Ֆուտբոլի Հայաստանի բարձրագույն խմբի ընթացիկ առաջնությունում լավագույն վեցնյակի պայքարում առաջատարն աստիճանաբար զգալի է դարձնում առավելությունը մյուս 5 թիմի նկատմամբ:Հետհայացք նախորդ տուրին: Նախորդ տուրի վեցնյակի արդյունքները միայն ու միայն «Արարատ-Արմենիայի» օգտին էին: Գործող չեմպիոնը հաղթեց,իսկ մյուս 2 խաղում գրանցվեցին ոչ-ոքիներ:
«Լոռի»-«Շիրակ» — 1-1
Վանաձորում կայացած «Լոռի»-«Շիրակ» խաղի առաջին կեսում հավասար պայքար էր, ավելի շատ մենապայքարներ ու խոտան էր, բայց գնդակին ավելի շատ տիրում էր «Լոռին»:
Վանաձորյան թիմի գոլը խփվեց Դեսիրեի վարպետության ու «Շիրակի» պաշտպանների կոպիտ սխալի հետևանքով: Երկրորդ խաղակեսում «Շիրակն» ուներ տարածքային առավելություն, սակայն գոլային պահեր չկային: Այնուամենայնիվ, խաղի վերջնամասում Գյումրիի թիմը կարողացավ մեկ միավոր կորզել ու գլուխը չկախած հեռանալ Վանաձորից. Մանոյան-Ասլանյան-Կոնե եռաքայլ կոմբինացիայի վերջնարդյունքում առաջնու թյան իր 16-րդ գոլը խփեց Կոնեն:
«Արարատ» — «Նոա» — 0-0
«Արարատ»-«Նոա» խաղին «Նոան» մոտեցել էր ֆավորիտի կարգավիճակում: Պատճառների մասին վերջերս բազմիցս խոսել ենք, իսկ գլխավորն այն է, որ լեգենդար թիմը չունի գլխավոր մարզիչ: Թիմի գործողությունները խաղադաշտում ղեկավարում է մենեջեր Վալերի Հովհաննիսյանը: Խաղում բեկումնային դրվագը սկզբնամասում Ալան Տատաևի ստացած կարմիր քարտն էր: 
«Արարատը» ստացավ քանակական առավելություն, ինչն այս շրջանում լուրջ առավելություն է՝ հաշվի առնելով առաջնության խիտ գրաֆիկն ու դրա արդյունքում ֆուտբոլիստների ֆիզիկական վիճակը:
Մինչև կարմիր քարտը «Նոան» ուներ հաշիվը բացելու լավ հնարավորություններ, սակայն չօգտագործեց: Կարմիր քարտից հետո ևս Վադիմ Բորեցի սաները գոլ խփելու շանսեր ունեին, սակայն կրկին չէին օգտագործում, բայց դրան զուգահեռ պահեր ստեղծում էր նաև «Արարատը»: Իսկ ամենավերջում փաստացի առանց գլխավոր մարզիչ խաղացող «Արարատը» պարտավոր էր հաղթանակ կորզել, սակայն Վիմերկատիի սեյվին հետևեց Իսաևի «մահացու» վրիպումը: Ինչևէ, «Նոան» մեծ ջանքեր թողեց խաղադաշտում և վաստակեց մեկ միավոր:
«Ալաշկերտ» — «Արարատ-Արմենիան» — 1-2
«Արարատ-Արմենիան» երկտուրյա դադարից հետո հաղթեց: «Ալաշկերտի» հետ խաղում առաջին անգամ Մինասյանը մեկնարկային կազմում խաղադաշտ էր դուրս բերել Գուֆրանին: Հենց նրա սուր փոխանցումը դարձավ առաջին գոլային գրոհի սկիզբը: Խփած գոլից հետո «Արարատ-Արմենիան» սկսեց ավելի խորքից խաղալ ու հուսալի պաշտպանվել, իսկ երկրորդ խաղակեսում փոխարինման մտած Գլիշիչը գրագետ կոմբինացիայի շնորհիվ խփեց պատասխան գնդակը: Ընդունած գոլից հետո գործող սուպերգավաթակիրը կրկին «միացրեց մեքենան»:
Թիմերը հաջողության հասնելու հնարավորություններ կորցրեցին, իսկ խաղակեսի միջնամասում արագ հակագրոհի արդյունքում Լիման 11 մետրանոց վաստակեց ու հստակ իրացրեց՝ ձևակերպելով խաղի վերջնական հաշիվն ու ապահովելով իր թիմի ծանր հաղթանակը:
Վեցնյակի թիմերի մրցաշարային աղյուսակն ունի հետևյալ տեսքը.
