«Ինտեր Մայամի» ֆուտբոլային ակումբը հյուրընկալվել է Սպիտակ տանը՝ ԱՄՆ նախագահ Դոնալդ Թրամփի կողմից կազմակերպված հանդիսավոր ընդունելությանը։ Միջոցառումը նվիրված էր MLS-ի գավաթի խաղարկությունում թիմի նվաճած տիտղոսին։
Ֆլորիդյան ակումբը, որը լիգային միացել է 2020 թվականին, իր պատմության մեջ առաջին չեմպիոնությունը նվաճեց նախորդ տարվա նոյեմբերին՝ եզրափակչում առավելության հասնելով «Վանկուվերի» նկատմամբ:
Միջոցառմանը ներկա էր նաև թիմի ավագ և հարձակվող Լիոնել Մեսսին։ Արգենտինացին Սպիտակ տան ընդունելությունների սրահ է մտել անձամբ Թրամփի ուղեկցությամբ, որտեղ նրանց արդեն սպասում էր թիմի մնացած մասը։ Սա Մեսսիի առաջին այցն էր Սպիտակ տուն (հիշեցնենք, որ 2025-ի հունվարին նա չէր կարողացել ներկա գտնվել նախկին նախագահ Ջո Բայդենի կողմից նախագահական մեդալի հանձնման արարողությանը)։
Հատկանշական է, որ ֆուտբոլիստների մեծարման ժամանակ, երբ Մեսսին կանգնած էր նախագահի կողքին, Դոնալդ Թրամփն իր ելույթում անդրադարձել է նաև Մերձավոր Արևելքում տիրող իրավիճակին։
«ԱՄՆ զինված ուժերը իսրայելցի հիանալի գործընկերների հետ համատեղ շարունակում են ամբողջությամբ ոչնչացնել հակառակորդին աննախադեպ մակարդակով։ Մենք ոչնչացնում ենք իրանական հրթիռները»,- Թրամփի խոսքերն է մեջբերում The Touchline-ը՝ X սոցիալական ցանցում։
Տեղեկացնենք, որ փետրվարի 28-ին ԱՄՆ-ն և Իսրայելը համատեղ ռազմական օպերացիա են սկսել Իրանի դեմ, ինչին ի պատասխան Իրանը հարվածներ է հասցրել ամերիկյան ռազմաբազաներին և այլ օբյեկտների Մերձավոր Արևելքի մի շարք երկրներում:
Լիոնել Մեսսին «Ինտեր Մայամիում» հանդես է գալիս 2023 թվականի ամառվանից, իսկ հոկտեմբերին նա երկարաձգել է պայմանագիրն ակումբի հետ մինչև 2028 թվականը։ Այս ընթացքում արգենտինացին բոլոր մրցաշարերում մասնակցել է 90 հանդիպման՝ դառնալով 79 գոլի և 44 գոլային փոխանցման հեղինակ։ Transfermarkt-ի տվյալներով՝ ֆուտբոլիստի տրանսֆերային արժեքը կազմում է 15 մլն եվրո։
