«ԱԶ Ալկմարի» պաշտպան Վաուտեր Գուսը խիստ հիասթափված է Կոնֆերենցիաների լիգայի անցումային փուլում «Նոայից» կրած պարտությունից (0:1): 21-ամյա ֆուտբոլիստը սկզբում փորձել է զսպել էմոցիաները, սակայն ի վերջո չի լռել՝ միաժամանակ ընդունելով նաև սեփական սխալները։
Խոսելով խաղից հետո հանդերձարանում տիրող մթնոլորտի մասին՝ Գուսը Ziggo Sport-ի հետ զրույցում նշել է, որ առաջնահերթ խնդիրն այժմ կենտրոնացումն է պատասխան հանդիպման վրա.
«Երբ դու ինքդ ես անփույթ գործում, մրցակիցը մտնում է խաղի մեջ: Դուք դա տեսաք այսօր։ Իրականում մենք ավելի լավ թիմ ենք, բայց մի քանի դրվագներում կորցրինք զգոնությունը, իսկ նրանք հենց դրան էին սպասում»,- նշել է հոլանդացին։
Պաշտպանի խոսքով՝ խաղից անմիջապես հետո հանդերձարանում կարճ ժամանակով լարվածություն է եղել.
«Սկզբում խոսակցությունը կոշտ էր, բայց հետո ամեն ինչ արագ հանդարտվեց: Մենք դեռ ունենք հնարավորություն, այնպես որ ոչինչ կորած չէ»։
Այնուամենայնիվ, նա խոստովանել է, որ հիասթափության զգացումն իր մոտ գերիշխող է.
«Այո, միայն հիասթափություն եմ զգում։ Հիմա կարող եմ հիմար պատասխաններ տալ, բայց փորձում եմ կոռեկտ մնալ։ Իրականում ես չափազանց հիասթափված եմ և փորձում եմ ինձ հանգիստ պահել»։
Գուսի համար լրացուցիչ հարված էր նաև իր որակազրկումը։ Խաղի ավարտից շուրջ 20 րոպե առաջ նա դեղին քարտ ստացավ, ինչի պատճառով բաց կթողնի պատասխան հանդիպումը։
«Այդ պահին ես ինձ լիովին կորցրեցի։ Իրավունք չունեմ խոսելու մրցավարի մասին, բայց դա ինձ պարզապես հունից հանում էր։ Իհարկե, ես ինքս էլ պետք է ավելի լավ գործեի։ Այդ դեղին քարտից հետո ես տրվեցի երկրորդական հույզերին և շեղվեցի: Այդ դրվագը չափազանց երկար մնաց գլխումս»,- ինքնաքննադատաբար եզրափակել է նա։
