Հայկական ակումբների ելույթները եվրագավաթների որակավորման փուլերում 2020-ին մեղմ ասած համոզիչ չէին։ Բոլոր խաղերում մերոնք պարտություն կրեցին։ Այն փաստը, որ մենք հիմա սպասում ենք հայկական ակումբներից ևս մեկի մրցելույթին, միայն այն պատճառով է, որ Չեմպիոնների լիգայի որակավորման փուլից դուրս մնալուց հետո «Արարատ-Արմենիան» ունի շանս պայքարը շարունակելու Եվրոպա լիգայի խաղարկությունում։
Եթե համեմատենք անցած խաղարկության հետ, ապա ֆորմալ առումով ամեն ինչ նույնն է։ «Արարատ-Արմենիան» պարտվեց ՉԼ-ի որակավորման փուլում ու հիմա եկել է ԵԼ, սակայն ցուցադրած խաղն ու արդյունքները, իհարկե, մեծապես տարբերվում են նախորդ խաղարկությունից։ Եվրոպա լիգայի որակավորման 2-րդ փուլում Դավիդ Կամպանյայի գլխավորած թիմի մրցակիցը Լյուքսեմբուրգը ներկայացնող «Ֆոլա Էշ» ակումբն է։ Սակայն հիմա այս թիմի մասին չէ, որ պետք է խոսենք։ Ավելին, նախկինում հայկական ակումբի մրցակցին մենք անդրադարձել ենք։
Հոգեբանական բարդագույն վիճակ
Ասել, որ «Արարատ-Արմենիան» հոգեբանական սարսափելի վիճակով է մոտենում խաղին, նշանակում է ոչինչ չասել։ Դավիդ Կամպանյայի գլխավորությամբ երևանյան թիմը դեռևս հաղթանակ չի տարել։ Այո՛, պատկերացնու՞մ եք․ ո՛չ սուպերգավաթում, ո՛չ առաջնության խաղերում և, իհարկե, ոչ էլ ՉԼ-ի որակավորման փուլում իսպանացի մասնագետին չի հաջողվել առաջին հաղթանակը տանել թիմի ղեկին։
Կա մտավախություն, որ Կամպանյայի առաջին հաղթանակը «Արարատ-Արմենիայի» ղեկին այդպես էլ չի գա։ Համենայն դեպս, եթե թիմը չկարողանա հաղթել նաև այսօրվա խաղում, բացառված չէ, որ ակումբի ղեկավարությունը հանդուրժող չի գտնվի ու կհեռացնի գլխավոր մարզչին։
Ի՞նչ անել
Կամպանյան իր հերթին երեկ կայացած մամուլի ասուլիսի ընթացքում հաստատեց, որ թիմի համար հոգեբանական առումով հեշտ չէ։ Իհարկե, դա պետք էլ չէ թաքցնել։ Բայց լուծումը առավել քան ակնհայտ է։ Այդ մասին խոսեց նաև Սերգեյ Վակուլենկոն՝ հավաստիացնելով, որ խաղալու են նաև մարզչի համար։ Պետք է ուղղակի մոռանալ նախորդ 5 խաղերի դժգույն արդյունքներն ու այսօրվա խաղում ամեն ինչ թողնել խաղադաշտում։ Այդ դեպքում մերոնք ի վիճակի կլինեն հաղթանակի հասնելու, դուրս գալու հաջորդ փուլ, ու ինչ-որ տեղ, փրկելու Կամպանյայի ապագան։ Մրցակիցն այդ առումով միանշանակ անցանելի է։
Գրեթե ամբողջական կազմ
Կորուստները չնչին են։ «Օմոնիայի» դեմ խաղում կարմիր քարտ ստանալու պատճառով այսօրվա հանդիպմանը չի մասնակցի Դավիդ Հումանեսը։ Նրա բացակայության պարագայում թերևս ակնհայտ է, որ Կամպանյան պաշտպանության կենտրոնում կընտրի Վակուլենկո-Մենեզես զույգին։ Վնասվածք ունի Ալեքսանդր Դամչևսկին, սակայն նրա բացակայությունը դժվար թե լուրջ խնդիրներ ստեղծի երևանյան թիմի համար։ Աջ եզրում հավանաբար կխաղա Ալեմաոն։
Մրցակիցը գալիս է լավ տրամադրությամբ
Մենք մատնանշեցինք, թե ինչպես կարող են «Արարատ-Արմենիայում» մոռանալ նախորդ 5 խաղերը, բայց մրցակցի ճամբարում նման խնդիր չկա։ Նրանք Երևան են եկել լավ տրամադրությամբ։ Լյուքսեմբուրգի նոր մեկնարկած առաջնությունում «Ֆոլան» 3 տուրից հետո 7 միավոր է վաստակել։ Առաջին տուրում նրանք ոչ-ոքի են խաղացել, հետո 2 հաղթանակ տարել։ 3 խաղում 8 գոլ են խփել ու բաց թողել 3-ը։ Եթե համեմատենք «Արարատ-Արմենիայի» հետ, ապա այստեղ պատկերը սարսափելի է։ Առաջնության 3 խաղում 2 ոչ-ոքի, 1 պարտություն՝ 2 խփած ու 3 բաց թողած գնդակներով։ Ճիշտ է, նման համեմատություն անելը գուցե այդքան էլ տեղին չէ Եվրոպա լիգայի որակավորման փուլի հանդիպմանն ընդառաջ, բայց մեկ բան ակնհայտ է․ այս ամենն ազդում է թիմի տրամադրության վրա։
Երևանյան օդի հնարավոր ազդեցությունը
Ամեն դեպքում խաղում ենք տանը։ Այո՛, չկան երկրպագուներ, քանի որ համավարակը չի նահանջում, բայց կա հայկական շունչ օդի մեջ, կա երևանյան չքնաղ երեկո ու ստադիոն, որտեղ ոչ մեկ անգամ է պատմական հաղթանակներ կերտվել։ Թե ինչ կլինի այս անգամ, դժվար է ասել։ Հայկական ակումբային ֆուտբոլի ամենամեծ նվաճմանը հասած թիմը դարձյալ կանգնած է այդ հաջողության ճանապարհի սկզբում։ Մեզ մնում է միայն հավատալ, հուսալ ու երկրպագել «Արարատ-Արմենիային» այս բարդ ժամականերում․․․
Արամ Սահակյան
