենգլադբախի «Բորուսիան»: Վերջին 7 խաղում թիմը ունի 4 հաղթանակ, խաղացել է 2 ոչ-ոքի ու կրել մեկ պարտություն: Քառյակում հայտնվելու պայքարի բովում է նաև Լևերկուզենի «Բայերը»: 5-րդ տեղում գտնվող այս ակումբը վերջին 8 խաղում տարել է 6 հաղթանակ, խաղացել 1 ոչ-ոքի ու կրել պարտություն: Նշված թիմերից միայն «Շալկեն» քիչ շանս ունի քառյակում հայտնվելու: Փոխարենը Դևիդ Վագների գլխավորած թիմը գտնվում է Եվրոպա լիգայի ուղեգիր տվող գոտում: «Շալկեն» Եվրոպա լիգայի ուղեգիրը խաղարկելու է «Վոլֆսբուրգի», «Քյոլնի», «Ֆրայբուրգի» ու Սարգիս Ադամյանի «Հոֆենհայմի» հետ, եթե որևէ անակնկալ չլինի:
Առաջիկա տուրի զարդը, իրավամբ, Ռուրյան դերբին է՝ «Դորտմունդ»-«Շալկե 04»: Խաղն առաջին հերթին կարևոր է մրցաշարային տեսանկյունից: «Դորտմունդը» պայքարում է չեմպիոնության համար ու չեմպիոնական պայքարում մնալու համար պետք է հաղթի, քանի որ առաջատար «Բավարիան» մրցելու է «Յունիոն Բեռլինի» հետ, ու բավարացիների հաղթանակը կասկած չի հարուցում, իսկ «Շալկեն» փորձում է տեղը պահպանել Եվրագավաթային գոտում: Դժվար է ընդգծել ֆավորիտին, քանի որ 2-ն էլ տևական ժամանակ չեն մարզվել ու մի քանի օրում դժվար թե կարողանան օպտիմալ մարզավիճակ ձեռք բերել, բայց Ռուրյան դերբին միշտ անցել է կատաղի ու անհաշտ պայքարում, խաղում գրանցվել են շատ գոլեր: Միմյանց հետ թիմերը խաղացել են 59 անգամ. 20 հաղթանակ ունի «Շալկեն», 15՝ «Դորտմունդը», իսկ 24 խաղում գրանցվել է ոչ-ոքի: 59 խաղում խփվել է 150 գնդակ: Թիմերի միջև ամենաարդյունավետ ոչ-ոքին՝ 4:4 հաշիվը գրանցվել է ոչ վաղ անցյալում՝ 2017 թ-ին:
Հեշտ հանդիպում չի սպասվում «Լայպցիգին»: Տիմո Վերներն ու ընկերները մրցելու են 8-րդ տեղում գտնվող «Ֆրայբուրգի» հետ: Դե ֆակտո, ֆավորիտը տանտերերն են, բայց կրկին արժե չմոռանալ կորոնավիրուսի առաջացրած խնդիրները: Մյունխենգլադբախի «Բորուսիան» հյուրընկալվելու է Ֆրանկֆուրտի «Այնթրախտին»: Հուտտերի թիմը անհաջող է հանդես գալիս այս մրցաշրջանում և այս պահին գտնվում է աղյուսակի ստորին հատվածում: Առաջնության վերջին 4 խաղում կրել է 3 պարտություն, խաղացել 1 ոչ-ոքի:
Բունդեսլիգայի հայ սիրահարները ամենից շատ սպասում են «Հոֆենհայմի» ելույթներին: Ցավոք, վերսկսման տուրին, ամենայն հավանականությամբ, չի մասնակցի Հայաստանի ազգային հավաքականի հարձակվող Սարգիս Ադամյանը: Այս մասին երեկ հայտնեց Բունդեսլիգայի պաշտոնական կայքը: Հայ ֆուտբոլիստը կոճի վնասվածք էր ստացել փետրվարին ու վերջերս է սկսել մարզվել:
Ուշադրության է արժանի նաև Բրեմենի «Վերդեր» ու Լևերկուզենի «Բայերի» դիմակայությունը: Ճիշտ է, «Վերդերը» նախավերջին՝ 17-րդ տեղում է, սակայն նույիսկ այս վիճակով ցանկացած խաղում պայքարում է մինչև արյան վերջին կաթիլը:
Տուրի մյուս խաղերում կմրցեն «Աուգսբուրգն» ու «Վոլֆսբուրգը», «Դյուսելդորֆն» ու «Պադերբորնը», «Քյոլն» ու «Մայնցը»:
Այսպիսով, ամենադիտարժան առաջնություններից մեկը կմեկնարկի ժամեր անց: Բոլորիս բարի դիտում մինչև կվերսկսվեն նաև մյուս թոփ առաջնությունները, և, գլխավորը, Հայաստանի առաջնությունը: Սակայն պետք է ընդգծենք, որ առանց հանդիսականների շատ դժվար կլինի էսթետիկական հաճույք ստանալ ֆուտբոլից:
Արմեն Գարամյան