«Բարսելոնայի» նախկին գլխավոր մարզիչ Չավի Էռնանդեսը հայտարարել է, որ ակումբի նախագահ Ժոան Լապորտան է խափանել հարձակվող Լիոնել Մեսսիի վերադարձը կատալոնական թիմ 2023 թվականին։
– Արդյոք Մեսսին կարո՞ղ էր վերադառնալ «Բարսելոնա», երբ Դուք էիք գլխավորում թիմը:
– Այստեղ Լապորտան ամբողջ ճշմարտությունը չի ասում։ Մենք գործնականում համաձայնեցրել էինք պայմանագիրը Լեոյի հետ։ 2023 թվականի հունվարին՝ աշխարհի չեմպիոն դառնալուց հետո, մենք կապվեցինք նրա հետ, և նա ինձ ասաց, որ ցանկանում է վերադառնալ։ Ես նրան տեսնում էի թիմում։ Մենք շփվում էինք մինչև մարտ, և ես նրան ասացի. «Լավ, երբ դու ինձ հավանություն տաս, ես կտեղեկացնեմ նախագահին, քանի որ ես քեզ տեսնում եմ կազմում»։
– Իսկ ի՞նչ ստացվեց արդյունքում:
– Նախագահն սկսեց պայմանագրի շուրջ բանակցել Լեոյի հոր հետ, և մենք «կանաչ լույս» ստացանք Լա Լիգայից, սակայն նախագահն ամեն ինչ տապալեց։
– Նա բացատրե՞ց պատճառը:
– Լապորտան բառացիորեն ասաց ինձ, որ եթե Լեոն վերադառնա, ինքը ստիպված է լինելու պատերազմել նրա հետ, իսկ նա չի կարող իրեն դա թույլ տալ։ Հետո Մեսսին հանկարծ դադարեց պատասխանել իմ զանգերին, քանի որ մյուս կողմից նրան հայտնել էին, որ տեղափոխություն չի լինելու։ Ես զանգահարեցի նրա հորն ու ասացի. «Սա անհնար է, Խորխե», իսկ նա պատասխանեց. «Խոսիր նախագահի հետ»։ Եվ ես նորից բացատրում էի. «Մենք արդեն հինգ ամիս շփվում ենք Լեոյի հետ, ամեն ինչ փաստացի պատրաստ է։ Ֆուտբոլային տեսանկյունից ոչ մի կասկած չկա, իսկ տնտեսական առումով՝ մենք կխաղանք «Մոնժուիկում» և կկազմակերպենք իսկական «վերջին պար», ինչպես Մայքլ Ջորդանը»,- Չավիի խոսքերն է մեջբերում La Vanguardia-ն։
Հիշեցնենք, որ 2023 թվականից Մեսսին հանդես է գալիս MLS-ը ներկայացնող «Ինտեր Մայամիում»։ 2003-ից 2021 թվականներին արգենտինացին պաշտպանել է «Բարսելոնայի» գույները՝ 778 խաղում դառնալով 672 գոլի հեղինակ: Կատալոնական ակումբի հետ նա 10 անգամ դարձել է Իսպանիայի չեմպիոն, 7 անգամ նվաճել երկրի գավաթը և 4 անգամ հաղթել Չեմպիոնների լիգայում։ 2021-2023թթ․ նա խաղացել է ՊՍԺ-ում՝ դառնալով Ֆրանսիայի կրկնակի չեմպիոն։ Արգենտինայի հավաքականի կազմում Մեսսին աշխարհի չեմպիոն է, Ամերիկայի գավաթի կրկնակի հաղթող և օլիմպիական չեմպիոն։
