Ֆուտբոլային սկաուտ․ Հաշվենկատ Վերոնան և հավակնոտ Բոլոնյան՝ ցատկահարթակ ֆուտբոլային էլիտա

Այս անգամ ArmSport-ը կանդրադառնա Իտալիայի երկու շատ գեղեցիկ և հարուստ պատմություն ունեցող քաղաքների՝ Վերոնայի և Բոլոնյայի ներկայացուցիչներին Ա Սերիայում։

Չհուսադրող մարզիկներից՝ հեռանկարային, ապագա աստղեր դարձած ֆուտբոլիստների և ակումբների կողմից նրանց վերավաճառելու հմտությունների մասին է այսօրվա մեր Ֆուտբոլային սկաուտը։

Մատեո Պեսինա

🇮🇹 Իտալիա
23 տարեկան
«Վերոնա»

Պեսինայի ֆուտբոլային կարիերան զարգանում է շեքսպիրյան մոտիվներով, քանի որ մինչ Ռոմեոյի և Ջուլիետայի հայրենի քաղաքում հայտնվելը, նա բավականին երկար ֆուտբոլային ճանապարհորդություն է կատարել։ Նրա տրանսֆերային իրավունքները ժամանակին պատկանում էին «Միլանին», իսկ այժմ «Ատալանտային», սակայն այդ ակումբների կազմում նա գրեթե հնարավորություն չի ստացել իրեն դրսևորել ( «Ատալանտայի» կազմում մասնակցել 12 հանդիպման)։ Մի քանի մրցաշրջան անցկացնելով իտալական ֆուտբոլի հետնախորշերում՝ «Մոնցա», «Լեչչե» (երբ թիմը հանդես էր գալիս C Սերիայում), «Կատանիա», «Կոմո», լավ աթլետիկ տվյալներով օժտված կենտրոնական կիսապաշտպանն այս մրցաշրջանում հնարավորություն ստացավ իրեն դրսևորել իտալական ակումբային ֆուտբոլի էլիտայում։ Եվ դա նրա մոտ, հավատացեք, բավականին հաջող էլ ստացվում է։ Նա առանցքային դեր է խաղում «Վերոնայում», որն էլ իր հերթին բավականին հաջող է հանդես գալիս Ա Սերիայում, թեև սկզբում մասնագետների կանխատեսումներով, այն համարվում էր առաջնության գլխավոր ետնապահներից մեկը։ Միգուցե՞ համոզիչ մեկնարկը Ա Սերիայում նոր դռներ բացի Պեսինայի համար, և հաջորդ մրցաշրջանում նա արդեն հնարավորություն կստանա պաշտպանել «դիցուհիների» գույները։

Իբրահիմա Մբայե

🇸🇳 Սենեգալ
25 տարեկան
«Բոլոնյա»

«Բոլոնյան» իրենից ներկայացնում է բավականին հետաքրքիր նախագիծ, որտեղ մի քանի փորձառու ֆուտբոլիստների կողքին հանդես են գալիս երիտասարդ, բայց բավականին հեռանկարային ֆուտբոլիստներ։ Ա Սերիայի այս մրցաշրջանի գլխավոր բացահայտումներից մեկի՝ ճապոնացի պաշտպան Տոմիյասուին մենք նախկինում արդեն անդրադարձել էինք Սամուրայների նոր սերունդը Եվրոպայում մասում։ Այս անգամ կցանկանանք անդրադառնալ թիմի երկու ֆուտբոլիստների, ովքեր արդեն իսկ պատրաստ են տեղափոխվել ավելի բարձրակարգ ակումբ։ Նրանցից առաջինը թիմի աջ պաշտպան Մբայեն է։ Սենեգալցին «Ինտերի» սան է, նույնիսկ հասցրել է 4 հանդիպում անցկացնել իլանյան գրանդի կազմում, սակայն, ինչպես մեր նախորդ հերոսը, չստանալով հնարավորություն, տեղափոխվել է «Բոլոնյա», որտեղ անցկացնում է արդեն 7-րդ մրցաշրջանը։ Վերջին երեք մրցաշրջանները Մբայեն անցկացնում է բավականին կայուն՝ չնայած զգացվում է, որ նա չի օգտագործում իր ամբողջ պոտենցիալը։ Համապատասխան թիմում և ճիշտ մարզչի գլխավորությամբ սենեգալցին կարող է դառնալ Ա Սերիաի լավագույն պաշտպաններից մեկն իր դիրքում։

