ՖԻՖԱ-ն ԱԱ-ին վերաբերվող ծրագիր է ուղարկել ազգային ասոցիացիաներին՝ առաջարկելով Աշխարհի առաջնությունն անցկացնել երկու տարին մեկ անգամ՝ սկսած 2026 թվականից, հայտնում է Cadena SER-ը:
Ըստ ծրագրի, փոփոխությունները կընդունվեն ազգային հավաքականների համար նոր օրացույցի ներդրման շրջանակում: Ենթադրվում է, որ դա կնվազեցնի այն օրերի թիվը, որոնք ֆուտբոլիստները անցկացնում են ազգային հավաքականների ճամբարում՝ տարեկան 50-ից մինչև 30 օր:
Բացի այդ, կփոխվի ընտրական մրցաշարերի ձևաչափը, որակավորման շրջանակներում թիմերը կանցկացնեն ոչ ավելի, քան 7 հանդիպում, ինչը թույլ կտա խաղերը անցկացնել երկու պատուհաններով՝ հոկտեմբերին և մարտին:
ՖԻՖԱ-ն կարծում է, որ այս փոփոխությունները կօգնեն նվազեցնել ֆուտբոլիստների ծանրաբեռնվածությունը: Որպես ապացույց ՝ կազմակերպությունը բերել է Լիոնել Մեսսիի օրինակը, ով 2014-ից 2018 թվականներն անցել է ավելի քան 324 հազար կմ՝ հավաքականի խաղերին մասնակցելու համար: Կազմակերպության գնահատականներով՝ բարեփոխումները կնվազեցնեն այս տարածությունը մինչև 157 հազար կմ՝ 2026-ից մինչև 2030 թվականը ընկած ժամանակահատվածում:
Միևնույն ժամանակ, քառամյա ժամանակահատվածում եվրոպական թիմերի հանդիպումների ընդհանուր թիվը 44-ից կկրճատվի 43-ի, իսկ հարավամերիկյանինը` 38-ից 34-ի:
Այս տարվա մայիսին Սաուդյան Արաբիայի ֆուտբոլի ֆեդերացիան ՖԻՖԱ-ի կոնգրեսում առաջարկեց Աշխարհի առաջնությունն անցկացնել երկու տարին մեկ: Գաղափարին աջակցել են 166 ազգային ֆեդերացիաներ, 22-ը դեմ են եղել: ՖԻՖԱ-ն հայտարարել է, որ մտադիր է ուսումնասիրել մրցաշարը երկու տարին մեկ անցկացնելու տարբերակը:
Սպասվում է, որ դա ոչ միայն կնվազեցնի հանդիպումների քանակը, այլև կավելացնի դրանց արժեքը և արդիականությունը:
Միաժամանակ, ՈՒԵՖԱ-ի ղեկավար Ալեքսանդր Չեֆերինը քննադատել է այս առաջարկը: Նա հայտարարել է, որ եվրոպական ասոցիացիաները բոյկոտելու են մրցաշարը, եթե այն անցկացվի երկու տարին մեկ անգամ: ՈՒԵՖԱ-ն նաև ասել է, որ դա կնվազեցնի աշխարհի առաջնության կարևորությունը, ռիսկային կլինի խաղացողների առողջության համար և կզրկի կանանց մրցաշարերն ավելի հեղինակավոր դարձնելու հնարավորությունից:
