Կոսովոյի մայրաքաղաք Պրիշտինայում ընթացող ծանրամարտի պատանիների ու Մ-15 տարեկանների Եվրոպայի առաջնությունում Հայաստանի հավաքականը նվաճեց երկամարտի առաևին մեդալը։
Մինչև 15 տարեկանների պայքարում Սամվել Ադիբեկյանը դարձավ երկամարտի արծաթե մեդալակիր:
60 կգ քաշային կարգում հանդես եկող հայ ծանրորդը հիանալի ելույթ ունեցավ պոկում վարժությունում՝ հաջողությամբ բարձրացնելով 93 կգ, 97 կգ և 100 կգ ծանրաձողերը։ Այս վարժությունում նա ցույց տվեց լավագույն արդյունքը և արժանացավ փոքր ոսկե մեդալի։
Հրում վարժությունում Ադիբեկյանը գլխավերևում պահեց 114 կգ և 118 կգ՝ այս ձևում նվաճելով արծաթե մեդալ։
Արդյունքում, երկամարտի 218 կգ ցուցանիշով Սամվել Ադիբեկյանը կանգնեց պատվո հարթակի երկրորդ աստիճանին՝ հռչակվելով Եվրոպայի Մ-15 առաջնության փոխչեմպիոն:
Հիշեցնենք, որ ավելի վաղ Հայաստանի Մ-15 հավաքականի կազմում մեդալ էր նվաճել նաև 55 կգ քաշային Գրիգոր Աղավելյանը, ով հրում վարժությունում դարձել էր ոսկե մեդալակիր, իսկ երկամարտի արդյունքով զբաղեցրել էր 4-րդ հորիզոնականը:
