UFC-ի թեթև քաշային դիվիզիոնի դասակարգման աղյուսակի երկրորդ համար Արման Ծառուկյանը հայտարարել է, որ մտադիր է վաղաժամ ավարտել բրազիլացի Մաուրիսիո Ռուֆիի դեմ մենամարտը, որը կկայանա սեպտեմբերի 20-ին Լոս Անջելեսում անցկացվելիք UFC 331 մրցաշարի շրջանակում:
Հայ մարտիկը նշել է, որ հոգեբանորեն և ֆիզիկապես պատրաստ է արագ հաղթանակի՝ ընդգծելով նաև անձնական շարժառիթը:
«Ինձ 25 րոպե պետք չէ։ Ես օկտագոն դուրս կգամ և կփորձեմ աշխատանքս անել արագ ու հեշտությամբ։ Հայրս հիմա տանն է, և ես չեմ ցանկանում, որ նա նյարդայնանա չափազանց երկար մենամարտի պատճառով։ Այդ իսկ պատճառով ցանկանում եմ ամեն ինչ ավարտել որքան հնարավոր է շուտ»,- Ծառուկյանի խոսքերն է մեջբերում Paramount-ը:
Հիշեցնենք, որ Ծառուկյանն իր վերջին մենամարտն անցկացրել է 2025 թվականի նոյեմբերին Դոհայում կայացած UFC Fight Night մրցաշարում, որտեղ երկրորդ ռաունդում խեղդող հնարքով ժամանակից շուտ հաղթանակ էր տարել նորզելանդացի Դեն Հուկերի նկատմամբ։ Ընդհանուր առմամբ, խառը մենամարտերում Ծառուկյանն անցկացրել է 26 գոտեմարտ և տոնել 23 հաղթանակ։
Ինչ վերաբերում է Մաուրիսիո Ռուֆիին, ապա նա վերջին անգամ օկտագոն է դուրս եկել 2026 թվականի հունիսի 14-ին՝ UFC Freedom 250 մրցաշարում վառ հաղթանակ տանելով տիտղոսի նախկին հավակնորդ Մայքլ Չենդլերի նկատմամբ: Բրազիլացին իր պրոֆեսիոնալ կարիերայի 14 մենամարտերում գրանցել է 12 հաղթանակ։
