Հունիսի 23-26-ը Խորվաթիայի Պորեկ քաղաքում կայացած ձյուդոյի պատանիների Եվրոպայի առաջնությունում Հայաստանը ներկայացնող 6 մարզիկներից 2-ին հաջողվեց մեդալներ նվաճել։
Հավաքականի գլխավոր մարզիչներ Հովհաննես Դավթյանի և Դավիթ Խաչատրյանի գլխավորությամբ մրցավայր էին մեկնել Գոռ Սաֆարյանը և Արշակ Բեկչյանը (50կգ), Վահե Աղասյանը և Էրիկ Սաղաթելյանը (55կգ), Խաչատուր Բաղդասարյանը (60կգ) և 81 կգ քաշային Գոռ Կարապետյանը։
Մրցումային առաջին օրը 55 կգ քաշային Վահե Աղասյանը նվաճեց բրոնզե մեդալ, իսկ 50 կգ քաշային Գոռ Սաֆարյանը զբաղեցրեց 5-րդ հորիզոնականը։
Մրցումային վերջին օրը տատամի դուրս եկավ 81 կգ քաշային Գոռ Կարապետյանը, ով 4 հաղթանակ տոնելուց հետո, ոսկե մեդալի համար պայքարում զիջեց ուկրաինացի մարզիկին և նվաճեց արծաթե մեդալ։
ArmSport-ի հետ զրույցում Կարապետյանը նշեց, որ իր մոտիվացիան մարզումների ժամանակ ու օրվա մնացած ժամերին եղել է մեդալ նվաճելու մեծ ցանկությունը։
«Կիսաեզրափակչում հաղթելուց հետո ավելի ուրախ էի, գիտակցում էի, որ արդեն մեդալ ունեմ։
Այս անգամ ինձ մոտ չստացվեց ոսկե մեդալ նվաճել, պատասխանատվության զգացումը մեծ էր, ինչն էլ մի փոքր լարվածություն էր առաջացրել։ Մարզիչներիս հետ կաշխատենք սխալների վրա, ամեն ինչ կանեմ հաջորդ մրցաշարում ոսկե մեդալակիր դառնալու համար», -եզրափակեց Կարապետյանը։
Հիշեցնենք, որ Գոռ Կարապետյանը մայիսին, Ռումինիայում կայացած Եվրոպայի Գավաթի առաջնությունում ևս արծաթե մեդալ էր նվաճել։
