Հայաստանի ազգային հավաքականի ավագ Էդուարդ Սպերցյանը ծավալուն հարցազրույց է տվել Սաուդյան Արաբիայի Պրո լիգայի պաշտոնական կայքին։ «Ալ-Ահլիի» կիսապաշտպանը խոսել է Ջիդդայում իր առաջին ամիսների, թիմում հաջող մեկնարկի, Իվան Թոնիի հետ խաղային համագործակցության և չեմպիոնական հավակնությունների մասին։
Սպերցյանն անդրադարձել է նաև «Կրասնոդարում» անցկացրած տարիներին, նոր ակումբի երկրպագուներին ու Հայաստանի հավաքականի ավագ լինելու պատասխանատվությանը՝ առանձնահատուկ տեղ հատկացնելով Հենրիխ Մխիթարյանին։
Առաջնությանը հետևելու և առաջին տպավորությունների մասին
«Անկեղծ ասած՝ նախկինում բոլոր խաղերին չէ, որ հետևում էի, բայց կենտրոնական հանդիպումները փորձում էի դիտել ընկերներիս հետ։ Շատ հետաքրքիր էր, բայց երբ հայտնվեցի այստեղ, հասկացա, որ հեշտ չէ․ բավականին դժվար է, հատկապես ամռանը, որովհետև շատ շոգ է։ Այնուամենայնիվ, շատ ուրախ եմ այստեղ գտնվելու համար»։
Երազանքի նորամուտի և առաջին գոլի մասին
«Իհարկե, ինձ համար սա լավ մեկնարկ է։ Միգուցե դժվար էր նման բան սպասելը, բայց ես հավատում էի, որ կարող եմ, և մեծ շնորհակալություն թիմակիցներիս, որոնք օգնեցին գոլ խփել։ Երբեք չեմ մոռանա «Ալ-Ահլիի» կազմում իմ առաջին պաշտոնական գոլը։ Շատ լավ եմ հիշում գրոհը, և երբ գնդակը հայտնվեց ոտքիս տակ, պարզապես ուզում էի ամբողջ ուժով հարվածել ու գոլ խփել։ Շատ երջանիկ էի և երբեք չեմ մոռանա այդ օրը։
Հարձակման գծում հաջող խաղը միայն իմ շնորհիվ չէ, դա թիմակիցներիս վաստակն է։ Շատ ուրախ եմ, որ կարողանում եմ լավ խաղ ցուցադրել, թեև միշտ կան բաներ, որոնց վրա պետք է աշխատել»։
Այվեն Թոունիի և գաղտնի պայմանավորվածության մասին
«Այվենը բացառիկ ֆուտբոլիստ է և բացառիկ մարդ։ Նրա հետ խաղալն իսկական հաճույք է։ Բավական է դարպասի մոտ ցանկացած գնդակ փոխանցել նրան, և նա անմիջապես կեզրափակի այն։ Ուզում եմ շնորհակալություն հայտնել նրան՝ առաջին շրջանում ինձ աջակցելու համար։ Մեր միջև մի պայմանավորվածություն կա․ դա գաղտնիք է, որի մասին մեզանից բացի ոչ ոք չգիտի, բայց ես փորձում եմ նրան ապահովել այդ գոլային փոխանցումներով»։
«Կրասնոդարի» և «Ալ-Ահլիի» նմանությունների մասին
«12 տարեկանից անցել եմ «Կրասնոդարի» ակադեմիայի բոլոր աստիճաններով՝ մինչև առաջին թիմ, որտեղ նվաճեցինք տիտղոսն ու մտանք ակումբի պատմության մեջ։ Այդ պատճառով այդ ակումբը հավերժ կմնա իմ սրտում, իսկ ամենագեղեցիկ հիշողությունը, իհարկե, չեմպիոնությունն է։
Չեմ սիրում համեմատել ակումբները, քանի որ յուրաքանչյուրն ունի իր առանձնահատկությունը։ Որպես նմանություն կարող եմ նշել այն, որ «Ալ-Ահլին» նույնպես հիմա իմ սրտում է, երկու ակումբների գույնն էլ կանաչ է, և երկուսն էլ տիտղոսներ նվաճելու մեծ հավակնություններ ունեն»։
Չեմպիոնական երազանքի և առաջնության մակարդակի մասին