Սոֆյան Ամրաբատ

🇲🇦 Մարոկկո
23 տարեկան
«Վերոնա»

Մարոկկացի ֆուտբոլիստը «Հելլաս Վերոնայում» կամ պարզապես «Վերոնայում» ևս հանդես է գալիս վարձավճարով, ինչպես մեր նախորդ հերոսը՝ Պեսինան։ Սակայն այստեղ մեկ այլ հետաքրքիր պատմություն է։ Սոֆյանի տրանսֆերային իրավունքները պատկանում էին «Բրյուգեին», երբ նա մրցաշրջանի մեկնարկից առաջ վարձավճարով տեղափոխվեց «Վերոնա»։ Հավանաբար բելգիացիները այդքան էլ չէին հավատում մարոկկացու հաջողություններին և նրա պայմանագրում մի կետ էին նշել, որի համաձայն «Վերոնան» կարող էր գնել նրա ամբողջական տրանսֆերը 3,5 մլն եվրոյով։ Իսկ Սոֆյանը մրցաշրջանի առաջին իսկ հատվածից էլ սկսում է ցուցադրել հիանալի ֆուտբոլ, և իտալական ակումբը, բնականաբար, օգտվելով այդ կետից, գնում է նրա ամբողջական տրանսֆերը։ Այժմ կասեք, այդ ո՞նց եղավ, որ ներկայումս էլ նա հանդես է գալիս վարձավճարով։ Լավ-լավ, շատ չեմ երկարացնի և միանգամից կբացատրեմ․ այս տարվա հունվարի 29-ին «Վերոնան» ակտիվացնում է վերը նշված կետը պայմանագրում, գնում նրա տրանսֆերային իրավունքները 3,5 մլն եվրոյով, իսկ հաջորդ օրը՝ հունվարի 30-ին, վաճառում ֆուտբոլիստին «Ֆիորենտինային»՝ 20 մլն եվրոյով։ Մոտ 6 անգամ ավել գումարով, պատկերացնո՞ւմ եք։ Այնպես որ, եթե կարիք կունենաք ուսանել, թե ինչպես մեկ օրում աշխատել 16,5 մլն եվրո, արդեն գիտեք՝ ում դիմել։ Եվ դա էլ դեռ վերջը չէ․ «մանուշակները» թողնում են ֆուտբոլիստին ավարտել մրցաշրջանը «Վերոնայում»՝ կրկին վարձավճարով։ Համենայն դեպս, արագավազ աֆրիկացին եթե կարողանա նույնկերպ հաջող հանդես գալ նաև հաջորդ մրցաշրջանում, ապա «Ֆիորենտինան» կդառնա բավականին լավ ցատկահարթակ՝ որևէ գրանդ ակումբի կազմում հայտնվելու համար։

Ռիկարդո Օրսոլինի

🇮🇹 Իտալիա
23 տարեկան
«Բոլոնյա»

Իսկ ահա Օրսոլինիի մասին գիտեք հավանաբար շատերդ (Իտալիա-Հայաստան հանդիպման՝ իտալացիների 9 գոլերից մեկի հեղինակը)։ Ժամանակին «Յուվենտուսի» ամենահեռանկարային ֆուտբոլիստերից մեկն է, ով այդպես էլ գեթ մեկ պաշտոնական հանդիպում չանցկացրեց թուրինցիների կազմում։ Երեք մրցաշրջան Բ Սերիայում, այնուհետև անհաջող գործուղում «Ատալանտա», իսկ հետո․․․ հետո հաջող մրցաշրջան է անցկացնում ներկայիս ակումբում՝ վարձավճարով, որից հետո «Բոլոնյան» գնում է նրա ամբողջական տրանսֆերը՝ 15 մլն եվրոյով։ Եվ մեր հերոսը շարունակում է արդյունավետ հանդես գալ նաև այս մրցաշրջանում՝ իր նկատմամբ հետաքրքություն առաջացնելով մի քանի ավելի բարձրակարգ ակումբների կողմից․ «Նապոլի», «Միլան» և ․․․ «Յուվենտուս»։ «Բոլոնիան» պատրաստ է վաճառել իր առաջատարին, սակայն տրանսֆերի դիմաց ցանկանում է վաստակել 70 միլիոն եվրո: «Այդպիսի խոսակցություններ չեն եղել, մենք բանակցություններ չենք վարել «Յուվենտուսի» հետ: Օրսոլինին արժե 70 միլիոն եվրո և վերջ», – մեջբերում է Բոլոնիայի տեխնիկական տնօրեն Վալտեր Սաբատինին ETV- ին:

