«Արմենպրես» պետական լրատվական գործակալության մամուլի սրահում քիչ առաջ ավարտվեց Հայաստանի մարմնամարզության հավաքականի գլխավոր մարզիչ Հակոբ Սերոբյանի, հավաքականի անդամներ Արթուր Դավթյանի, Արթուր Ավետիսյանի, Վահագան Դավթյանի, Գագիկ Խաչիկյանի ասուլիսը։
Հիշեցնենք՝ ԵԱ-ում, որն անցկացվում էր շվեյցարական Բազելում, Հայաստանի ներկայացուցիչ Արթուր Դավթյանը ոսկե մեդալ է նվաճել նժույգաթափերում։ Նույն մրցաձևում չորրորդ հորիզոնականն է զբաղեցրել թիմի նորեկ, 18 –ամյա Գագիկ Խաչիկյանը, որին ընդամենը 033 հազարերորդական միավոր չի բավարարել բրոնզե մեդալակիր դառնալու համար: Օղակների վրա Արթուր Ավետիսյանը զբաղեցրել է չորրորդ, իսկ Վահագն Դավթյանը՝ ութերորդ տեղը։ Մրցումային վերջին օրը՝ ապրիլի 25-ին, Արթուր Դավթյանը հենացատկում զբաղեցրել է 6-րդ հորիզոնականը։
ArmSport-ն ավելի վաղ զրուցել էր հավաքականի գլխավոր մարզիչ Հակոբ Սերոբյանի և հավաքականի ներկայացուցիչ Արթուր Դավթյանի հետ։
Արթուր Ավետիսյան— Վիրահատությունից հետո սա առավելագույնն էր։ Շնորհակալ ենք մեր մարզիչներին, որովհետև ինչին հասնում ենք, ինչ անում ենք նրանց շնորհիվ է։ Մեր առջև դրվածը փորձեցինք անել։ Իմ վարժության բարդությունն այնքան էլ բարձր չէր, դրա համար 4-րդ հորիզոնականը զբաղեցրեցի։ Հիմա ուսիս վրա պիտի աշխատենք, մի քիչ ցավեր կան։ Պիտի դրանք վերացնենք, հետո մտածեմ վարժությունս բարդացնելու ուղղությամբ, որ Աստծո հաջողությամբ, ավելի բարձր արդյունքներ գրանցեմ մարզիչների հետ միասին։
Գագիկ Խաչիկյան- Առաջին անգամ էի Եվրոպայի առաջնությունում մեծահասակների կարգում հանդես գալիս։ Այնքան էլ գոհ չեմ ելույթիցս։ Մի քիչ լարվածություն եղավ, ինչի պատճառով կատարումս մի քիչ թերի էր։ Բայց սխալներս կշտկեմ ու մյուս անգամ ավելի լավ հանդես կգամ։ Այս մասնակցությունն ինձ փորձ տվեց։ Մրցում առ մրցում մենք փորձ ենք ձեռք բերում ու լարվածությունը քչանում է։
Հակոբ Սերոբյանը, շարունակելով Խաչիկյանին, ասաց․ «Ինքն ասում է լարվածություն, բայց չընկավ, արեց մինչև վերջ։ Օլիմպիական չեմպիոններ կային, որոնք հենց որակավորման առաջին օրը ուղղակի սայթաքեցին, շատ լուրջ սայթաքումներ։ Իսկ ինքը երիտասարդ, առաջին անգամ գալիս է, մասնակցում մեծահասակների մեջ ու իր վարժությունը կատարում է։ Նա կարող էր շատ լավ անել, բայց նա չի ընկել, պայքարել է, կռիվ է տվել, սա շատ կարևոր է։ Խաչիկյան Գագիկը շուտով իր խոսքն ասելու է։ Շատ լավ է, որ մենք ապագա ունենք»։
Ասուլիսն ամբողջությամբ կարող եք դիտել ստորև։