«Ալաշկերտի» նախկին ֆուտբոլիստ, բրազիլացի Հեբեր Արաուխոն հարցազրույց է տվել MLS-ի պաշտոնական կայքին ու պատմել Հայաստանում անցկացրած ժամանակահատվածի ու կարիերայի ընթացքի մասին.
«Հիշում եմ՝ երբ առաջին օրն արթնացա Հայաստանում, պատուհանից նայեցի ու մտածեցի «Գրողը տանի, ես ի՞նչ եմ անում այստեղ»:
Հեբերն իր կարիերան սկսել է Բրազիլիայում. 2010 թվականից հանդես է եկել բրազիլական «Ֆիգույրենսե» ակումբում՝ Բրազիլիայի հավաքականի և «Լիվերպուլի» հարձակվող Ռոբերտո Ֆիրմինոյի հետ.
«Երբ ես Բրազիլիայում էի, երազանքս կատարվեց: Եթե Բրազիլիայում երեխաներին հարցնեք, թե նրանք ինչ են ուզում դառնալ, երբ մեծանան, կասեն՝ ֆուտբոլիստ: Դա ֆուտբոլի երկիր է: Հիշում եմ, թե ինձ որքան լավ էի զգում պրոֆեսիոնալ մակարդակում առաջին խաղս անցկացնելուց հետո: Դա կյանքիս լավագույն օրերից մեկն էր:
Հեբերն այդ ժամանակ խաղալիս է եղել Մ19 տարեկանների ակադեմիայում, նույնիսկ երկրորդ թիմում տեղի չի ունեցել: Երկրորդ թիմի մարզիչն ասել է, որ հաջորդ խաղի համար նրան ցանկանում է պահեստայինների նստարանին նստեցնել, բայց Հեբերը հրաժարվել է: Ակադեմիայի նրա թիմը շաբաթ օրը խաղ է ունեցել, մինչդեռ երկրորդ թիմը պետք է խաղար երեքշաբթի, և նա չէր կարողանա երկուսին էլ մասնակցել: Մարզիչը ստիպված է եղել խոստանալ, որ նրան մի քանի րոպե խաղալու հնարավորություն կտա:
Այդ խաղին ներկա է եղել նաև առաջին թիմի մարզիչը: Հեբերը գոլ է հեղինակել, տպավորել առաջին թիմի մարզչին ու հրավեր ստացել հաջորդ խաղին մասնակցելու.
«Չեմ կարողանում հավատալ, որ մարզչին ասացի՝ ես չեմ ցանկանում նստել պահեստայինների նստարանին: Շնորհակալ եմ Աստծուն, որ դա աշխատեց ու մարզիչն ինձ հրավիրեց առաջին թիմի խաղին մասնակցելու»:
«2015 թվականին գործակալս զանգահարեց ու ասաց, որ Հայաստան տեղափոխվելու տարբերակ կա: Ասացի՝ լավ, կգնամ: Հետո հարցրի՝ «Իսկ որտե՞ղ է Հայաստանը»:
Հեբերը լեզվին չէր տիրապետում, ու հաճախ դիմում էր Google translate-ի գնությանը:
Ակումբի հետ կապված շատ բաների նա ստիպված էր սովորել. «Մարզիչը ծխում էր ընդմիջմանը, որոշ ֆուտբոլիստներ ծխում էին խաղից հետո: Նա ստիպված էր ինքը լվանալ իր մարզահագուստն, ու առաջին անգամ էր ձյուն տեսնում»,- գրում է կայքը.
«Ես չգիտեի, թե Հայաստանը որտեղ էր, ոչինչ չգիտեի այդ երկրի մասին, բայց գնացի: Հայաստանն ամեն ինչի սկիզբն էր ինձ համար: Ես այսօր «Նյու Յորք Սիթիում» եմ Հայաստանի շնորհիվ»:
Հայաստանում անցկացրած ժամանակը նրա համար ճանապարհ հարթեց դեպի Խորվաթիա՝ «Սլավեն Բելուպո» ակումբ: Մեկ տարի «Բելուպոյի» կազմում անցկացնելուց հետո Հեբերը գրավեց «Ռիյեկայի» ուշադրությունն ու այնտեղ 2 հաջող մրցաշրջան անցկացնելուց հետո՝ տեղափոխվեց «Նյու Յորք Սիթի»:
MLS-ում իր նորամուտի մրցաշրջանում Հեբերը 22 խաղում 15 գոլ խփեց ու թիմին օգնեց ռեկորդային ցուցանիշով ավարտել մրցաշրջանն ու հայտնվել ԿՈՆԿԱԿԱՖ-ի Չեմպիոնների լիգայում:
«Սա կարիերայիս լավագույն հատվածն է: Այստեղ գալուց ի վեր, թիմն ինձ շատ է օգնել: Մենք հիանալի մրցաշրջան ենք անցկացրել, ես շատ գոլեր խփեցի … եթե նրանք ցանկանան ինձ հետ պայմանագիր կնքել մինչև իմ կարիերայի ավարտը, ես կստորագրեմ»:
«Գրեթե ամեն օր ես մտածում եմ այն մասին, թե ես որտեղ էի ու հիմա որտեղ եմ: Դա ինձ ստիպում է ավելի քրտնաջան աշխատել, որպեսզի երբեք նորից անկում չապրեմ: Երբ դու ներքևում ես, քեզ ոչ մեկը չի ցանկանում: Հիմա ես ամեն ինչ կտամ այնտեղ երբեք նորից չհայտնվելու համար», — ասել է Հեբերը: