Ֆուտբոլ…շատերի համար այս խաղն ապրելակերպ է, ապրուստի միջոց, սնունդ: Առանց ֆուտբոլի, երբեմն, շունչդ կտրվում է: Այդպես ենք ապրում արդեն մեկ ամսից ավելի: Կորոնոավիրուսը բոլորիս զրկել է մեզ՝ մեր սիրած գործով զբաղվելու ու կյանքից հաճույք ստանալու հնարավորությունից:
Շատերիս համար ֆուտբոլը զվարճանքի միջոց է, բայց մարդկանց մի ստվար զանգվածի համար այն աշխատանք է: Այո՛, ֆուտբոլիստների մասին է խոսքը: Համավարակի պանդեմիան գրեթե ամբողջ աշխարհին զրկեց ֆուտբոլով զբաղվելու հնարավորությունից: Ելնելով անվտանգության նկատառումներից՝ Հայաստանում ևս դադարեցվեցին բոլոր մարզական իրադարձությունները, այդ թվում՝ ֆուտբոլի Հայաստանի առաջնությունները:
Ակումբները սկսեցին մշակել անհատական ծրագրեր,և խաղացողներն իրենց ահռելի ազատ ժամանակի մի մասը նվիրում էին մարզավիճակի ինչ-որ չափով պահպանմանը, բայց հասկանալի է, որ այդպես անհնար էր երկար շարունակել:
Օրեր առաջ ՀՖՖ-ն միջնորդեց և թույլատրեց որոշ սահմանափակումներով ու որոշակի գործողություններից հետո վերսկսել մարզումները: Բոլոր թիմերին հանձնվեցին անհրաժեշտ քանակությամբ թեստեր ու բոլոր ակումբներում սկսվեց ֆուտբոլիստների թեստավորումը: Առայժմ, ոչ մի ինֆորմացիա չկա, որ խաղացողներից որևէ մեկի թեստի պատասխանը դրական է, և սա ամենակարևորն է այս պարագայում:
Այսօր իր մարզումները սկսեց նաև Գյումրիի «Շիրակը»: Դադարեցված առաջնությունում Շիրակը գտնվում է 4-րդ հորիզոնականում՝ առաջատար «Արարատ-Արմենիային» զիջելով 5 միավոր: Դադարից հետո կայացած առաջին մարզումից հետո Armsport-ը զրուցել է թիմի բազմափորձ ավագ Աղվան Դավոյանի հետ.
-Աղվան,Ինչպե՞ս ես անցկացնում կարանտինային շրջանը:
-Դե, քանի որ առաջնությունը դադարեցվեց ու չէինք կարող խաղադաշտում մարզվել, անհատական ծրագրեր էին ուղարկում մարզիչները, իսկ մենք փորձում էինք մեր մինիմալ մարզավիճակը պահպանել: Մնացած ազատ ժամանակն անցկացնում եմ ընտանիքիս հետ, կարդում եմ ու ֆիլմեր դիտում:
-Դադարից հետո, երբ վերադառնաք առօրյա ծանրաբեռնված կյանքին, դժվարություններ կլինե՞ն, քանի որ արդեն, երևի թե, սովորել եք ընտանիքի հետ շատ ժամանակ անցկացնելուն, և, ընդհանրապես, շատ ազատ ժամանակ ունենալուն:
-Չեմ կարծում, որ դժվարություն կլինի: Հակառակը, ես շատ եմ կարոտել թիմային մարզումները, խաղերը, ու բնականաբար, բոլորս մեծ ուրախությամբ կվերադառնանք մարզումներին ու խաղերին:
-Ի՞նչ դժվարությունների կհանդիպեք նախկին մարզավիճակին վերադառնալիս:
-Ինչպես նշեցի՝ փորձել ենք անհատական ծրագրերի միջոցով պահպանել քաշն ու նվազագույն մարզավիճակը, և հիմա պետք է խմբակային մարզումների միջոցով կարգավորել ֆունկցիոնալ վիճակը, բայց սա չէ ամենավատը: Ամենավատն անորոշությունն է. չգիտենք, թե երբ է վերսկսվելու առաջնությունը: Երբ ամեն ինչ հստակ լինի, ավելի մոտիվացված ու բարձր տրամադրությամբ կպատրաստվենք խաղերին:
-Թիմում ֆինանսական խնդիրներ կա՞ն:
-Մանրամասների չեմ տիրապետում, բայց կարող եմ ասել, որ վերջին ամսվա աշխատավարձը ստացել ենք:
-Կորոնավիրուսը ի՞նչ խնդիրներ կառաջացնի ֆուտբոլում, մասնավորապես՝ հայկական ֆուտբոլում:
-Բոլորս էլ տեսնում ենք, որ ամբողջ աշխարհում ֆուտբոլը լուրջ դժվարությունների է հանդիպել, հիմնականում՝ ֆինանսական: Թիմերը բանակցությունների մեջ են խաղացողների հետ՝ աշխատավարձերի կրճատման թեմայի շուրջ: Եվրոպայում թիմերը խաղեր չեն անցկացնում, եկամտի աղբյուր չկա, իսկ մեր մոտ, ճիշտ է, եկամուտներ չկան տոմսերի վաճառքից կամ հեռարձակումներից, բայց ակումբների սեփականատերերը կարող են նման խնդիրներ ունենալ. ի վերջո, նրանք են հովանավորում ակումբը:
-Հնարավո՞ր է երկար ժամանակ ապրել առանց ֆուտբոլի:
-Մեկ ամիս առանց ֆուտբոլի ապրեցինք, բայց, կարծես, ինչ-որ մի բան պակաս լիներ: Տրամադրության խնդիր կար, դժվար է առանց խաղալու, մարզվելու ու հեռուստացույցով ֆուտբոլ դիտելու: Վստահ եմ, որ նույնը զգում են շատ-շատերը:
-Դադարը ի՞նչ ազդեցություն կունենա առաջնությունում հետագա պայքարի վրա:
-Մենք լավ մարզավիճակում էինք գտնվում, բայց դադարից հետո պետք է 0-ից սկսենք: Դժվար է հիմա գնահատական տալ, բայց մենք ամեն ինչ անելու ենք լավ մարզավիճակ ձեռք բերելու ու ամենաբարձր տեղերի համար պայքարելու համար:
Բլից հարցեր.
Կարիերայի ամենամեծ հիասթափությունը.
-ՉԼ-ի որակավորման երկրորդ փուլում՝ «Պարտիզանից» կրած պարտությունը.
( Դավոյանը չհիշեց նախորդ տարվա Չճանաչված երկրների Եվրոպայի առաջնության եզրափակչում թույլ տված վրիպումը, որը զրկեց Արևմտյան Հայաստանի հավաքականին եզրափակչում խաղը տեղափոխել 11 մետրանոց հարվածաշար: Իմ հիշեցնելուց հետ Դավոյանը ժպտալով նշեց, որ արդեն մոռացել էր).
-Երազանք՝ ֆուտբոլում, որը դեռ չի իրականացել.
-Դառնալ Հայաստանի չեմպիոն ու խաղալ Եվրոպա լիգայի խմբային փուլում.
-Ֆուտբոլի պատմության լավագույն խաղացողը.
-Լեո Մեսսի.
—Լավագույն մարզիչը.
-Ալեքս Ֆերգյուսոն.
—Խաղ, որին կցանկանայիր մասնակցած լինեիր.
-1999 թ-ի ՉԼ-ի եզրափակիչ՝ «Մանչեսթեր Յունայթեդ»-«Բավարիա» հանդիպմանը կցանկանայի մասնակցած լինեի, բայց շատ փոքր եմ եղել (ժպտ. Է).
Այդ խաղից հետո եմ սկսել երկրպագել Ֆերգյուսոնին և «Մանչեսթեր Յունայթեդին».
—Ամենահետաքրքիր խաղը, որ դիտել ես.
-Նախորդ մրցաշրջանի «Լիվերպուլ»-«Բարսելոնա» հանդիպումը՝ 4:0:
Այո՛, մարզումները վերսկսել են թիմերը, բայց սա այնքան էլ հուսադրող փաստ չէ, որ մրցաշրջանի վերսկսումը մոտ է, քանի որ վերջին օրերին Հայաստանում կորոնոավիրուսով վարակվածների կորը գնալով աճում է: Մնա՛նք տանը, պահպանե՛նք անվտանգության բոլոր կանոնները: Բառացիորեն բոլորիցս է կախված, թե հաջորդ անգամ երբ բոլորով միասին մարզադաշտից գոոո՜լ կբղավենք: Եվ վերջում, չէ՞ որ այս ամենի արդյունքում խաղասեղանին մարդկային կյանք է դրված…Եվ քանի դեռ ամենաչնչին վտանգը կա՝ աշխարհում մարդկային կորուստ կրելու, ուրեմն, այո՛, չենք դիտի ֆուտբոլ, կսպասենք, որքան հարկավոր է…
Արմեն Գարամյան