Հավանաբար Սաբատինին արդեն իսկ մասնակցե՞լ է «Վերոնայի»՝ «ինչպես վերավաճառել ֆուտբոլիստներին» դասընթացներին 🤔

Իսկ եթե լուրջ, Օրսոլինին իրականում դժվար թե արժե 70 մլն, սակայն, միևնույն է «Բոլոնյան» հաջորդ մրցաշրջանում կարող է բավականին մեծ գումար վաստակել նրա տրանսֆերից, իսկ շռայլ առաջարկներ երիտասարդ իտալացու համար, իհարկե կլինեն։

Մարաշ Կումբուլա

🇦🇱 Ալբանիա
20 տարեկան
«Վերոնա»

Մեր վերջին հերոսը տարբերվում է նախորդներից․ նա դեռ նոր է թակում մեծ ֆուտբոլի դռները, չի պատկանում ոչ մի այլ ակումբի, «Վերոնայի» սան է, կարելի է պարզապես կարճ ասել՝ made in Verona: 20-ամյա ալբանացի պաշտպանը արդեն երրորդ և առաջին լիարժեք մրցաշրջանն է անցկացնում «Վերոնայի» կազմում։ Եվ նրա դերը թիմի ներկայիս հաջող մրցելույթներում բավականին մեծ է։ Նրա հուսալի և իր տարիքի համար բավականին հասուն խաղը շատ մեծ գործոն է թիմի պաշտպանական սեկտորում․ մի պահ ուշադրություն դարձրեք՝ թիմը բաց է թողել 26 գնդակ այս մրցաշրջանում և այդ ցուցանիշով «Վերոնան» չորրորդն է Ա Սերիայում։ Տպավորիչ ցուցանիշ է, համաձայնվեք։ Եվ ներկա դրությամբ Կումբուլան համարվում է թիմի պաշտպանության հենասյունը։ Պատահական չէ, որ նրա ծառայություններով հետաքրքրված են «Յուվենտուսը», «Նապոլին», միլանյան գրանդները, «Մանչեսթեր Սիթին»։ Թե արդյունքում ո՞ր ակումբի գույները պաշտպանելիս կտեսնենք երիտասարդ ալբանացուն, կիմանանք առաջիկա տրանսֆերային պատուհանի ժամանակ։

Վար Բաբայան

Շարքի նախորդ մասերը

Քեյ-ֆուտբոլի (K-Football) ակնկալիքով

Երիտասարդ աղվեսների ոդիսականը շարունակվում է

Ֆուտբոլային սկաուտ․ Ռեալ Սոսեյդադ, Սևիլյա

Ֆուտբոլային սկաուտ․ Ատալանտա, Լացիո

Ֆուտբոլային սկաուտ․ Վուլվերհեմփթոն, Էվերտոն

Ֆուտբոլային սկաուտ․ Վերդեր, Այնտրախտ

Էրեդիվիզիի ամենահեռանկարային ֆուտբոլիստները (Մաս 3)

Էրեդիվիզիի ամենահեռանկարային ֆուտբոլիստները (Մաս 2)

Էրեդիվիզիի ամենահեռանկարային ֆուտբոլիստները (Մաս 1)

Պորտուգալիան՝ ցատկահարթակ դեպի մեծ ֆուտբոլ