«Անկասկած, «Ռոշն» լիգայի գավաթը բարձրացնելը երազանք է։ Ես այստեղ եմ տիտղոսներ նվաճելու համար։ Ճանապարհը հեշտ չէ, դա շատ ծանր աշխատանք է, որտեղ ամենակարևորը թիմի ներքին մթնոլորտն է։ «Կրասնոդարում» մենք հիանալի մթնոլորտ ունեինք, նույնը հիմա կա նաև այստեղ։ Ամենակարևորը կանգ չառնելն է, մինչև վերջ գնալը՝ անկախ մրցակցից, և այնպես խաղալը, որ ամեն ինչ կախված լինի միայն մեզանից։
Առաջնությունում շատ բարձրակարգ ֆուտբոլիստներ կան, բայց ոչ ոքի չեմ առանձնացնի․ կառանձնացնեմ միայն մեր թիմը՝ «Ալ-Ահլին», որովհետև շատ ուժեղ կազմ ունենք»։
«Ալ-Ահլիի» երկրպագուների մասին
«Երբ ակումբը հետաքրքրություն ցուցաբերեց իմ նկատմամբ, շատ տեսանյութեր դիտեցի և տեսա, թե ինչպիսի երկրպագուներ կան այստեղ։ Ես ցնցված էի։ Նրանք խենթ են՝ լավ իմաստով, մարդիկ, որոնք անչափ սիրում են ֆուտբոլն ու ակումբը։ Դա շատ մեծ նշանակություն ունի ֆուտբոլիստների համար։ Տա Աստված՝ տիտղոսներ նվաճենք ու միասին տոնենք նրանց հետ»։
Ջիդդայում կյանքի և արձագանքների մասին
«Ջիդդայում շատ գեղեցիկ է ու անվտանգ, ինձ այստեղ շատ է դուր գալիս։ Կա ծով, լողափ, շատ ռեստորաններ և հիանալի մարզադաշտ։ Սակայն խաղերի ու մարզումների պատճառով ժամանակը քիչ է, և հանգստյան օրերին փորձում եմ տանը լինել՝ ընտանիքիս հետ, հանգստանալ ու վերականգնվել։
Գիտեմ, որ Ռուսաստանից ու Հայաստանից հիմա շատերն են հետևում ինձ ու «Ալ-Ահլիին»։ Շնորհակալ եմ նրանց աջակցության համար։ Շատերն են գրում՝ թե՛ ընկերները, թե՛ երկրպագուները, թե՛ ֆուտբոլիստները․ հարցնում են լիգայի, կյանքի, շոգի մասին։ Ես նրանց միայն լավն եմ պատմում և ասում՝ եկե՛ք, այստեղ իսկապես շատ լավ է ու հետաքրքիր»։
Առաջադիմելու և իր մտածելակերպի մասին
«Երբ շրջապատված եմ այսքան բարձրակարգ ֆուտբոլիստներով, միշտ կա աճելու տեղ, իսկ կատարելությանը սահման չկա։ Ես միշտ զրուցում եմ ինքս ինձ հետ և ինձնից ավելին եմ պահանջում։ Ամեն օր փորձում եմ լինել ինքս իմ լավագույն տարբերակը։ Սա է իմ մտածելակերպը․ երբեք կանգ չեմ առնի և կշարունակեմ աշխատել մինչև վերջ»։
Հայաստանի հավաքականի ավագ լինելու և Հենրիխ Մխիթարյանի մասին
«Պատիվ և հպարտություն է լինել ազգային հավաքականի ավագը։ Հենրիխը մեծ մարդ է հայկական ֆուտբոլի համար, ինձ համար նա կուռքերից մեկն է։ Միշտ փորձում եմ կապի մեջ լինել նրա հետ, խորհուրդներ եմ հարցնում, նա կիսվում է իր փորձով։ Նա լեգենդ է։ Ինձ նրա հետ համեմատելն անհնար է, որովհետև յուրաքանչյուրն իր ճանապարհն ունի․ Հենրիխն իր ճանապարհն ունի, ես՝ իմը։ Պարզապես հպարտ եմ, որ ճանաչում եմ նրան որպես մարդ և որպես ֆուտբոլիստ»։
Սպերցյանը «Ալ-Ահլի» է տեղափոխվել 2026 թվականի ամռանը՝ «Կրասնոդարի» կազմում Ռուսաստանի առաջնությունը նվաճելուց հետո։ Նա «Կրասնոդարի» ակադեմիա է միացել 12 տարեկանում, հասել առաջին թիմ և մասնակցել ակումբի պատմության մեջ առաջին ռուսական չեմպիոնությանը։ Սաուդյան Արաբիայում նրա նորամուտը նշանավորվել է հաղթական գոլով, իսկ այժմ հայ կիսապաշտպանը նոր թիմի հետ ևս մեկ տիտղոս նվաճելու նպատակ ունի։


























































