Երբ առաջնության մեկնարկից առաջ ֆուտբոլասերների շրջանում հարց էր հնչում, թե ո՞ր թիմը կհավակնի չեմպիոնության, շատերի մոտ 2 թիմի անուն էր շրջանառվում. «Փյունիկ» և «Արարատ-Արմենիա»: Ճիշտ է, հիմա շատերը կմտածեն, որ մասամբ իրականացել է իրենց ասածը, գործող չեմպիոնը կրկին առաջատար է, սակայն «Փյունիկը» անսպասելիորեն դուրս մնաց առաջատար վեցնյակից, իսկ վեցնյակում գտնվող թիմերը կենաց մահու կռիվ են տալիս ամեն միավորի համար: Ահա այսքան անպասելի էր այս առաջնությունը: Կարծում եմ՝ այսպիսի պայքար շատ քչերն էին ակնկալում: Ոչ մի խաղում հնարավոր չէ հստակ ֆավորիտ առանձնացնել, որը հեշտությամբ կհասնի դրական արդյունքի: Պայքար էիք ուզու՞մ: Խնդրե՜մ, ստացե՛ք:
«Շիրակ»-«Նոա»՝ 2-0
Մեր առաջնությունում հերթական դիտարժան տուրը կայացավ: Բացման խաղում, Գյումրիում, «Շիրակը» հյուրընկալել էր «Նոային», սակայն հյուրընկալ չգտնվեց: Առաջին խաղակեսում գնդակը դաշտի կենտրոնում գրեթե չէր մնում: Նոան որոշակի ակտիվություն էր դրսևորում մինչև «Շիրակի» խփած առաջին գնդակը: 36-րդ րոպեին տուգանային հարվածը խաղարկելիս Մկոյանը նկատեց առաջ սլացող Արտեմ Գևորգյանին, որը շատ լավ գործեց մրցակցի տուգանային հրապարակում և արդյունավետ փոխանցում կատարեց Կոնեին, որն էլ այդ դիրքերից վրիպում է, երբ ցանկանում է վրիպել: Ընդունած գոլից հետ «Նոան» անսպասելիորեն ավելի պասիվացավ: Ավելին, 74-րդ րոպեին Սոլոմոն Իմե Ուդոն երկրորդ գնդակն ուղարկեց մրցակցի դարպասը՝ դնելով խաղի վերջակետը: «Շիրակը» շարունակում է վերելք ապրել, իսկ «Նոան» գլորվում է հակառակ ուղղությամբ: 2 տուր առաջ թիմը մեծագույն դժվարությամբ ամենավերջում հաղթանակ կորզեց «Ալաշկերտից», նախորդ տուրում Բորեցի սաները չկարողացան հաղթել, իսկ այս խաղում «Նոան» անատամ ֆուտբոլ խաղաց: Միանշանակ, թիմի խաղի վրա մեծ ազդեցություն ունի խիտ գրաֆիկը: Սա նաև այն դեպքում, երբ «Նոայում» ռոտացիա շատ քիչ է կատարվում: «Շիրակի» համար հաղթական խաղում մի քանի հաղթանակից զատ 2 նշանակալից իրադարձություն եղավ. «Շիրակի» կազմում հոբելյանական 100-րդ խաղում Ուդոն ինքն իրեն նվեր մատուցեց՝ դառնալով գոլի հեղինակ: Եվ խաղադաշտ վերադարձավ Ուրոշ Նենադովիչը: «Նոան» էլ շարունակում է փնտրել «Շիրակի» դարպասի բանալին: Բորեցի գլխավորած թիմն այս առաջնությունում «Շիրակի» դարպասը չի գրավել:
«Արարատ-Արմենիա»-«Արարատ»՝ 4-2
