2026 թվականի Աշխարհի առաջնության մեկնարկից առաջ ֆուտբոլի ազգային հավաքականները շարունակում են ակտիվորեն նախապատրաստվել մրցաշարին՝ անցկացնելով ընկերական հանդիպումներ։ Հարավամերիկյան և եվրոպական գրանդները վստահ հաղթանակներ են տոնել իրենց հերթական ստուգողական խաղերում։
Աշխարհի գործող չեմպիոն Արգենտինայի հավաքականը Քոլեջ-Սթեյշեն քաղաքում 2:0 հաշվով վստահ առավելության հասավ Հոնդուրասի նկատմամբ։ Արգենտինացիներին հաղթանակ բերեցին Լաուտարո Մարտինեսի (11-մետրանոցից) և Ջուլիանո Սիմեոնեի խփած գնդակները։
Թիմի ավագ և գլխավոր աստղ 38-ամյա Լիոնել Մեսսին բաց թողեց հանդիպումը՝ մկանային վնասվածքից ապաքինվելու պատճառով։ Հիշեցնենք, որ չեմպիոնական տիտղոսը պաշտպանող Արգենտինան ԱԱ-2026-ի խմբային փուլում հանդես է գալու J խմբում, որտեղ նրա մրցակիցներն են լինելու Ալժիրը (հունիսի 16), Ավստրիան (հունիսի 22) և Հորդանանը (հունիսի 27)։ Նրանց մրցակից Հոնդուրասը չի որակավորվել այս մրցաշարին։
Տեսանյութը՝ ԱՅՍՏԵՂ
Մեկ այլ հանդիպում կայացավ Քլիվլենդում, որտեղ Բրազիլիայի ազգային հավաքականը 2:1 հաշվով հաղթեց Եգիպտոսի ընտրանուն։ «Պենտակամպեոնների» կազմում աչքի ընկան Բրունո Գիմարայեշն ու երիտասարդ տաղանդ Էնդրիկը։ Եգիպտացիների կազմում միակ հեղինակության գնդակը խփեց Մոստաֆա Զիկոն։
ԱԱ-2026-ում Բրազիլիան ընդգրկված է C խմբում՝ Մարոկկոյի, Հայիթիի և Շոտլանդիայի հետ միասին, իսկ Եգիպտոսը G խմբում կմրցի Բելգիայի, Իրանի և Նոր Զելանդիայի հետ։
Տեսանյութը՝ ԱՅՍՏԵՂ
Տամպայում կայացած ընկերական խաղում Անգլիայի հավաքականը Թոմաս Տուխելի գլխավորությամբ նվազագույն՝ 1:0 հաշվով հաղթեց Նոր Զելանդիային։ Հանդիպման միակ և հաղթական գոլը հեղինակեց թիմի ռմբարկու Հարի Քեյնը։
Գալիք Մունդիալում անգլիացիները կխաղան L խմբում (Խորվաթիա, Գանա, Պանամա)։
Տեսանյութը՝ ԱՅՍՏԵՂ
Օրվա մյուս ընկերական հանդիպումների արդյունքները.
- Թուրքիա 2:1 Վենեսուելա
- Շոտլանդիա 4:0 Բոլիվիա
- Ավստրալիա 1:1 Շվեյցարիա
- Բոսնիա և Հերցեգովինա 1:1 Պանամա