7-ից 9-րդ տեղերի համար պայքարում «Ուրարտուն» առաջ անցավ մյուս 2 թիմից: Հերթական տուրի «Ուրարտու»-«Փյունիկ» խաղում ուրախալի էր այն փաստը, որ խաղադաշտում մեծամասնություն էին կազմում հայերը, իսկ խաղում խփված 3 գոլի հեղինակն էլ հայեր էին: «Ուրարտուն» հաղթեց 2-1 հաշվով և այժմ 8-րդ տեղում գտնվող «Փյունիկի» նկատմամբ 3 միավորի առավելություն ունի՝ անցկացրած լինելով մեկ խաղ ավել:
Ճակատամարտի 4-րդ փուլից առաջ
Առաջիկա տուրում կխաղան միայն վեցնյակի թիմերը: Երևանում «Արարատը» կընդունի «Արարատ-Արմենիային»: Ընթացիկ առաջնությունում թիմերը հանդիպել են 2 անգամ, և 2 դեպքում էլ Մինասյանի սաները հաղթել են չոր հաշվով (3-1, 1-0): Խաղում, միանշանակ, ֆավորիտի կարգավիճակում կլինի «Արարատ-Արմենիան»: Սակայն «Արարատին» հաղթանակ է անհրաժեշտ՝ մեդալային տեղերի համար պայքարում մնալու համար: Խաղը կկայանա հունիսի 11-ին ու կմեկնարկի 19:30-ին:
Գյումրիում «Շիրակը» կընդունի «Նոային»: Առաջնությունում «Նոան» միայն «Շիրակի» դարպասը չի կարողացել գրավել: Անցկացրած 2 խաղից տնայինում «Շիրակը» հաղթել է (3-0), իսկ երևանյան խաղում գրանցվել է գոլազուրկ ոչ-ոքի: Թիմերի հնարավորությունները կարելի է հավասար գնահատել: Երկուսն էլ վերջին տուրում չեն հաղթել:
«Շիրակը», չհաղթելու դեպքում, կբարդացնի մեդալային տեղերի համար պայքարը, իսկ «Նոայի» չհաղթելը գործնականում անհնար կդարձնի չեմպիոնության համար պայքարը:
Խաղը կկայանա հունիսի 11-ին ու կմեկնարկի 17:00-ին:Վանաձորում «Լոռին» կընդունի գործող գավաթակիր «Ալաշկերտին»: Խաղն առաջին հերթին հետաքրքիր է նրանով, որ Խաշմանյանը կհանդիպի իր նախկին ակումբին:
Հայտնի մասնագետը «Ալաշկերտում» աշխատելու հսկայական փորձ ունի և դրանից օգուտ քաղել միանշանակ կկարողանա: Միմյանց հետ խաղացած առաջնության 2 խաղում էլ հաղթել է «Լոռին»: Ճիշտ է, նորանշանակ գլխավոր մարզիչ Սանամյան-Նիգոյան-Խաշմանյան եռյակը դեռ հաղթանակ չունի, սակայն «Լոռին» վերելք է ապրում: Նախորդ տուրում վանաձորյան թիմը ձեռքից բաց թողեց հաղթանակը ամենավերջում, իսկ դրանից առաջ 35 րոպե 10 հոգով խաղալով «Արարատ-Արմենիայի» դեմ, կարողացավ միավոր վաստակել: Իսկ «Ալաշկերտը» վերջին 2 խաղում պարտվել է: Ադամյանի գլխավերևում սկսում են մութ ամպեր կուտակվել: Հաղթանակի հասնելու գործում թիմերն ունեն հավասար հնարավորություն: Խաղը կկայանա հունիսի 12-ին ու կմեկնարկի 17:00-ին:
Մոտենում ենք առաջնության եզրափակիչ հատվածի հասարակածին: Ամեն կորցրած միավորը առաջնության եզրափակիչ տուրի վերջին խաղի մրցավարի եզրափակիչ սուլիչից հետո կարող է ծանր հետևանքներ թողնել ցանկացած թիմի վրա:
Արմեն Գարամյան
