Այսօր՝ օգոստոսի 18-ին, հունական «Օլիմպիակոսը» պաշտոնապես հայտարարեց Հայաստանի ազգային հավաքականի պաշտպան Նաիր Թիկնիզյանի տրանսֆերի ձեռքբերման մասին։ 27-ամյա ֆուտբոլիստը Հունաստան է տեղափոխվել սերբական «Ցրվենա Զվեզդայից»։
Տեղափոխությունից հետո հայ ֆուտբոլիստը կիսվել է իր առաջին տպավորություններով՝ հարցազրույց տալով ակումբի մամուլի ծառայությանը.
«Ինձ հրաշալի եմ զգում։ Ինձ համար սա շատ նշանակալի իրադարձություն է։ Մեկ տարի առաջ ես տեղափոխվեցի Սերբիայի լավագույն ակումբ, իսկ այսօր եկել եմ Հունաստանի լավագույն ակումբ ու Եվրոպայի, այսպես ասած, ամենաուժեղ ակումբներից մեկը։ Ընդամենը երկու մրցաշրջան առաջ «Օլիմպիակոսը» հաղթեց Կոնֆերենցիաների լիգայում։ Ես դա մեծ իրադարձություն եմ համարում Հունաստանի և, առհասարակ, այս ակումբի համար։ Եվ, իհարկե, երբ գալիս ես նման թիմ, պետք է արդարացնես բոլորի՝ երկրպագուների ու ղեկավարության սպասելիքները։ Ուստի, հիմա չեմ ցանկանում շատ խոսել այն մասին, թե ինչ եմ այստեղ անելու, այլ ուզում եմ պարզապես ցույց տալ իմ հմտությունները ֆուտբոլային խաղադաշտում և օգտակար լինել թիմին։
Սկսեմ նրանից, որ Սերբիայում բոլորը գիտեն «Օլիմպիակոս» ակումբը. «Ցրվենա Զվեզդան» ու «Օլիմպիակոսը» եղբայրական ակումբներ են։ Բայց ես նաև անհատապես զրուցել եմ Մարկո Արնաուտովիչի, ինչպես նաև տղաների՝ «Ցրվենա Զվեզդայում» իմ նախկին թիմակիցների հետ։ Բոլորը միաբերան ասում էին, որ սա հրաշալի տարբերակ է, հրաշալի ակումբ, հիանալի վայր ու հիանալի քաղաք։ Ոչ մեկից որևէ բացասական կարծիք չեմ լսել, բոլորը միայն լավն էին խոսում այս ակումբի մասին։
Ինքս ինձ հավանաբար կբնութագրեի հետևյալ կերպ. ես միշտ տրամադրված եմ հաղթանակի՝ անկախ նրանից, թե որ մրցակցի դեմ ենք խաղում, և միշտ ձգտում եմ տալ առավելագույնը։ Հասկանում եմ, որ իմ ուժեղ կողմը շարժունակությունս է և մշտական միտվածությունը դեպի մրցակցի դարպասը՝ չնայած նրան, որ խաղում եմ որպես ձախ պաշտպան։ Խաղադաշտում փորձում եմ անընդհատ ակտիվություն ցուցաբերել, ինչը շատ դեպքերում օգուտ է տալիս թիմին։ Հուսով եմ՝ այս միտումը կպահպանվի նաև այստեղ։
Եթե ես այստեղ տեղափոխվեի որևէ այլ ակումբից, այլ ոչ թե «Ցրվենա Զվեզդայից», հավանաբար պատրաստ չէի լինի այս ճնշմանն ու այն սպասելիքներին, որ ունեն բոլոր նրանք, ովքեր կապված են այս մեծ ակումբի հետ։ Բայց քանի որ եկել եմ մի տեղից, որտեղ ճիշտ նույն կերպ ճնշում կա, որտեղ ամեն խաղի նույն կերպ երկրպագուներ են ներկա, և քեզնից պահանջներ ունեն յուրաքանչյուր հանդիպման ժամանակ, կարծում եմ՝ պատրաստ եմ և շատ լավ գիտակցում եմ՝ որտեղ եմ գտնվում։
Այդ իսկ պատճառով ցանկանում եմ խոսքից անցնել գործի, և, տա Աստված, որ այս մրցաշրջանում ստացվի տիտղոսներ նվաճել և հնարավորինս հեռուն գնալ Եվրոպա լիգայում։ Կցանկանայի նաև շնորհակալություն հայտնել այն աջակցության համար, որը տեսնում եմ սոցիալական ցանցերում, մասնավորապես՝ Ինստագրամում։ Ինձ համար շատ հաճելի է, որ մարդիկ ինձ դիմավորում են նման դրական էմոցիաներով. դա լրացուցիչ մոտիվացիա է տալիս ու հասկացնում, որ ես ճիշտ տեղում եմ։ Եվ ինչպես արդեն ասացի, չեմ ուզում շատ խոսել, պետք է պարզապես սկսել գործել ֆուտբոլային խաղադաշտում»,- նշել է Թիկնիզյանը։
Ըստ հունական մամուլի տեղեկությունների՝ Թիկնիզյանը նոր ակումբի հետ կնքել է պայմանագիր՝ 4+1 ձևաչափով (4 տարի՝ ևս մեկով երկարաձգելու հնարավորությամբ)։ Հայ պաշտպանի տարեկան աշխատավարձն «Օլիմպիակոսում» կկազմի շուրջ 1,1 միլիոն եվրո։
