Այսօր՝ փետրվարի 26-ին, Կոնֆերենցիաների լիգայի անցումային փուլի պատասխան խաղում հոլանդական «ԱԶ Ալկմարը» սեփական հարկի տակ կընդունի«Նոային»: Հանդիպմանը նախորդած մամուլի ասուլիսի ժամանակ հոլանդական ակումբի պորտուգալացի պաշտպան Ալեշանդրե Պենետրան խոսել է թիմի տրամադրվածության և այն սխալների մասին, որոնք թույլ են տվել Երևանում կայացած առաջին խաղում։ Նրա խոսքով՝ հաջողության հասնելու միակ և վճռորոշ գրավականը կենտրոնացվածությունն է:
Պենետրան հատուկ ընդգծել է ճիշտ մտայնության և խաղին ամբողջությամբ նվիրվելու կարևորությունը։ Պաշտպանի կարծիքով՝ մեկ շաբաթ առաջ կայացած խաղում տրամադրվածությունը լիովին չէր բացակայում, սակայն բավարար էլ չէր դրական արդյունքի համար.
«Կարծում եմ՝ մեզ չէր հերիքում վերջին փոխանցումը: Դա բավարար չէր։ Բացի այդ, մենք հակագրոհների ժամանակ մի քանի վտանգավոր պահեր բաց թողեցինք մեր դարպասին, հատկապես՝ եզրային նետումներից հետո: Սա խոսում է այն մասին, որ մեր կենտրոնացվածությունը հարյուր տոկոսանոց չէր, գուցե ութսուն տոկոս էր»,- նշել է պաշտպանը:
Հենց դա էլ, ըստ նրա, պակասում էր ալկմարցիներին առաջին հանդիպման ժամանակ.
«Նման մրցաշարերում՝ բարձրագույն մակարդակի ֆուտբոլում, մենք չենք կարող խաղեր շահել առանց լիարժեք կենտրոնացվածության։ Մենք ցանկանում ենք պահպանել այդ կենտրոնացվածությունը մինչև մրցաշրջանի ավարտը. այդ մասին խոսել ենք հանդերձարանում: Ամբողջ 90 րոպեների ընթացքում պետք է զգոն լինենք: Եթե լրացուցիչ ժամանակ խաղանք՝ նաև դրա ընթացքում, եթե բանը հասնի 11-մետրանոցներին՝ նույնպես»:
Պենետրայի խոսքով՝ սկզբունքը պարզ է. առանց կենտրոնացվածության հաղթելը բարդ է, իսկ դրա առկայության դեպքում պատկերը լիովին այլ է.
«Եթե մենք կենտրոնանանք մեր անելիքի վրա, կարող ենք հաղթել գրեթե ցանկացած թիմի: Մենք շատ ենք հավատում մեր որակներին և խաղային մարտավարությանը»:
Հիշեցնենք, որ «ԱԶ Ալկմար» — «Նոա» պատասխան հանդիպումը կկայանա այսօր՝ փետրվարի 26-ին, Նիդերլանդների Ալկմար քաղաքի «ԱՖԱՍ» մարզադաշտում։ Դիմակայության առաջին խաղում, որը կայացավ փետրվարի 19-ին Երևանում, հայկական ակումբը պատմական հաղթանակ տարավ 1:0 հաշվով՝ շնորհիվ Հովհաննես Համբարձումյանի խփած միակ գոլի, ինչը լուրջ առավելություն է տալիս «Նոային» հաջորդ փուլ դուրս գալու համար:
