Նիդերլանդական Էրեդիվիզին տասնամյակներ շարունակ մնում է թոփ-5 առաջնությունների համար տաղանդավոր և հեռանկարային ֆուտբոլիստներ մատակարարող գլխավոր լիգաներից մեկը Եվրոպայում։
ArmSport․am-ը նախորդ անգամները անդրադարձել էր Բելգիայի և Պորտուգալիայի առաջնություններին, որոնք ևս ավանդաբար հանդիսանում են Եվրոպայի գլխավոր ֆուտբոլային դարբնոցներ։ Շարունակում ենք Ձեզ ծանոթացնել այս անգամ Նիդերլանդների առաջնության ամենահեռանկարային ներկայացուցիչների հետ։
Արմանդո Օբիսպո
🇳🇱 Նիդերլանդներ
«Վիտես»
20 տարեկան
Արմանդոն ՊՍՎ-ի սան է և «Վիտեսում» նա խաղում է վարձավճարով։ 20-ամյա պաշտպանի համար սա առաջին լիարժեք մրցաշրջանն է, և նա դեռևս ամբողջովին արդարացնում է իրեն։ ՊՍՎ-ն, որը, մեղմ ասած, բավականին լուրջ խնդիրներ ունի պաշտպանությունում այս մրցաշրջանում, հանձինս Օբիսպոյի՝ հաջորդ մրցաշրջանում կարող է ակնկալել, որ այդ հարցը մասամբ լուծելի կդարձնի։ Արմանդոն աչքի է ընկնում իր տարիքի համար բավականին գրագետ խաղով, արագաշարժ է և հուսալի պաշտպանությունում։ Միգուցե հաջորդ մրցաշրջանը ՊՍՎ-ի կազմում նրա համար դռներ կբացվի դեպի Նիդեռլանդների հավաքական (այժմ հանդես է գալիս երիտասարդական հավաքականում) և մենք կտեսնենք նրան հետագայում նաև եվրոպական որևէ թոփ ակումբում։
Կո Իտակուրա
🇯🇵 Ճապոնիա
«Գրոնինգեն»
23 տարեկան
Ճապոնացի պաշտպանի նկատմամբ ժամանակին տևական հետաքրքրություն էր ցուցաբերում «Մանչեսթեր Սիթին», սակայն երիտասարդ ֆուտբոլիստը, ով, ի դեպ, արդեն պարբերաբար հրավիրվում է ծագող արևի երկրի հավաքական, որոշեց եվրոպական կարիերան միանգամից չսկսել թոփ լիգայում, այլ նախընտրեց տեղափոխվել Էրեդիվիզիի համեմատաբար համեստ ակումբներից մեկը՝ «Գրոնինգեն»։ Եվ դա անկասկած ճիշտ որոշում էր․ նա արդեն հարմարվել է եվրոպական ֆուտբոլին, այս մրցաշրջանում ցուցադրում է կայուն, հուսալի խաղ և կարելի է ասել, որ նա պատրաստ կլինի հաջորդ մրցաշրջանը արդեն սկսել թոփ-5 լիգաների որևէ ակումբում։ Կոն ունիվերսալ է, և դրանում էլ կայանում է նրա նկատմամբ թոփ ակումբների կողմից մեծ հետաքրքրվածությունը․ նա հուսալի է թե պաշտպանությունում, թե հենակետայինի դիրքում։
Անդրե Օնանա
🇨🇲 Կամերուն
«Այաքս»
23 տարեկան
«Այաքս»․․․ նախորդ մրցաշրջանից շատերի հուշերում դեռ մնացել են նիդերլանդական գրանդի արկածները Չեմպիոնների Լիգայում։ Եվ Անդրեն այն հերոսներից մեկն է, ում հուսալի խաղը դարպասում թույլ տվեց ամստերդամյան ակումբին հասնել այդպիսի արդյունքների։ Նրա խաղընկերը՝ Զիեշը, մի քիչ ուշացումով, բայց վերջապես գտավ նոր հանգրվան ֆուտբոլային երկնակամարում՝ ի դեմս «Չելսիի», որի կազմում նա կխաղա հաջորդ մրցաշրջանից։ Եվ արդեն, 90 տոկոս հավանականությամբ «Այաքսի» դարպասապահ Անդրե Օնանան ամռանը կտեղափոխվի Լոնդոնի «Չելսի». Voetbal Nieuws-ի հաղորդմամբ, Օնանան որոշել է տեղափոխվել Լոնդոն՝ չնայելով ՊՍԺ-ի և «Բարսելոնայի» հետաքրքրություններին: Հաղորդվում է, որ ֆուտբոլիստի տրանսֆերային արժեքը կկազմի 40-50 մլն եվրո:
Դոնիել Մալեն
🇳🇱 Նիդերլանդներ
ՊՍՎ
21 տարեկան
Չնայած ՊՍՎ-ի համար այս մրցաշրջանը դասավորվում է ոչ այդքան բարեհաջող, սակայն նիդերլանդական գրանդի (տեղական մասշտաբով) համար մեկ լուսավոր կետ, այնուամենայնիվ, կա՝ Դոնիել Մալեն։ Շատ մասնագետների կարծիքով հենց նա էլ այս մրցաշրջանի գլխավոր բացահայտումն է։ Մալենը թիմի լավագույն ռմբարկուն է, ունի առաջատարի հատկանիշներ և արդեն իսկ հրավիրվում է ազգային հավաքական, որտեղ նույնիսկ հասցրել է աչքի ընկնել խփած գոլով։ Այսպիսի մեծ քայլերով հավանականությունը շատ է, որ եվրոպական գրանդներն արդեն այս ամառ «մեծ որս» կսկսեն տաղանդավոր ֆուտբոլիստի համար։
Էրեդիվիզին շատ հարուստ է երիտասարդ, տաղանդավոր և հեռանկարային ֆուտբոլիստներով, այդ իսկ պատճառով առաջնության մյուս հերոսներին կանդրադառնանք շարքի հաջորդ մասերում։
Վար Բաբայան
Շարքի նախորդ մասերը
Պորտուգալիան՝ ցատկահարթակ դեպի մեծ ֆուտբոլ
Բելգիան շարունակում է մնալ ապագա աստղերի դարբնոց (Մաս 2)
Բելգիան շարունակում է մնալ ապագա աստղերի դարբնոց (Մաս 1)
Սամուրայների նոր սերունդը Եվրոպայում
Բրազիլիայի առաջնության ամենահեռանկարային ֆուտբոլիստները (Մաս 2)
Բրազիլիայի առաջնության ամենահեռանկարային ֆուտբոլիստները (Մաս 1)
MLS-ի 7 ֆուտբոլիստներ, ովքեր կարող են փայլել Հին աշխարհում
