Արգենտինայի ազգային հավաքականը ԱԱ-2026-ի եզրափակիչում Իսպանիայից կրած ցավալի պարտությունից (0:1) հետո վերադարձել է հայրենիք: Բուենոս Այրեսում աշխարհի փոխչեմպիոններին դիմավորել են արքայական վայելչությամբ՝ կարմիր գորգով և զինվորական նվագախմբով, սակայն այս ընդունելությանը բացակայում էր թիմի գլխավոր հերոսը՝ Լիոնել Մեսսին:
Չվերթը, որով ԱՄՆ-ից ժամանել են գլխավոր մարզիչ Լիոնել Սկալոնին և ֆուտբոլիստների մի մասը, վայրէջք է կատարել Էսեյսա օդանավակայանում: Ինքնաթիռից մինչև ավտոբուս խաղացողներն անցել են կարմիր գորգի վրայով, իսկ զինվորական նվագախումբը կատարել է հավաքականի ոչ պաշտոնական հիմնը դարձած La Mosca Ts-Ts խմբի հայտնի «Muchachos» ստեղծագործությունը:
Թեև եղանակը բարենպաստ չէր՝ տեղում էր սառն անձրև, հազարավոր հավատարիմ երկրպագուներ հավաքվել էին Արգենտինայի ֆուտբոլի ասոցիացիայի բազայի մոտ, որը գտնվում է օդանավակայանից ոչ հեռու: Նրանք ազգային դրոշներով, պայթուցիկներով ու վուվուզելներով ողջունել են իրենց սիրելիներին՝ ցույց տալով, որ թիմի կողքին են նույնիսկ ցավալի պարտությունից հետո:
Այնուամենայնիվ, հայրենիք վերադարձող ինքնաթիռում «Ալբիսելեստեն» ամբողջական կազմով չի եղել։ Բացակայել է թիմի ավագ Լիոնել Մեսսին, ինչպես նաև առանցքային խաղացողներ Էնցո Ֆերնանդեսն ու Խուլիան Ալվարեսը: Արգենտինայի ֆուտբոլի ասոցիացիան ավելի վաղ պարզաբանել էր, որ որոշ ֆուտբոլիստներ ԱՄՆ-ից անմիջապես մեկնելու են իրենց ակումբների տեղակայման վայրեր կամ սկսելու են իրենց հասանելիք արձակուրդը:
Ինչ վերաբերում է պաշտոնական զանգվածային տոնակատարություններին, իրավիճակը դեռևս անորոշ է: Արգենտինայի նախագահ Խավիեր Միլեյը հայտարարել էր, որ պատրաստ է ոչ աշխատանքային օր և ազգային տոն հայտարարել այն օրը, եթե ֆուտբոլիստներն ու մարզչական շտաբը ցանկանան երկրպագուների հետ միասին նշել ԱԱ-ի արծաթե մեդալների նվաճումը: Սակայն այս պահի դրությամբ պաշտոնական շքերթ կամ հանդիսավոր այլ միջոցառումներ չեն պլանավորվում:
🇦🇷💙 ¡GRACIAS POR TODO, SELECCIÓN!
📹 @Argentina pic.twitter.com/fzzLE6k1Be
— TyC Sports (@TyCSports) July 21, 2026
