Էշի Ֆոլան՝ Երևանում. Կամպանյայի, միգուցե, վերջին հնարավորությունը կամ լյուքսեմբուրգյան վրեժի հետքերով

Կիրակի՝ օգոստոսի 31-ին, Նիոնում՝ ՈՒԵՖԱ-ի շտաբ բնակարանում կայացավ Եվրոպա Լիգայի որակավորման երկրորդ փուլի վիճակահանությունը:

• Կատարյալին մոտ վիճակահանություն․ Ճակատագիրը կարող է մեր հանդեպ այլևս այսքան շռայլ չգտնվել

Վիճակահանությունից հետո «Արարատ-Արմենիային» բոլորն անվանում են ամենաբախտավոր հայկական ակումբը, քանի որ մեր առջև կրկին կանաչ գորգ է փռվել՝ հաշվի առնելով նաև հնարավոր երրորդ փուլի մրցակցի գործոնը:

«Ֆոլայի» արգելքը հաղթահարելու դեպքում «Արարատ-Արմենիան» երրորդ փուլում կմրցի սլովենական «Ցելյեի» հետ: Հավատացեք, 3 փուլում էլ մեր թիմին բաժին են հասնում հնարավոր ամենահարմար մրցակիցները: Նույն պատմությունը, նաև, նախորդ տարի էր. «Լինքոլն», «Սաբուրթալո», «Դյուդելանժ»:

Այսքանից հետո ԵԼ-ում առաջ չգնալը կհամարվի ձախողում, իսկ Կամպանյան, ամենայն հավանականությամբ, կհեռացվի:

Տարբերությունն այն է, որ այս անգամ մեր թիմը, զգացվում է, որ պատրաստ չէ. մտավախությունը, որ չենք անցնի նաև Լյուքսեմբուրգի թիմի արգելքը, լիովին տեղին է:

Այս պահին թիմի հստակ խաղաոճ չի նկատվում: Ֆուտբոլիստներն իրենց դիրքերում չեն, չունեն այն վստահությունը, որը պետք է ունենան նման խաղերում և այլ խնդիրներ, որոնք առաջացան Վարդան Մինասյանի հեռանալուց առաջ: Սակայն ամենևին ակնարկ չկա, որ Մինասյանը պետք է մնար, քանի որ նախորդ առաջնության վերջին խաղերում նկատվում էր, որ հայ փորձառու մարզիչը կորցնում է թիմի խաղի կառավարումը, բայց այսօր չենք խոսելու մեր թիմից:

• Մրցակից՝ Լյուքսեբուրգից.

Փորձենք հասկանալ, թե ինչ է իրենից ներկայացնում մեր մրցակիցը. կրկին Լյուքսեմբուրգի թիմ: «Արարատ-Արմենիայի» ոչ մի երկրպագու չի մոռացել նախորդ տարվա փլեյ-օֆֆի հանդիպումը՝ «Դյուդելանժի» հետ: Ինչպես, օրինակ, «Ալաշկերտը», որ ավանդաբար մակեդոնական թիմ է ստանում մրցակցի դերում, կարծես, այստեղ էլ այլ ավանդույթ է ձևավորվում:

124 տարվա պատմություն ունեցող Էշ քաղաքը ներկայացնող ակումբն այսքան տարվա ընթացքում չեմպիոն է հռչակվել 7 անգամ, ևս 3 անգամ դարձել է երկրի գավաթակիր:

Համեստ ակումբ, սակայն եվրագավաթներում խաղալու քիչ փորձ չունի: 2013/14 մրցաշրջանից ի վեր Լյուքսեմբուրգը եվրոպական ասպարեզում ներկայացուցիչ ունի՝  ի դեմս «Ֆոլայի»: Թիմը լավագույն արդյունքը գրանցել է 2017/18 մրցաշրջանում, երբ հասավ ԵԼ-ի որակավորման երրորդ փուլ՝ մինչ այդ հաղթահարելով մոլդովական «Միլսամիի» ու Բաքվի «Ինտերի» արգելքը, սակայն շվեդական «էստերսունդը» փակեց վերջինիս ճանապարհը:

• Թիմի կազմն ու ներքին առաջնությում վերջին տարիների հաջողությունները.

Թիմում հիմնականում ելույթ են ունենում տեղացի ֆուտբոլիստներ: Լեգիոներներ կան Ֆրանսիայից, Բոսնիայից, մեկական խաղացողներ՝ Կոնգոյից, Բելգիայից ու Պորտուգալիայից: Թիմի հայտացուցակում, որ հանդիսանում է Լյուքսեբուրգի հավաքականի շարժիչ ուժ, միայն Ստեֆանո Բենսին է:

Նախորդ մրցաշրջանում թիմը 17 խաղում վաստակեց 39 միավոր՝ մոտակա մրցակից «Պռոգրեսին» գերազանցելով 2 միավորով: Թիմը տարավ 12 հաղթանակ, խաղաց 3 ոչ-ոքի, կրեց 2 պարտություն՝ այդ ընթացքում խփելով 47, սեփական դարպասն ընդունելով 17 գնդակ: Նախորդ տարվա թիմի լավագույն ռմբարկուները՝ Քեն Կոռալն ու Մուսա Սեյդին այլևս ակումբում չեն: Թիմի ներկայիս կազմը մոտ տրանսֆերային արժեքով մոտ 3 անգամ զիջում է «Արարատ-Արմենիայի» կազմին:

Նոր մրցաշրջանում «Ֆոլան» 2 խաղից հետո 4 միավորով 5-րդ տեղում է:

Թիմի գլխավոր մարզիչը բելգիացի Սեբաստիեն Գրանդյենն է: 50-ամյա մասնագետը կարիերան սկսել է 2006 թ-ից՝ գլխավորելով բելգիական «Վիրտոնը»: Հետագայում հիմնականում մարզել է Լյուքսեմբուրգի ակումբներ: Ի դեպ, ինչպես «Արարատ-Արմենիան», այնպես էլ «Ֆոլան» նոր գլխավոր մարզչին նշանակել է սույն թվականի հուլիս ամսին:

Արմեն Գարամյան