Ֆուտբոլի Հայաստանի Բարձրագույն խմբի այս տարվա առաջնությունը շարունակում է ապացուցել, որ հայկական ֆուտբոլում առաջընթացի քայլերն ակնհայտ են: Համաձայնե՛ք, մեր առաջնությունը վաղուց այսքան պայքարային չի եղել, խաղերն այսքան անկանխատեսելի չեն եղել, առաջնության նկատմամբ հետաքրքրությունն էլ երբեք այսքան շատ չի եղել: Լավագույն վեցնյակի պայքարում, նույնիսկ, լուրջ խնդիրների առաջ կանգնած «Արարատը» յուրաքանչյուր թիմի հետ պայքարում է մինչև վերջ ու նաև միավորներ խլում: «Շիրակը» նախանձելի կարողությամբ խաղերից քաղում է առավելագույնը, «Արարարտ-Արմենիան» այն մրցակցությունից դուրս չէ, ինչպես սպասվում էր, «Լոռին» նոր մարզչական շտաբով շարունակում է ապրել, իսկ «Ալաշկերտի» հաջողությունները փոփոխական են:
23-րդ տուրը կարող էր ամբողջովին խաղաղասեր լինել, եթե Ուրոշ Նենադովիչը ճակատագրի հեգնանքով 93-րդ րոպեին չտխրեցներ իր նախկին թիմին, բայց ամեն ինչի մասին հերթով:
«Նոա»-«Արարատ-Արմենիա»՝ 1-1
Երկրորդ տուրում անընդմեջ Մինասյանի թիմը խաղի մեկնարկում գնդակ է բաց թողնում: Եթե «Արարատի» դեմ խաղում ամեն ինչ դասավորվեց «Արարատ-Արմենիայի» սցենարով, ապա «Նոան» կարողացավ կախվել իր ունեցածից: 7-րդ րոպեին խառնաշփոթ իրավիճակում Միխայիլ Կովալենկոն բոլորից շուտ կողմնորոշվեց ու բացեց հաշիվը: 10 րոպե անց Լիմայի ոտնաթաթի դրսի հատվածով կատարված փոխանցումից հետո հյուրերի կենտրոնական պաշտպան Սերգեյ Վակուլենկոն երկրորդ անընդմեջ խաղում գոլի հեղինակ դարձավ: 24-րդ րոպեին Կրուշնաուսկասի հարվածից հետո գնդակը դիպավ դարպասաձողին: 1 րոպեն անց Դեոբալդը կարող էր աչքի ընկնել, սակայն կրկին չստացվեց: Դրվագից վայրկյաններ առաջ հաջողությանը մոտ էր Օտուբանջոն: Վերջինս ևս մեկ շանս ուներ առաջին խաղակեսում, սակայն Վիմերկատին իր բարձրության վրա էր: Պետք է խոստովանել, որ Մինասյանի թիմն առաջին խաղակեսում պաշտպանությունում մեծ բացթողումներ ուներ: Երկրորդ խաղակեսում ևս թիմերը շատ ակտիվ էին, սակայն հաջողության հասնել չստացվեց: «Արարարտ-Արմենիան» շարունակում է անպարտելիության շարքը: Մինասյանը թիմն առաջնությունում 10 խաղ անպարտելի է, բայց առաջնության վերսկսումից հետո 6 խաղում տարել է 3 հաղթանակ, խաղացել 3 ոչ-ոքի, ինչը գոհացուցիչ արդյունք չէ գործող չեմպիոնի համար: «Նոան» վերջին 6 խաղում տարել է 2 հաղթանակ, խաղացել 3 ոչ-ոքի ու կրել 1 պարտություն:
«Ալաշկերտ»-«Շիրակ»՝ 1-2
Առաջնության վերսկսումից հետո հենց առաջին տուրում «Լոռիից» կրած պարտությունից հետո «Շիրակը» միայն բարձրանում է: «Լոռիի» խաղին հաջորդած 5 խաղում Բիչախչյանի թիմը տարել է 3 հաղթանակ ու խաղացել 2 ոչ-ոքի: «Ալաշկերտն» այս պահին ամենաանկայուն թիմերից մեկն է: Վերջին 6 խաղում թիմը հաղթել է 2 անգամ, 4 անգամ էլ պարտվել է: «Շիրակի» դեմ խաղում տարածքային ու խաղային առավելությունը երևանյան թիմի կողմն էր, սակայն