Անդրեա Պիրլոյի նշանակումն Իտալիայի ազգային հավաքականի գլխավոր մարզչի պաշտոնում հայտնվել է մեծ վտանգի տակ՝ վերածվելով իսկական քաղաքական սկանդալի։
Իտալիայի ֆուտբոլի ֆեդերացիայի (FIGC) նախագահ Ջովանի Մալագոն որոշել է ժամանակավորապես կասեցնել 47-ամյա մասնագետի նշանակման գործընթացը։
Ինչպես հաղորդում է հեղինակավոր լրագրող Ջանլուկա Դի Մարցիոն, հուլիսի 27-ին նախատեսված վճռորոշ հանդիպումները չեղարկվել են, ինչը նշանակում է, որ հուլիսի 28-ի լիգայի վեհաժողովի ժամանակ նոր գլխավոր մարզչի անվան հայտարարումը, ամենայն հավանականությամբ, տեղի չի ունենա։
Խնդիրն առաջացել է այն բանից հետո, երբ իտալացի մի շարք պատգամավորներ դեմ են արտահայտվել Պիրլոյի թեկնածությանը՝ պատճառաբանելով նրա համագործակցությունը ռուսական բուքմեյքերական ընկերության հետ։
Ըստ La Gazzetta dello Sport-ի՝ Պիրլոյի և բուքմեյքերի միջև համաձայնագիրն ուղղակիորեն կապված է ԱՄԷ-ի առաջնությունում հանդես եկող «Դուբայ Յունայթեդ» ակումբում նրա աշխատանքի հետ: Պարբերականը պնդում է, որ ակումբից հեռանալուն պես կդադարի նաև գովազդային այդ պայմանագիրը:
Այս իրավիճակը կարող է հանգեցնել նաև դոմինոյի էֆեկտի։ Եթե Պիրլոյի փոխարեն նշանակվի մեկ այլ մարզիչ, որը չի համապատասխանում Իտալիայի հավաքականի տեխնիկական տնօրեն Պաոլո Մալդինիի և նրա խորհրդական Լեոնարդոյի նախագծին, ապա վերջիններս կարող են ժամկետից շուտ հրաժարական տալ։
Իտալական ֆուտբոլի լեգենդը որոշել է չլռել և հանդես է եկել ծավալուն հայտարարությամբ՝ պարզաբանելով ստեղծված իրավիճակը.
«Վերջին օրերին մեծ ափսոսանքով էի հետևում այն բանավեճին, որը ծավալվել էր իմ անվան և Իտալիայի հավաքականը գլխավորելու հնարավորության շուրջ: Հարգելով ինստիտուտները, ֆեդերացիան և բոլոր ներգրավված անձանց՝ ես մինչ այժմ նախընտրում էի լռել: Սակայն այժմ հարկ եմ համարում պարզաբանել որոշ հարցեր։
Իմ ողջ կարիերայի ընթացքում՝ նախ որպես ֆուտբոլիստ, իսկ այժմ որպես մարզիչ, ես միշտ գործել եմ այն երկրների օրենքներին և իմ կնքած պայմանագրերի կետերին լիովին համապատասխան: Այն մասնագիտական համագործակցությունը, որը դարձել է վերջին վեճերի առարկա, ծագել է Արաբական Միացյալ Էմիրություններում իմ աշխատանքային գործունեության շրջանակներում և կրում է բացառապես առևտրային և սպորտային բնույթ: Այդ համագործակցությանը քաղաքական երանգ տալը նշանակում է ինձ վերագրել համոզմունքներ, որոնք ես երբեք չեմ արտահայտել և որոնք ինձ բնորոշ չեն:
Ցանկանում եմ շնորհակալություն հայտնել Մալդինիին և Լեոնարդոյին ինձ վստահելու և հարգելու համար: Ես գիտեմ նրանց պրոֆեսիոնալիզմը, լրջությունը և այն սերը, որ նրանք միշտ տածել են իտալական ֆուտբոլի հանդեպ:
Շատ ցավալի է, որ մաքուր սպորտային որոշումն արագորեն ներքաշվեց հանրային քննարկումների դաշտ, որի արդյունքում իմ անձին վերագրվեցին մտադրություններ ու իմաստներ, որոնք ինձ հետ որևէ աղերս չունեն:
Սերը Իտալիայի հանդեպ կախված չէ պաշտոնից։ Այն իմ պատմության, իմ ինքնության անբաժան մասն է և կուղեկցի ինձ միշտ»,- գրել է Պիրլոն:
Հիշեցնենք, որ 47-ամյա մասնագետը «Դուբայ Յունայթեդը» գլխավորում է 2025 թվականի հուլիսից: Նրա գործող պայմանագիրն ակումբի հետ նախատեսված է մինչև 2027 թվականի հունիսի 30-ը։
