Աշխարհի 2026 թվականի առաջնության խմբային փուլի երկրորդ տուրի հերթական հանդիպումներն աչքի են ընկել պատմական ռեկորդներով, հոբելյանական ցուցանիշներով և չափազանց հուզիչ դրվագներով։
E խմբի շրջանակում Կանզաս-Սիթիում կայացած Էկվադոր — Կյուրասաո հանդիպումն ավարտվել է գոլազուրկ ոչ-ոքիով: Խաղի բացարձակ հերոս է դարձել Կյուրասաոյի հավաքականի դարպասապահ Էլոյ Ռոմը, ով արժանացել է հանդիպման լավագույն խաղացողի կոչմանը։
Ըստ Opta.Joe-ի՝ Ռոմը սահմանել է Աշխարհի առաջնությունների ռեկորդ (առանց լրացուցիչ ժամանակի խաղերում)՝ կատարելով անհավանական 15 սեյվ: Նշենք, որ ԱԱ-ներում հետ մղված հարվածների պաշտոնական վիճակագրությունը վարվում է 1966 թվականից։
Խաղից անմիջապես հետո դարպասապահն իր պատմական ելույթը նվիրել է հայրենակից, Կյուրասաոյի ազգային հավաքականի նախկին դարպասապահ Ժարզինյո Պիտերի հիշատակին։ Ռոմը տեսախցիկների առջև ցուցադրել է շապիկ՝ Պիտերի լուսանկարով և գրառմամբ. «Սա քեզ համար է, Ժարզինյո՛ Պիտեր»։
Հիշեցնենք, որ Պիտերը մահացել է 2019 թվականի սեպտեմբերին՝ ԿՈՆԿԱԿԱՖ-ի Ազգերի լիգայի Հայիթիի դեմ խաղից առաջ, 31 տարեկան հասակում. պատճառը սրտի կանգն էր:
Երրորդ տուրում Գերմանիան կխաղա Էկվադորի, իսկ Դիկ Ադվոկատի գլխավորած Կյուրասաոն՝ Կոտ դ’Իվուարի հետ:
E խմբի աղյուսակն այս պահին
Մեկ այլ պատմական իրադարձություն գրանցվել է Մեքսիկայի Մոնտեռեյ քաղաքում: F խմբի շրջանակում կայացած Ճապոնիա — Թունիս հանդիպումը դարձել է Մունդիալների պատմության 1000-րդ խաղը։
Այս հոբելյանի կապակցությամբ խաղը սպասարկող ռումինացի մրցավար Իշտվան Կովաչի և նրա բրիգադի համազգեստների վրա ավելացվել էին ոսկեգույն գծեր, իսկ թե՛ ֆուտբոլիստների, թե՛ մրցավարների մարզաշապիկների թևքերին փակցված էր հատուկ «1000-րդ խաղ» տարբերանշանը։
Բուն հանդիպումն անցել է Ասիայի ներկայացուցիչների բացահայտ առավելությամբ. Ճապոնիայի հավաքականը 4:0 հաշվով ջախջախել է Թունիսին: Ճապոնացիների կազմում դուբլի հեղինակ է դարձել Այասե Ուեդան, ևս մեկական անգամ աչքի են ընկել Ջունյա Իտոն ու Դաիչի Կամադան։
Աֆրիկյան հավաքականը կորցրել է փլեյ-օֆֆ դուրս գալու բոլոր շանսերը: Երրորդ տուրում (հունիսի 25-ին) Ճապոնիան կուժաչափվի Շվեդիայի, իսկ Թունիսը՝ Նիդերլանդների հետ:
Տեսանյութը՝ ԱՅՍՏԵՂ
F խմբի աղյուսակն այս պահին
