Հայաստանի ազգային հավաքականի պաշտպան Նաիր Թիկնիզյանը կարիերան կշարունակի Հունաստանում։ «Օլիմպիակոսը» պաշտոնապես հայտարարել է 27-ամյա ֆուտբոլիստի տրանսֆերի մասին։
Հունական ակումբում հայ ֆուտբոլիստը պաշտպանության ձախ եզրում կփոխարինի արգենտինացի Ֆրանսիսկո Օրտեգային։
Ըստ հունական մամուլի՝ Թիկնիզյանը նոր ակումբի հետ կնքել է 4+1 ձևաչափով պայմանագիր (4 տարի՝ ևս մեկով երկարաձգելու հնարավորությամբ)։ Հայ պաշտպանի տարեկան աշխատավարձը «Օլիմպիակոսում» կկազմի շուրջ 1,1 միլիոն եվրո։
Տպավորիչ են նաև գործարքի ֆինանսական մանրամասները ակումբների միջև։ Թիկնիզյանի տրանսֆերի համար «Օլիմպիակոսը» Բելգրադի «Ցրվենա Զվեզդային» կվճարի հաստատուն 5 միլիոն եվրո, իսկ ևս 2 միլիոն եվրո նախատեսված է որպես հավելավճար։
Հիշեցնենք, որ 1999թ․ մայիսի 12-ին Սանկտ Պետերբուրգում ծնված ֆուտբոլիստը «Ցրվենա Զվեզդա» էր տեղափոխվել 2025 թվականի ամռանը՝ 4 միլիոն եվրոյի դիմաց։ Սերբական ակումբի կազմում նա ընդհանուր առմամբ անցկացրել է 67 հանդիպում, որոնցից 7-ը՝ ընթացիկ մրցաշրջանում։
Մինչև Եվրոպա տեղափոխվելը Նաիր Թիկնիզյանը հանդես է եկել ռուսական Պրեմիեր լիգայում։ Նա ֆուտբոլային կրթություն է ստացել Մոսկվայի ԲԿՄԱ-ի ակադեմիայում, որտեղ նշել է իր նորամուտը պրոֆեսիոնալ ֆուտբոլում (43 խաղ):
Վարձավճարով Կուրսկի «Ավանգարդում» խաղալուց հետո, 2021 թվականի ամռանը նրա տրանսֆերը գնել էր Մոսկվայի «Լոկոմոտիվը», որի կազմում պաշտպանն անցկացրել է տպավորիչ 122 հանդիպում։
Թիկնիզյանը միջազգային մակարդակում ներկայացրել է Ռուսաստանի Մ19, Մ20 և Մ21 հավաքականները, սակայն հետագայում ընդունել է պատմական հայրենիքի հրավերը։ Այս պահի դրությամբ նա Հայաստանի ազգային հավաքականի մարզաշապիկով անցկացրել է 31 հանդիպում։
