Այս հանգստյան օրերին կվերսկսվի նաև Իտալիայի Ա Սերիայի առաջնությունը։ Հունիսի 22-ին, մոտ եռամսյա դադարից հետո, կմեկնարկի 27-րդ տուրը, իսկ մինչ այդ, հունիսի 20-21-ին կկայանան 25-րդ տուրից հետաձգված 4 հանդիպումներ, «Տորինո»- «Պարմա», «Վերոնա»- «Կալյարի» (հունիսի 20), «Ատալանտա»- «Սասուոլո», «Ինտեր»- «Սամդորիա» (հունիսի 21)։
Առաջիկա 12 տուրերը խոստանում են պարգևել մեզ անզիջում և թեժ հանդիպումներ։ Ի տարբերություն Գերմանիայի և Անգլիայի առաջնությունների, այստեղ գլխավոր ինտրիգը՝ ո՞վ կդառնա առաջնության չեմպիոնը, դեռ պահպանվում է։
Չեմպիոնության համար պայքարում ֆավորիտները «Յուվենտուսը» և «Լացիոն» են, որոնց խաղաքարտերը կարող է խառնել նաև «Ինտերը»։ Իսկ ահա լավագույն քառյակում հայտնվելու համար կպայքարեն «Ատալանտան» և «Ռոման», որոնց պայքարին տեսականորեն կարող է միանալ նաև «Նապոլին»։
Ինչ վերաբերվում է վերջինիս, ապա նեապոլիտանացիները հունիսի 17-ին, Իտալիա-2019/20-ի գավաթի խաղարկության եզրափակիչում հաղթեցին «Յուվենտուսին»: Հանդիպումը կայացավ Հռոմում ՝ Օլիմպիական մարզադաշտում, որտեղ Ջենարո Գատուզոյի թիմը հետխաղյա 11-մետրանոց հարվածաշարում հաղթեց 4-2 հաշվով: Այդպիսով, «Նապոլին» արդեն իսկ ապահովել է իր տեղը Եվրոպա լիգայում և նրանց համար առաջիկա 12 խաղերում գլխավոր խնդիրը կլինի լավագույն քառյակում հայտնվելը։
Եվրոպա լիգայի ուղեգիր տվող 5-7-րդ տեղերի համար ևս անզիջում պայքար է սպասվում։ Ինչպես վերևում արդեն նշեցինք, նեապոլիտանացիները արդեն իսկ ստացել են այդ մրցաշարի ուղեգիրը, երկրորդ ուղեգիրը, ամենայն հավանականությամբ կստանա կամ «Ատալանտան», կամ Հենրիխ Մխիթարյանի «Ռոման»․ նրանցից մեկը կուղևորվի ՉԼ, մյուսը՝ ԵԼ։
Իսկ ահա բաղձալի 7-րդ տեղի համար կպայքարեն 7-13-րդ տեղերում գտնվող թիմերը, որոնց, զուտ մաթեմատիկորեն, կարող են միանալ նաև առաջնության 14-18-րդ տեղերը զբաղեցնող թիմերը, բայց դրա հավանականությունը շատ քիչ է։
Մրցաշարային աղյուսակի երկրորդ հատվածում թիմերի դասավորվածությունը այնքան խիտ է, որ օրինակ, «Ֆիորենտինան», «Կալյարին» և «Ուդինեզեն» կարող են միանալ Եվրոպայի Լիգայի համար մրցավազքին, իսկ հանգամանքների այլ դասավորվածության դեպքում՝ պայքարել առաջնությունում տեղը պահպանելու համար։
Ինչ վերաբերվում է առաջնությունում հենց տեղը պահպանելու խնդրին․ ներկա պահին Ա Սերիայի երկու ընդգծված անհաջողակներն են ՍՊԱԼ-ը և «Բրեշիան»։ Իսկ ահա 17-18-րդ տեղերը զբաղեցնող «Լեչեն» և «Ջենոան» դեռ կպայքարեն իրենց տեղը իտալական ֆուտբոլային էլիտայում պահպանելու համար։
Ա Սերիայի ռմբարկուների ցուցակը վստահորեն գլխավորում է «Լացիոյի» հարձակվող Չիրո Իմոբիլեն, ում ակտիվում 27 խփած գնդակ է։ Նա նաև երկրորդն է «Ոսկե խաղակոշիկի» հավակնորդների վարկանիշում՝ զիջելով «Բավարիայի» հարձակվող Ռոբերտ Լևանդովսկուն 4 գնդակ։ Սակայն Բունդեսլիգան մոտենում է ավարտին, իսկ Իմոբիլեն դեռ 12 հանդիպում ունի անցկացնելու Ա Սերիայի շրջանակում, այնպես որ, իտալացին դեռ լավ հնարավորություն ունի շրջանցելու լեհ հարձակվողին։ Ա Սերիայի ռմբարկուների ցուցակում Իմոբիլեին հաջորդում են Կրիշտիանու Ռոնալդուն «Յուվենտուսից»՝ 21 գոլ և «Ինտերի» հարձակվող Ռոմելու Լուկակուն՝ 17 գոլ։
Առաջնությունում գոլային փոխանցումների քանակով առաջատարը Իմոբիլեի խաղընկեր Լուիս Ալբերտոն, ով հասցրել է 12 արդյունավետ փոխանցում կատարել թիմակիցներին։
Առաջիկա հանդիպումների օրացույցը․
25-րդ տուր․ հետաձգված հանդիպումներ
Հունիսի 20
«Տորինո»- «Պարմա» 21։30
«Վերոնա»- «Կալյարի» 23։45
Հունիսի 21
«Ատալանտա»- «Սասուոլո» 21։30
«Ինտեր»- «Սամդորիա» 23։45
27-րդ տուր
Հունիսի 22
«Ֆիորենտինա »- «Բրեշիա» 21:30
«Լեչե»- «Միլան» 21:30
«Ինտեր»- «Սամդորիա» 21:30
«Բոլոնյա»- «Յուվենտուս» 23:45
Հունիսի 23
ՍՊԱԼ- «Կալյարի» 21:30
«Վերոնա»- «Նապոլի» 21:30
«Ջենոա»- «Պարմա» 23:45
«Տորինո»- «Ուդինեզե» 23:45
Հունիսի 24
«Ինտեր»- «Սասուոլո» 21:30
«Ատալանտա»- «Լացիո» 23:45
«Ռոմա»- «Սամդորիա» 23:45
Վար Բաբայան