Արարատյան դերբիում գրանցվեց 6 գնդակ: Տրամաբանությանը հակառակ, խաղի 11-րդ րոպեին Դեդեչկոն առաջ մղեց «Արարատին»: Սակայն, 11 րոպե անց Վակուլենկոն մրցակցի տուգանային հրապարակում միայնակ էր մնացել և գլխի հարվածով հավասարեցրեց հաշիվը՝ 1-1: «Արարատ-Արմենիան» շարունակեց ճնշումն ու ընդմիջման գնաց հաղթողի կարգավիճակում. 45-րդ րոպեին աչքի ընկավ Լիման: Երկրորդ խաղակեսի սկզբում Օտուբանջոն հաշիվը դարձրեց 3-1։ 5 րոպե անց, ինչ-որ տեղ նաև անսպասելիորեն «Արարատը» կրճատեց հաշվի տարբերությունը. պատահմամբ գլխի հարվածով սեփական դարպասը գրավեց Յոան Գուֆրանը: Խաղում ինտրիգը պահպանվեց մինչև վերջ, սակայն «Արարատը» վատ տեսք ուներ ու չկարողացավ այլևս աչքի ընկնել, իսկ գործող չեմպիոնը ևս մեկ 11 մետրանոց վաստակեց ու Լիմայի ջանքերով հաշիվը դարձրեց 4-2: Երկար դադարից հետո «Արարատի» կազմ էին վերադարձել Դավիդ Դավիդյանը, Տոմաս Ֆիբելն ու Լուկման Արունան: Պետք է նորից խոստովանել, որ Մինասյանի թիմին կրկին հեշտ չտրվեց հաղթանակը, սակայն գործող չեմպիոնը 8 խաղ անպարտելի է:
«Լոռի»-«Ալաշկերտ»՝ 0-2
Վանաձորում «Լոռին» ընդունեց «Ալաշկերտին»: «Լոռիի» նախագահի խորհրդական Աբրահամ Խաշմանյանը մրցեց իր նախկին թիմի դեմ: Այս խաղում Խաշմանյանն արդեն պահեստայինների նստարանին էր նստած ու մեծամասնությամբ հենց ինքն էր ղեկավարում թիմի գործողությունները: «Լոռիում» նույնպես ռոտացիան քիչ է, բայց նրա համար, որ թիմի պահեստայինների նստարանն է բավական կարճ: Գումարած այս ամենին, վնասվածքի պատճառով կրկին հայտացուցակում չկար Ագուստին Մազիերոն, իսկ Դեսիրեն թեթև վնասվածքի պատճառով պահեստայինների նստարանին էր: Որոշակի խնդիրներ ուներ ու չխաղաց «Լոռիի» հիմնական դարպասապահ Վարդան Շահատունին: Այս գործոններն էլ իրենց դերն ունեցան թիմի անհաջողության մեջ: «Ալաշկերտը» գերգրագետ ֆուտբոլ խաղաց՝ մրցակցին ամբողջ խաղի ընթացքում ոչ մի հնարավորություն չտալով: Գալվաոյի ու Մարմենտինիի գոլերը հաղթանակ բերեցին Արմեն Ադամյանի թիմին: Շարունակում է իր ֆանտաստիկ խաղով տպավորել Վանգու Գոմեն: Գործող գավաթակիրը հրաշալի գործեց խաղադաշտի ամբողջ հատվածում և արժանիորեն 3 միավորով Վանաձորից հեռացավ: «Ալաշկերտի» համար այս հաղթանակը կարևոր էր նաև հոգեբանական տեսանկյունից, քանի որ թիմը վերջին 2 խաղում պարտվել էր: Իսկ «Լոռին» ընդհատեց 5 խաղից բաղկացած անպարտելիության շարքը: Պետք է նաև փաստել, որ նոր մարզչական կազմով վանաձորյան թիմը դեռ հաղթանակ չի տոնել. վերջին 3 խաղում՝ 2 ոչ-ոքի, 1 պարտություն:
Այսպիսով, առաջնության ավարտից 6 տուր առաջ մրցաշարային աղյուսակը 44 միավորով գլխավորում է «Արարատ-Արմենիան»: Երկրորդ տեղում հանգրվանած «Ալաշկերտը» 7 միավոր պակաս ունի: 36 միավորով երրորդ տեղ բարձրացավ «Շիրակը»: 35-ական միավոր ունեն «Լոռին» ու «Նոան», իսկ վեցերորդը 32 միավորով «Արարատն» է:
