Մոսկվայի «Լոկոմոտիվի» նախկին պաշտպան, ներկայումս Բելգրադի «Ցրվենա Զվեզդայի» և Հայաստանի ազգային հավաքականի կազմում հանդես եկող Նաիր Թիկնիզյանը Ռուսաստան հնարավոր վերադարձի և իր կարիերայի առաջնահերթությունների մասին խոսել է Fonbet-ի յութուբյան ալիքին տված հարցազրույցում։
Չկայացած տրանսֆերի և «Կրասնոդարի» մասին
Անդրադառնալով շրջանառվող լուրերին, թե ձմռանը ռուսական ակումբներից մեկն ավելի քան 5 միլիոն եվրո է առաջարկել իր տրանսֆերի համար, սակայն «Ցրվենա Զվեզդայի» գլխավոր մարզիչ Դեյան Ստանկովիչը դեմ է եղել գործարքին, Թիկնիզյանը նշել է, որ անձամբ տեղյակ չի եղել այդ առաջարկից։
«Ո՛չ գործակալիցս, ո՛չ էլ որևէ մեկից չեմ լսել նման առաջարկի մասին։ Անկեղծ ասած, նույնիսկ չեմ էլ խորացել այդ հարցի մեջ։ Եթե ակումբի ղեկավարությունն այդպես է ասում, ուրեմն նրանք ավելի լավ գիտեն»,- նշել է ֆուտբոլիստը։
Իսկ այն հարցին, թե արդյոք խոսքը «Կրասնոդարի» մասին է, Թիկնիզյանը ժպիտով արձագանքել է․ «Անկեղծ ասած՝ չգիտեմ, կարող ենք հիմա Էդուարդ Սպերցյանին զանգել ու հարցնել»։
Ֆինանսական գործոնի և Եվրոպայի ընտրության մասին
26-ամյա պաշտպանն ընդգծել է, որ շատ երջանիկ է սերբական ակումբում, ինչն օգնել է իրեն լիովին վերագործարկել ֆուտբոլային կարիերան։ Այնուամենայնիվ, նա չի թաքցնում, որ ընտանիքի բարեկեցության համար ֆինանսական կողմը ևս կարևոր է։ Չնայած դրան, երբ հարցը վերաբերում է Եվրոպայի և Ռուսաստանի միջև ընտրությանը, Թիկնիզյանի դիրքորոշումը շատ հստակ է.
«Անգամ եթե Ռուսաստանից ֆինանսապես լավ առաջարկ լինի, իսկ Եվրոպայից՝ ոչ այնքան, ես, միանշանակ, կընտրեմ Եվրոպան։ Լավ կլինի՝ այնտեղ փորձեմ ուժերս։ Փողը վաղ թե ուշ վերջանում է. բնակարան, տուն, մեքենա, ծնողներիդ համար ինչ-որ ներդրումներ ես անում, և վերջ, ինձ ուրիշ ոչինչ պետք չէ։ Ես արտասովոր պահանջներ չունեմ»։
Ֆուտբոլիստը նաև խոստովանել է, որ իր ֆինանսական նվազագույն շեմը դեռ հաղթահարված չէ։ Համեմատելով հավանական առաջարկները՝ նա նշել է․ «Ենթադրենք՝ Եվրոպայից տարեկան 900 հազար եվրոյի առաջարկ է գալիս, իսկ Ռուսաստանից՝ 1,5 միլիոնի։ Տարբերությունը մեծ է, բայց եթե խելամիտ տնօրինես գումարդ, կարող ես այդ տարբերությունը հարթել»։
Իսկ ահա Ռուսաստանից հնարավոր 2,5 միլիոն եվրո աշխատավարձի մասին լսելիս Թիկնիզյանն անկեղծացել է․ «Լսի՛ր, 2,5 միլիոնը հսկայական գումար է, նման թվերն ինձ միայն երազում են հանդիպում»։
Ընթացիկ մրցաշրջանում 26-ամյա խաղացողը սերբական ակումբի կազմում մասնակցել է 33 հանդիպման՝ դառնալով 3 գոլային փոխանցման հեղինակ։