եթե թիմում ունես Կոնեի պես հարձակվող, կարող ես մեկ պահ ստեղծել նրա համար ու «ձեռքերդ լվանալ»: «Ալաշկերտը» ինչքան էլ որ մաքառում էր դաշտում, չէր հաջողվում հաջողության հասնել: 76-րդ րոպեին Գևորգյանի հարվածից հետո Չանչարևիչն անհաջող հետ մղեց գնդակը, իսկ վրա հասած Կոնեն «դրեց» գնդակը դարպասում: «Ալաշկերտը» մարտադաշտ նետեց ողջ ուժերը՝ Էդգար Մանուչարյանի գլխավորությամբ: Դրվագներից մեկում գնդակը հետ մղվեց Երմակովի պաշտպանած դարպասի հորիզոնական ձողից, սակայն 88-րդ րոպեին Մարմենտինին ի վերջո կարողացավ հավասարեցնել հաշիվը: Երբ թվում էր, որ խաղն այդպես էլ կավարտվի, խաղադաշտում իր ներկայության մասին հիշեցրեց «Ալաշկերտի» նախկին ռմբարկու Ուրոշ Նենադովիչը: Սերբ հարձակվողը 93-րդ րոպեին տպավորիչ հարվածով տխրեցրեց նախկին թիմակիցներին ու 3 միավոր պարգևեց իր արդեն հարազատ «Շիրակին»: Ի դեպ, Ուրոշը չտոնեց նախկին թիմի դարպասն ուղարկած գնդակը: Խաղը հոբելյանական էր թիմի բազմափորձ գլխավոր մարզիչ Վարդան Բիչախչյանի համար: Հեղինակավոր մարզիչը Գյումրիի թիմի ղեկին ԲԽ-ում անցկացնում էր 300-րդ հանդիպումը:
«Արարատ»-«Լոռի»՝ 1-1
Կարելի է ասել, որ հերթական անգամ «Արարատը» խաղաց առանց գլխավոր մարզչի: Սակայն պետք է փաստել, որ լավագույն վիճակում չէ նաև «Լոռին»: Դավիդ Կամպանյայի դավանած ֆուտբոլն ակնհայտ տարբերվում է Խաշմանյան-Սանամյան զույգի ներարկած ֆուտբոլից: Ակնհայտ է, որ թիմի մարզչական խմբի առաջադրանքերը առավել քան ընկալելի չեն բոլոր ֆուտբոլիստների կողմից:
Խաղը հոբելյանական էր Դեսիրեյի համար, որը 50-րդ խաղն էր անցկացնում «Կանաչ» մարզաշապիկով: Բուն խաղում սպասվում էր, որ «Լոռին» կունենա առավելություն, սակայն «Արարատը, թեկուզ և այս վիճակում, կրկին կռիվ տվեց դաշտում ու հեռացավ մեկ միավորով: Խաղին ներկա չէր նաև թիմի մենեջեր Վալերի Հովհաննիսյանը, որը նաև կատարում է մարզչական աշխատանք՝ տեխնիկական գոտուց: «Արարատը» խաղում կարող էր և հաղթել, եթե վերջնամասում թիմի հարձակվողները շռայլ չգտնվեին: Երկրորդ խաղակեսի սկզբում Դեսիրեի նրբանկատ փոխանցումից հետո Իվուն առաջ մղեց հյուրերին, սակայն 2 րոպե անց փոխարինման մտած Ռամազան Իսաևը պտտեցրած հարվածով հավասարեցրեց հաշիվը՝ 1-1: Հետագայում թիմերին հաջողության հասնել չհաջողվեց, և պետք է ասել, որ «Լոռին» կորցրեց հերթական 2 միավորը: Վերջին 6 խաղում վանաձորյան թիմը տարել է 1 հաղթանակ, խաղացել 4 ոչ-ոքի ու կրել 1 պարտություն: «Արարատը» վերջին 6 խաղում տարել է 1 հաղթանակ, խաղացել է 2 ոչ-ոքի ու կրել 3 պարտություն:
Այսպիսով, առաջնության ավարտից 5 տուր առաջ 45 միավորով առաջատարը «Արարատ-Արմենիան» է: 6 միավոր պակաս ունի Գյումրիի «Շիրակը»: 37 միավորով երրորդ տեղում «Ալաշկերտն» է: 4-ից 5-րդ տեղերը 36-ական միավորով կիսում են «Լոռին» ու «Նոան»: Վեցնյակը 33 միավորով եզրափակում է «Արարատը»:
Արմեն Գարամյան
