Հայկական խառը մենամարտերի (MMA) լեգենդ Դավիթ Խաչատրյանը տպավորիչ ելույթ ունեցավ «Tashir Arena»-ում մարտի 28-ին անցկացված Hype FC երևանյան մրցաշարի շրջանակում։ Հայ մարտիկը (28-6) մեկ երեկոյի ընթացքում երկու անգամ հաղթանակ տոնեց Ղազախստանի ներկայացուցիչ Սերիկ Սարմուխամեդի նկատմամբ:
Դիմակայության առաջին հատվածն ընթացավ դասական MMA-ի կանոններով և տևեց ընդամենը մի քանի րոպե: Խաչատրյանը հենց մեկնարկային վայրկյաններից տիրեց նախաձեռնությանը, արագորեն տապալեց մրցակցին պարտեր ու սկսեց ծանր հարվածներ հասցնել նրան: Ղազախ մարզիկը չկարողացավ դիմակայել ուժեղ ճնշմանն ու պաշտպանվել, ինչի արդյունքում մրցավարը ստիպված եղավ դադարեցնել մարտը արդեն առաջին ռաունդում՝ արձանագրելով հայ մարտիկի հաղթանակը տեխնիկական նոկաուտով:
Ամենահետաքրքիր իրադարձությունները ծավալվեցին անմիջապես այս հաղթանակից հետո: Կողմերը պայմանավորվեցին նույն երեկոյի ընթացքում անցանցնել անհապաղ ռևանշ, բայց այս անգամ՝ բռնցքամարտի կանոններով («մերկ բռունցքներ» ձևաչափին մոտիկ՝ միայն MMA-ի բարակ ձեռնոցներով): Նոր կանոնները ևս փրկություն չդարձան Սարմուխամեդի համար: Երկրորդ մենամարտը ևս ամբողջությամբ անցավ հայ մարտիկի թելադրանքով և ավարտվեց Խաչատրյանի վստահ հաղթանակով՝ մրցավարների միաձայն որոշմամբ:
Հավելենք, որ Hype FC-ի մարզական երեկոն հարուստ էր նաև հայկական այլ ելույթներով: Ինչպես արդեն տեղեկացրել էինք, ըմբշամարտի կանոններով գերվստահ հաղթանակ էր տոնել Արսեն Հարությունյանը: Խառը մենամարտերում իրենց ուժերը փորձեցին ևս չորս հայ մարզիկներ: Կամո Ունանյանն ու Դավիթ Խաչատուրյանը փայլուն հանդես եկան՝ իրենց մենամարտերն ավարտելով հաղթանակով հենց առաջին ռաունդում, իսկ Սեյրան Ասատրյանն ու Մհեր Մադաթյանն այս անգամ զիջեցին իրենց մրցակիցներին:
Посмотреть эту публикацию в Instagram
